Deut 12

₁Häp tähesna Lhawuk lhämtes tä ne'tek amel lewoye wet lhen achumyaja nilhokej ifwalas tä leläy chik lhehi honhat chik Lhawuk, atetsel laka Dios, hiw'enla amhohen.

₂Honhat at chik häpek lekalhi, wasthichela wichi len'okhayajw'etes, häp lhipey tä lhamel ihiche tä n'okwiyej laka dios lhayis tä w'enha lhamejen, iche'pe chenhas tä atoschephä, lhäy'e tä iche'pe chenhas tä ni'tosachephä, lhäy'e tä ichechufwi hal'äy lehupelis. ₃Wasthichela laka altares, wet wola lhipeya tuntey tä lhamel yen t'amajchetesa. Wunhomchela hal'äy tä Asera lepeykas tä lhamel yen laka dios tsinhaya, wet wasthichela iyhäj laka dios lhayis lepeykas, häpkhilek nemhit õ'wopej lheya tä ihi häp honhatestso.

₄Chik len'okwiyej Lhawuk, yej ten m'ak tä iwoye wichi tä iwo len'okhayajw'etesa. ₅Tsi Lhawuk lhamlak tatshupiye lhip chik häpe amel aka honhat yämthilek yen lew'eta häp lham lhey. Wet häpkhila lhiptso chik lehoyayepej yämthilek len'okwiyej häp lham. ₆Hänepeja lhiptso häp itshätäy tä õ'wunhomche lhäy'e iyhäj tä lelänhen tä lewujyenej häp Lhawuk. Häte hänepeja aka diezmos, lhäy'e m'ayhay tä lhachaje Lhawuk tä lematitche ämet tä pajche lewoyeje, lhäy'e m'ak chik elh chik häpe yen tichunhayaja tä is chik hiw'enho Lhawuk, lhäy'e m'ayhay tä lech'otyeneje lechumet. Wet äp hänepeja lhiptso häp aläy w'asetas, lhäy'e tson'atas, lhäy'e kayla lhayis leles tä lechunkatshay. ₇Wet let'ekhenla chik lhehi tä tatache häp Lhawuk Dios, lhäy'e haw'et lheley, tä lewo akäjyajayej häp lhay tä tälhe achumet tä Lhawuk takäpfwaye wet is alhoho.

₈Wet chik lheyayhi honhattso, yej lhachajolak lhenlhi häp m'ak tä y'awoye kana tä elhpej amel lewoyet m'ak tä lehuminche. ₉Matche, athana kamaj tek lechätho honhat tä atamsek ihi tä Lhawuk Dios hiw'enla amhohen. ₁₀Matlak amel lhistho tewok Jordán yämthilek lhenay haw'eta häp honhat tä lham hiw'enla amhohen, wet ifwayhthila amejen nilhokej atayhfwas wet atamsekis ihihla. ₁₁Tä mälhyejtso, honhat lhip chik Lhawuk Dios tatshupiye yämthilek yen lew'eta, häpkhilek amel lhachaje nilhokej m'ayhay tä ofwel amhohen: häp itshätäy tä lelänhen tä lewujyenej häp Lhawuk Dios, lhäy'e aka diezmos, lhäy'e nilhokej m'ayhay iyhäj tä lhen t'awayhata. ₁₂Wet is chik lewo akäjyaja chik lhehi tä tatache Lhawuk Dios, lhäy'e ales, akawos, häte wichi tä tälhe letes Leví tä i'amejen, tsi lhamel tek õhw'enho honhates yämthilek lewuhuy.

₁₃Uyayhlä, yej länhena itshätäy chik lheyayhi honhat lhip chik häpe yämthilek lewunhomche wet lhen han'okhayajayej Lhawuk. ₁₄Tajlhama chik lhehi honhat lhip chik Lhawuk tatshupiye tä yen lew'eta, häp tä is chik lhehi tä lewoye tähestso, wet woyela nilhokej m'ak tä lham ne'tek lewoyaye.

₁₅Nilhokej amel tä lhehiche hupuy tä Lhawuk Dios takäpfwayej amehen akäywet wet lew'en itshätäy, chik let'uhläk letufw t'isan tä lhehiche haw'etes, is t'at. Tek õ'näyejo elh chik häpe chik tufw. Tej chik iche elh tä kok'aye tä ihi tä Lhawuk tatache, is chik tufw t'at, hätet iwoye elh tä lakokhayaj newache. Tufwa t'at, mälhyej chik letufw tson'a t'isan wok ch'iwase t'isan. ₁₆Mat yej tufwa lew'oyis. Tsäyhola honhat, tet iwoye inät.

₁₇Chik lhehi honhat tä haw'et, yej tufwa m'ayhay tä lhen aka diezmoya tä häpe yachuyaj lhay, hat'es, aceite, lhäy'e aläy w'asetas leles tä lechunkatshay, lhäy'e aläy tson'atas leles tä lechunkatshay, lhäy'e aläy kayla lhayis leles tä lechunkatshay. Wet äpte chik lhehi haw'et, yej tufwa m'ayhay tä lhachaje Lhawuk tä lematitche ämet tä pajche lewoyeje. Wet yej tufwa m'ayhay tä lech'otyeneje lechumet, lhäy'e m'ak chik lhen atichunhayaja tä is chik lew'enho Lhawuk. ₁₈Tajlhama chik lhehi honhat chik lham tatshupiye tä yen lew'eta, häp tä is chik letufw tähestso. Amel lhäy'e ales lhäy'e akawos, lhäy'e wichi tä letes Leví tä i'amejen, is chik lheyayhi tä Lhawuk tatache wet lewoyay akäjyajayej häp lhay tä tälhe achumet. ₁₉Wet chik amel lhehi honhattso, yej wom Leví lhayis.

₂₀Wet chik Lhawuk Dios y'isej lhip amel aka honhat, mälhyej tä pajche ifwel amhohen, chik let'uhläk letufw itshäwet t'isan, is t'at, tufwa t'at. ₂₁Wet chik amel haw'et atofwehlä häp honhat tä Lhawuk yen lew'eta, is t'at chik lelänhen w'asetas, tson'atas, kayla lhayis, häp itshätäy tä pajche lham hiw'en amhohen. Is t'at chik letufw tä lhehiche haw'etes, mälhyej tä one'tek lewoyaye. ₂₂Tek õ'näyejo elh chik häpe chik tufw. Tej chik iche elh tä kok'aye tä ihi tä Lhawuk tatache, is chik tufw t'at, hätet iwoye elh tä lakokhayaj newache. Tufwa t'at, mälhyej chik letufw tson'a t'isan wok ch'iwase t'isan. ₂₃Mat yej tufwa lew'oyis, tsi w'oyis häpe t'at n'ow'atshancheyaj. Tä mälhyejtso, yej p'ajteja t'isan chik letufw. ₂₄M'ak tä lewoyeje, tech'ayneja inät, tsäyhola honhat. ₂₅Chik lewoye olhämtesna, Lhawuk hiw'enla tä lewoye t'at m'ak tä is alhoho, häpkhilek newache awit'äyhyaj, lhäy'e ales. ₂₆Mat häp m'ayhay tä lhen t'awayhata, is chik lehäne häp honhat tä lham tatshupiye tä yen lew'eta, lhäy'e m'ayhay tä lhachaje Lhawuk tä lematitche ämet tä pajche lewoyeje. ₂₇Tila'pe laka altar häp itshätäy tä õ'wunhomche. Tsäyla'pe lew'oyis häp altartso wet tufwa t'at t'isan.

₂₈Ch'ahuyaye wet woye nilhokej m'ayhay tä one'tek lewoyaye, häpkhilek newache amel lhäy'e ales lewit'äyhyaj. Tsi n'änhila tä lewoyaye t'at m'ak tä is alhoho wet lekänitlhi häp Lhawuk Dios.

_29-30Chik Lhawuk Dios itäyhthen wichi tä amel lekalhihila wet nofwej lhamel, enayla haw'etesa häp lhamel laka honhat. Mat uhlä, amaja amejen, yej tena lhamel lakeyis wet yej lhoyaykwe, “¿Atsi m'ak tä wichina iwoye tä n'okwiyej laka dios lhayis? ¡Huwa n'aten m'ak tä iwoye lhamel!”

₃₁Yej woynejelatso m'ak chik lewoyayeje Lhawuk Dios. Tsi m'ayhay tä lhamel iwoye tä n'okwiyej laka dios lhayis, Lhawuk lhäy'e lhip tä y'ulhan. Tsi nichäte tä lhamel ilänhen leles wet iwunhomche.

₃₂Achufwenejen wet enay achumyaja nilhokej m'ayhay tä one'tek lewoyaye. Wet yej p'ajtej m'ak chik ka'olhämetayej, wok lesoyej elh chik häpe tähestso.