Deut 15

₁Tä siete nekchämispej, häpe t'at tä lewhäy tä letäyhtejen letes häp aiyhäj tä letujlhayehenpe m'ak tä tacheyjänej. ₂Is chik lewoye täja: Elh chik häpek icheyjäntej elh laka chinaj t'äj, is chik itäyhtej letes häp elh. Isit'ak inityench'oyek elh iwo lahaya m'ak tä tujlhaye'pe. Tsi häpe nekchäm tä lewhäy t'at tä Lhawuk ne'tek õ'täyhat letes häp iyhäj tä letes ihi. ₃Mat häp hin'o tä kahäpeya Israel, häp tä is chik katäyhtayej letes, wet is chik iwot lahaya häp m'ak tä õtujlhaye'pe. Mat häp elh tä häpe aelh, Israel t'at, leyej tä let'alhe'pe m'ak tä tacheyjänej.

₄Chik lewoye täjtso, ihichet'ala elh tä p'elitsaj chik i'amejen. Tsi Lhawuk Dios takäpfwayhiyeja amehen m'ak tä is chik lhehi honhat tä hiw'en amhohen yämthilek alewuhuy. ₅Mat is chik lewoye t'at wet lhen achumyaja nilhokej häp lhämtes tä ow'en amhohen ifwalana. ₆Wet chik Lhawuk Dios takäpfwayhiyeja amehen m'ak tä is, mälhyej tä lham pajche ifwel amhohen, wet wujla akäywet chik lew'en yämthilek lehanej lewoyneje tä lecheyjäntej wujpe wichi tä ihiche honhates. Mat amel let'alhiyet'ala wichi tä i'pe honhat yämthilek lhamel icheyjänhat amejen m'ak tä lewuk. Amel aniyathiyejena wujpey wichi iyhäj, mat lhamel tek niyatla amejen.

₇Chik iche aelh tä p'elitsaj chik i'amejen tä lhehi elh chik häpe hupuy tä ihi honhat tä Lhawuk Dios hiw'en amhohen, yej t'unhat ahusek wet yej n'äyej m'ayek. ₈En atichunhayaja elhtso wet ch'ote tä iwatlä m'ayek. ₉Yej ti amhi atichunhayaj chik ni'isa wet lhok, “Nichäthiyela nekchäm tä lewhäy tä õ'täyhthen letes iyhäj tä letes ihi.” Wet nech'e len'äyiho elh tä p'elitsaj wet tek lecheyjäntej m'ak tä alewuk. Chik mälhyejtso, lham t'änlach'oye Lhawuk wet ifwenhihola häp m'ak tä lewoyeje, wet täjtso häpkhila t'at hach'isukyaj. ₁₀M'ak tä is chik lewoye, w'enho t'at m'ak tä iwatlä wet yej ti amhi tä len'äyej m'ak tä lew'enho. Wet Lhawuk Dios takäpfwayhiyela achumtes wet isichela alhoho nilhokej m'ak chik lewoye. ₁₁Tatäyhit'ala p'elitses tä ihi honhat. Häp tä tamenej tä one'tek lep'altsen aiyhäj tä p'elitses tä niw'ena m'ayek tä ihi aka honhat.

₁₂Chik iche aelh tä Hebreo, hin'o wok atsinha, t'uhläk lechäjej aka chinaj t'äj yämthilek lhen akweneka, tajlhama seis nekchämis tä is chik lechumyenlhi. Wet tä nichäte nekchäm tä siete, is chik leleyej. ₁₃Wet chik leleyej, isit'ak niwoya m'ak chik ichäj, ₁₄mat w'enho iyhäj aläy tson'atas lhäy'e kayla lhayis. Äm wuj yachuyaj lhay tä lew'enho, lhäy'e hat'es. Wok oyok, w'enho lhip häp akäywet tä Lhawuk Dios pajche hiw'en amho. ₁₅Yej p'ethatlä tä ajchalis häte häpehte n'okwenkay tä ihi honhat tä Egipto, wet Lhawuk Dios ifwayhtejen lhamel. Häp tä tamenej tä one'tek lewoye täjtso.

₁₆Mat chik akwenek yok, “Oyikhit'a, häp tä ohumin owuk lhäy'e lew'et lheley. Lhamel wuj tä t'amaj n'oyej tä oiyej”, ₁₇tä mälhyejtso, p'ajtej awukwe lepe ch'ute, wet chuma chinaj tä itselhäj wet käjejo lech'ote, häp tä atetnek tä lham akwenek t'at pajla'tha ileyej honhat. Wet chik atsinha häte woynejetso m'ak tä lewoyeje.

₁₈Yej ti amhi atichunhayaj tä lhok, “Isit'ak oleyej okwenek.” Tsi seis nekchämis tä tachumlhi amho, wet m'ak tä ikalhi häpkhit'a chumaj lakaha tä imälhewek, mat lechowej. Tsi chik lewoye m'ak tä is alhoho, Lhawuk Dios takäpfwayhiyela nilhokej m'ayhay tä lewoye.

₁₉Ena amajchetayej Lhawuk Dios häp w'asetaj wok tson'ataj lhäs wok kayla lhäs, elh chik asnak tä ichun tä nichätchä.

Yej chumyenlhi w'asetaj lhäs tä lechunkatsek, wet yej lhisetche lew'ole häp tson'ataj lhäs tä lechunkatsek. ₂₀Nekchämpej häp tä letufw tä ihi tä Lhawuk Dios tatache, am lhäy'e haw'et lheley, tä lhehi honhat tä lham tatshupiye tä yen lew'eta. ₂₁Mat chik iche lewit'äyhyaj chik häpe häp itshäwet lhäs tä lechunkatsek, chik yap'onek, wok asnam, wok m'ak at chik häpe chik iyej, yej län yämthilek lhen han'okhayajayej Lhawuk. ₂₂Mat is chik letufw tä lhehi haw'et, is t'at, yämthilek nilhokej wichi tufw t'at. Tej chik iche elh tä kok'aye tä ihi tä Lhawuk tatache, mat is t'at, häte tufw t'at, mälhyej chik letufw tson'a wok ch'iwase. ₂₃Mat yej tufw lew'oyis. Tech'aynej inät, tsäyho honhat.