Deut 16

₁Chik lechätepej iwel'a tä lhey Abib, enpej akäjyaja Pascua tä lewujyen Lhawuk Dios. Tsi häpehte iwel'atso tä honatsi tä lham itonphä ajchalis tä ihi Egipto. ₂Wet chik nichäte ifwala tä Pascua, is chik lhehi honhat lhip tä Lhawuk Dios tatshupiye tä yen lew'eta, wet lelän tson'ataj wok kayla wok w'asetaj. ₃Tufw t'at itshäwet tä lelän, lhäy'e pan tä levadura newayej. Pajla'tha siete ifwalas chik letufway pan tä levadura newayej. Häpe pan tä n'olhakli, tsi tä ajchalis yiktech'oye Egipto, nilhak'altshi t'at. Wet häp tä tamenej, nilhokej ifwalas tä kamaj leläyhen enaypej atichunhayaja ifwalahte lhamel yikch'oye Egipto. ₄Wet siete ifwalastso, nilhokej amel tä lhehi aka honhat yej ti amejen levadura tä let'amajej. Wet itshäwet tä lelän tä honaj, yej t'amajej lhip yämthilek letufw chik ifwala elh.

₅Yej länhen itshätäy chik lhehi lhip at chik häpe häp honhat tä Lhawuk Dios hiw'en amhohen. ₆Tajlhama chik lhehi lhip tä lham tatshupiye tä yen lew'eta, häp tä is chik lhehi tä lelänhen itshätäy tä Pascua. Wet länhen tä ifwala y'uy, tsi häpehte t'at lewhäytso tä ajchalis yikch'oye Egipto. ₇Is chik lep'o t'isan wet letufw tä lhehi Lhawuk lew'ettso. Wet chik leleyej, tä ifwala elh lhäpnhomche haw'etes. ₈Mat kamaj letujlhache t'at tä letufw pan tä levadura newayej pajtha siete ifwalas. Wet ifwala siete alehutwek tä lewujyen Lhawuk Dios wet yej tachumwethä.

₉Wet chik lelanhi akäs trigo, wet chik tajyäme siete semanas, ₁₀woyayla akäjyaja tä lewujyen häp Lhawuk Dios. Wet w'enhola häp m'ayhay tä lhen t'awayhata tä tälho häp m'ayhay tä lham takäpfwayej amehen. ₁₁Wet wola akäjyaja tä lhehi tä tatache Lhawuk Dios tä lhehi honhat lhip tä lham tatshupiye tä yen lew'eta, am lhäy'e ales, lhäy'e akawos, lhäy'e wichi tä tälhe letes Leví, lhäy'e wichi tä kahäpeya Israel lhayis tä i'amejen, lhäy'e chipenhas, lhäy'e tesalis. ₁₂Tichunche tä ajchalis häte häpehente Egipto lakawos. Tä mälhyejtso, woye wet en achumyaja nilhokej Lhawuk lhämtesna.

₁₃Wet chik leleyej tä lelanhi akäs trigo lhäy'e tä lewo t'iya aka uvas, häte wola akäjyajayej häp N'ohupelis siete ifwalas. ₁₄Akäsyenawethä chik lechätepej häp ifwalastso, am lhäy'e ales, lhäy'e akawos, lhäy'e wichi tä tälhe letes Leví, lhäy'e wichi tä kahäpeya Israel lhayis tä i'amejen, lhäy'e chipenhas, lhäy'e tesalis. ₁₅Akäjyajna häp tä lewujyenej Lhawuk Dios pajtha siete ifwalas tä lhehi honhat lhip tä lham tatshupiye tä yen lew'eta. Tsi pajichela takäpfwaye wet is alhoho akäs tä lelanhi, lhäy'e nilhokej achumtes tä lewoye, wet matche tä akäjyaj ihi.

₁₆Nilhokej hin'ol, is chik lhaipäyne Lhawuk Dios tres veces nekchämpej tä ihi honhat lhip tä lham tatshupiye tä yen lew'eta. Wet häp ifwalas tä n'okäjyaj, mälhyej tä õyen n'okäjyaja pan tä levadura newayej, lhäy'e tä õ'wo käjyajayej yachuyaj tä õ'lanhi, lhäy'e tä õ'wo käjyaja'pe n'ohupelis, is chik nilhokej hin'oltso ichäje Lhawuk m'ak tä yen t'awayhata. ₁₇Elhpej ichäj m'ak tä tälho m'ayhay tä Lhawuk Dios takäpfwayeje.

₁₈Is chik lhen häpeya n'okalelhthayajwos hin'ol iyhäj, wet iyhäj lhen häpeya lech'otfwas, häpkhilek lhamel ihi nilhokej honhates tä hupuy ihiche tä Lhawuk Dios hiw'enhihomchela häp amel tä letälhehen atetsel tä ihi doce. Wet is chik lhamel yämpej is alhoho lakalelhthayaj tä iwoye. ₁₉Woye t'at m'ak tä n'okalelhthayaj yiwete, chik is wok ni'isa. Yej tetshanej m'ak tä häpe elh, chik häp hin'o tä hiw'en m'ayek wok häpe hin'o tä p'elitsaj. Häte yej tachumlä m'ak chik elh ikänitlhi amej tä t'uhläk katetshana m'ak tä ni'isa tä iwoye. Tsi täjtso häp tä tamenej hin'ol tä lehanyaj ihi tä nemhit itetshan m'ak tä is alhoho yämthilek iwoye, wet niwohit m'ak chik isej iyhäj tä laj letesa. ₂₀Ts'ilkat t'at m'ak tä is alhoho tä lewoye. Häp tä is chik kaleyayej tä lewoye, häpkhilek haw'atshancheyaj ihi wet lheyayhi t'at honhat tä Lhawuk Dios hiw'en amhohen.

₂₁Yej lhen akäsa hal'ä chik häpe yämthilek lhen haw'eta tä len'okwiyej dios tsinha tä lhey Asera, wok letiwhäye altar tä Lewuk lhaka Dios. ₂₂Wet yej neyhatphä tunte yämthilek lewo han'okhayajayej. Tsi täjtso häp tä iwäkyhayen häp Lhawuk Dios.