1Yej län w'asetaj wok tson'ataj tä ni'isa, chik iche lewit'äyhyaj chik häpe, yämthilek lhen han'okhayajayej Lhawuk Dios. Chik lewoye täjtso, lewäkyhayen häp lham.
2Chik iche hin'o wok atsinha tä ihi elh chik häpe honhates tä hupuy ihiche tä Lhawuk Dios hiw'en amhohen, wet wichi hiw'en tä iwoye m'ak tä ni'isa wet inäk'äs Dios lhämet, 3wet n'okwiyej dios lhayis tä w'enha lhamej, wok n'okwiyej ifwala, wok iwel'a, wok katetsel, iwoye m'ak tä Lhawuk nine'tayek iwoye. 4Wet chik lehanch'oye, is chik wuj tä letetshan m'ak tä wichi yäme. Wet chik kalelhäj tä matche tä elh iwoye m'ak tä mälhyejtso tä lhäy'e lhip tä ni'isa tä ihi Israel, 5is chik lehän alhoye tä ihi hupuy wet thatejlhi tuntey pajla'tha y'il.
6Chik dos wok tres iyhäj tä yäme tä hiw'enej m'ak tä elh iwoye, häp tä laha ihi lhamel lhämet yämthilek õ'län häp elh. Mat chik tefwajni elh tä yäme, laha ihihit'a lhämet wet õ'länhit'a häp elh. 7Wet häp hin'ol tä yäme m'ak tä elh iwoye tä ni'isa, häp tä ichun lhamel tä ithatejlhi tuntey häp elh, wet nech'e nilhokej wichi tä ithatejlhi tuntey. Chik lewoye täjtso, nofwila m'ak tä ni'isa tä i'amhihen.
M'ak tä is chik wichi iwoye chik iche m'ak tä atha chik ikalelhät
8Wet chik atha amho m'ak tä let'uhläk lekalelhät, mälhyej n'olänek, wok õyäme tä iyhäj iwoyeje m'ak tä nit'uhawetayej, wok elh iwo lelätseka elh, wok m'ayhay tä ni'isa tä ihi hupuy tä lhehi, is chik letiyäje honhat lhip tä Lhawuk Dios tatshupiye tä yen lew'eta. 9Wet hoye Leví leles tä häpehen sacerdotes, lhäy'e n'okalelhthayajwo tä ihi lechumet häp ifwalastso, wet fwenho lhamel häp m'ak tä tamenej tä lehoye yämthilek ikalelhät. Wet lhamenlak ikalelhät m'ak chik t'uhawetej häp m'ak tä lefwenho lhamel, 10wet nech'e amel lewoye t'at lhamel lhämet tä ne'tek lewoye. 11Mat woye t'at nilhokej m'ak tä lhamel ne'tek lewoye tä lekalelhät elh letes, wet yej woye m'ak tä lhamel kalhämeta. 12Elh tä lhaichäjlhi wet ikachuye, iwohiyet'ak õkniläna. Tsi häp tä niwoyaye n'okalelhthayajwo lhämet wet niwoyaye lhämet häp sacerdote tä Lhawuk lakawo tä ihi honhattso. Län hin'otso, häpkhilek noj m'ak tä ni'isa tä ihi Israel. 13Wet chik wichi ihanej täjtso, nowaye chik lhaichäjwethä.
M'ak tä is chik wichi iwoye tä iwatlä laka rey
14Chik lechätayho honhat tä Lhawuk Dios hiw'enla amhohen wet lhen haw'eta, elat lhoyaykwe, “Owatlä oka rey yämthilek lhayen niyatayej olhamel, mälhyej iwoye wichi tä ihiche laka honhates tä y'ewhäye.”
15Is t'at. Mat elh tä lhenla aka niyata iwohiyet'ak kahäpeya hin'o tä Lhawuk Dios tatshupiye, wet äp häpe t'at elh amel. Yej lhen häpeya aka rey häp hin'o tä kahäpeya elh amel.
16Mat häp elh tä aka rey, isit'ak yäm wujpey yel'atas chik iti lhamej. Wet isit'ak iwo chenekaye Egipto yämthilek ichäj yel'atas. Tsi Lhawuk pajche ifwel amhohen tä yok, “Yej lhäple honhattso.” 17Häte isit'ak yäm wujpey lech'efwas, häpkhilek lehusek niwetayayej m'ak tä is alhoho. Wet isit'ak yäm wuj oro lhäy'e plata tä ihut lhamej.
18Wet chik hin'otso tiyäjo leniyatyaj, ne'tehlak õ'ten n'olesaynhay tä häpehen n'ochufwenyajayna tä Leví leles tä häpehen sacerdotes t'amajej. 19Wet is chik iti lhamej n'olesaynektso yämthilek yahyen nilhokej ifwalas tä iläy, wet lhaichufwenej tä iwunitpej Lhawuk Dios. Wet iwoye nilhokej lhämtesna, wet yen lechumyaja 20wet nileyayej, wet tek lhainuhatpe iyhäj tä lham len'ohyaj ihi, häpkhilek lham lhäy'e leles tä lepes lheley nittäya leniyatyaj tä ihi Israel.
