Deut 24

₁Chik hin'o yen lech'efwaya atsinha, mat tä paj y'ulhan tä hiw'en tä atsinha iwoye m'ak tä lham nhuminache, chik mälhyejtso, hiw'enho papel tä kalelhäj tä ileyej tä yen ch'efwaya atsinha, wet nech'e ichen tä iyej lew'et. ₂Wet tä atsinhatso yikch'oye lew'et, yen ch'efwaya hin'o chik häpe. ₃Wet chik äp hin'otso ileyej, häte lham hiw'enho papel tä yäm kalelhäj tä ileyej atsinha tä yen ch'efwaya, wet ichen tä ihi lew'et. Wok elat y'il hin'otso. ₄Chik mälhyejtso, hin'o tä ichun tä lech'efwa häp atsinha, isit'ak yäple wet yen ch'efwaya. Tsi nech'e häpe atsinha tä lakokhayaj ihi, wet chik lewoye täjtso lewäkyhayen Lhawuk Dios. Isit'ak kat'amajayej häp honhat tä Lhawuk hiw'en amhohen yämthilek alewuhuy.

₅Chik hin'o nech'efwaj tä tawhayey, isit'ak ihoye n'oka'tshayaj, mat iyej t'at lech'efwa. Isit'ak iwoye m'ak chik häpe pajtha nekchäm tefwajni, wet letamsek ihi t'at ifwalastso, häpkhilek lakäjyaj ihi lech'efwa.

₆Isit'ak lene'tek aelh hin'äype laka fwelhek häp m'ak tä lecheyjäntej. Tsi hätet iwoyek lene'tek aelh yen lhäyeka lew'atshancheyaj.

₇Wet chik õ'hanej tä iche elh amel tä iskat elh Israel tä t'etane wet yen kawoya, wok iwom, ichäjej chinaj t'äj, iwohiyet'ak õkniläna hin'o tä iwoye täjtso, häpkhilek noj m'ak tä ni'isa tä i'amhihen.

₈Wet elh chik amostas ilän, is chik iwoye nilhokej m'ak tä Leví leles tä häpehen sacerdotes ne'tek iwoye. Is chik iwoye t'at m'ak tä häpe, mälhyej tä olham pajche ofwenho yämthilek lhamel iwoye. ₉Tichunche m'ak tä Lhawuk Dios iwoyejehte Miriam tä ajchalis nekche n'äyij tä tälhe Egipto.

₁₀Chik lecheyjäntej aelh aka chinaj t'äj, yej hochufwi lew'et yämthilek letachuma m'ak tä lewuk tä lhen lahaya m'ak tä letujlhayeje. ₁₁Kasit t'at tä lhe alhoye, taye t'at. Lhamlak hiw'en amho laka m'ayek chik häpe tä hin'äype lecheyjänhat. _12-13Wet chik häpe elh tä p'elitsaj, achaje laka m'ayek tä ifwala y'uy, häpkhilek taw'uyhi tä imä tä honatsi. Wet aelhtso takäpfwayhiyeja ame m'ak tä is, häpkhilek Lhawuk Dios yok, “Is m'ak tä lewoye.”

₁₄Yej wo kotsayej elh tä p'elitsaj chik lechumyenlhi. Yej pantej tä lew'enho lakaha häp elh tä häpe Israel, wok elh tä kahäpeya tä i'amejen tä ihi hupuy tä haw'et. ₁₅W'enho lakaha häp ifwala tä tachumlhi tä kamaj ifwala n'uya. Tsi häpe elh tä p'elitsaj wet iwatlä chinaj t'äj yämthilek ichäjej m'ak chik tufw. Chik kawoyaye täjtso, yämla amehen tä akni'isahen wet letiyej akanyaj. Wet t'änlach'oye Lhawuk yämthilek tach'ote, wet lham yenla tesa amejen täjtso.

₁₆Chik hin'o lhäs iwoye m'ak tä ni'isa, yej menyenej lajcha yämthilek lelän. Wet chik lajcha wok lako iwoye m'ak tä ni'isa, yej menyenej lhäs yämthilek lelän. Mat häp elh tä iwoye m'ak tä ni'isa, lham t'at tä letes ihi wet õ'län.

₁₇Yej tiyej akalelhthayaj tä ni'isa alhoho häp chipenhas wok wichi tä kahäpeya Israel lhayis. Häte yej tachumlä tesa lew'uy tä t'uhläk hin'äy amej yämthilek lecheyjäntej aka chinaj t'äj. ₁₈Tichunache tä ajchalis häpehente n'okawos tä ihi Egipto, wet Lhawuk Dios itonphä lhamel. Häp tä tamenej tä oyok, Yej woye m'ayhay tä oyämetso.

₁₉Wet chik lelanhi akäs lhäy tä ihi alafwek, wet chik imälhehchä elh häp trigo tä lenayhthomche, yej lhäple. Häpkhilek elh chik häpe tä kahäpeya Israel tä i'amejen tachuma wet isej, wok elh tä chipenaj, wok tesa. Chik lewoye täjtso, Lhawuk Dios takäpfwayhiyeja m'ak tä isen nilhokej m'ak tä lhenwethä.

₂₀Wet chik lehutwek akäs olivo lhay aceitunas, yej lhäm nofwej tä ihi lhile. Häpkhilek elh chik häpe tä kahäpeya Israel tä i'amejen tachuma wet isej, wok elh tä chipenaj, wok tesa.

₂₁Wet chik lelanhi uvas, yej lhäm nofwej lhay tä ihi lhile. Häpkhilek elh chik häpe tä kahäpeya Israel tä i'amejen tachuma wet isej, wok elh tä chipenaj, wok tesa. ₂₂Tichunache tä amel ahäpehente n'okawos tä lheyayhi Egipto. Häp tä tamenej tä one'tek lewoye m'ayhay tä oyämetso.