Deut 29

₁Häp tähesna Lhawuk lhämtes tä hit'untejche Israel lhayis wet ne'tek Moisés iwoyeje lhamel tä ihi honhat tä Moab. Hip'ajtej lhämtes tä iwoyeje p'ante lhamel lajchalis tä lhamel ihi p'ante chenaj tä lhey Horeb. ₂Moisés ihutwek nilhokej Israel lhayis wet tahuyej tä yok:

Amel lew'enayhte nilhokej m'ak tä Lhawuk iwoyeje p'ante Egipto kaniyat, lhäy'e leniyatfwas, lhäy'e mälhewek laka honhat. ₃Lew'enayhte letetnhay wet wuj tä leseltejen m'ayhay tä äyteschehen tä iwoye. ₄Mat tälhe lewhäytso pajtha häp ifwalana, Lhawuk tek itäfwnhat amejen yämthilek lehanej m'ak tä häpe tähestso. Tej tä lew'en wet leläte, mat letäfwenhiyejt'a.

₅Cuarenta nekchämis tä ihän amchehen ts'anis, wet wasihichet'a haw'uyis lhäy'e anisähis. ₆Wet tek letufway pan wok leyäyej vino wok hat'es chik häpe. Mat Lhawuk t'at tä hiw'en amhohen m'ak tä letuj lhäy'e m'ak tä leyäyej, yämthilek letäfwelayej tä lham häpe t'at amel aka Dios.

₇Tä y'anchätho häp honhatna, inu n'amehen Sehón, häp rey tä ihi Hesbón, lhäy'e Og, rey tä ihi Basán. Mat y'akalhi t'at, ₈wet y'asoyej lhamel häp laka honhates wet y'aw'enho häp wichi tä tälhe letes Rubén yämthilek lhayen lewuka, lhäy'e wichi tä tälhe letes Gad, lhäy'e lechowej wichi tä tälhe letes Manasés. ₉Tä mälhyejtso, woyaye nilhokej Lhawuk lhämtesna tä iwoyej amehen. Achufwenej wet en achumyaja, häpkhilek isen nilhokej m'ak at chik häpek lhenlhi.

₁₀Ifwalana nilhokej amel tä alehutwek tä lhehi tä Lhawuk Dios tatache, häp amel tä letälhehen doce atetsel aka niyatey, lhäy'e hin'ol tä thänhäy, lhäy'e leniyatfwas, lhäy'e nilhokej Israel lhayis kahin'ol, ₁₁lhäy'e nä'tshas, atsinhay, lhäy'e wichi tä kahäpeya Israel lhayis tä i'amejen, lhäy'e hin'ol tä t'ifwop amhohen, lhäy'e hin'ol tä ihän amehen inät. ₁₂Lheyay kana yämthilek let'unhatche ämet tä lewoyeje häp Lhawuk Dios wet lhäm kalelhäj ämet tä lewohiyela nilhokej lhämtes tä iwoyej amehen ifwalana. ₁₃Ifwalana lham yäm kalelhäj tä ayen laka wichiya wet lham häpe t'at aka Dios, mälhyej tä hit'untejche p'ante ajchalis Abraham, Isaac, lhäy'e Jacob, wet ifwelte amhohen. ₁₄Wet ts'ilakhit'a amel tä Lhawuk Dios iwoyej amehen lhämetna lhäy'e tä hit'unhatche. ₁₅Mat y'aje nilhokej wichi tä ihihila ifwalas tä tatay alhoho.

₁₆Amel lehanej t'at m'ak tä iyejte ajchalis häp lewhäy tä ihihte Egipto, lhäy'e tä äp n'amel y'anukwepej wichi iyhäj laka honhates. ₁₇Wet y'aw'en lhamel laka dios lhayis tä kamatachehen, lhäy'e n'ocheyälis tä hal'ä, wok tunte, wok oro, wok plata, tä lhäy'e lhip tä ni'isahen tä wichi n'okwiyej. ₁₈Is chik newache elh chik häpek i'amejen, hin'o wok atsinha, wok aiyhäj chik häpe, wet ifwalana ileyej Lhawuk Dios wet yen lewuhuya wichi tä i'pe honhat laka dios lhayis. Is chik newache elh amel chik hätet hal'ä tä lefwettsil tapay wet äp n'ot'ilek.

₁₉Wet chik tajyäme tä lelätaye Lhawuk lhämtesna tä hit'unhatche amejen, elat iche elh amel tä fwetaj häpe elh tä is wet yok, “Isila t'at, tej chik owoyet m'ak tä olham onech'ethayaj, is t'at.” Mat oyok, elh chik iwoynejetso lhämet tamenhiyeja iyhäj wet tatäy. ₂₀Lhawuk tek itäyhthiyeja letes, mat ichätyenla'pe lewäk lhäy'e t'ulhnhayaj tä itiyej häp hin'o tä mälhyejtso. Wet nilhokej lakäpfwayajay tä ni'isachehen tä õ'fwenho tä ihi Lehina nichätla'pe, wet Lhawuk itäyhthila tä ihi honhat. ₂₁Itihiyeja kanhihlä Israel lhayis häp hin'otso, wet ichätyenla'pe lewit'äyhyaj, nilhokej n'owit'äyhyajay tä pajche õyäme tä õ'lesayen tä ihi Lhawuk lhämtes Lehina.

₂₂Wet häp wichi tä tatay alhoho tä häpe ales tä lepes lheley, lhäy'e wichi tä kahäpeya Israel lhayis tä nämhenla tä tälhehen laka honhates tä atosehen, lhamel hiw'enla n'otnhayajay lhäy'e n'owit'äyhyajay tä Lhawuk pajichela ichene häp aka honhat. ₂₃Imälhehilawek honhat azufre lhäy'e nisoy t'at tä hip'o. Wet nehit katsik ihanhiyejak tutcheyhi, wet niwohit m'ak chik tälho, wok hal'äy chik lhaichihelthila. Hätehlat iwoye Sodoma lhäy'e Gomorra lewit'äyhyaj p'ante, lhäy'e Adma, lhäy'e Seboyim tä Lhawuk lewäk tä äytajche nichätpe wet itäyhat, wet nemhit is honhat. ₂₄Wet nilhokhiyeja wichi tä i'pe honhat lhamel yohlak, “¿Chipte tä wichitso laka Dios iwoynejetso m'ak tä iwoyeje häp honhattso? ¿Chipte tä wuj lewäk tä itiyej?” ₂₅Wet wichi iyhäj yohlak, “Häp tä wichitso ileyej lhamel letetsel lewuk Dios lhämet tä iwoyeje p'ante tä itonphä lhamel tä ihi Egipto, ₂₆wet nech'e lhamel yen lewuhuya wet n'okwiyej dios lhayis tä lhamel nitäfwelayej wet tach'othiyet'a lhamel. ₂₇Häp tä tamenej tä lewuk Dios itiyej letasnhayaj häp honhattso, wet ichätyenpe nilhokej lakäpfwayajay tä ni'isa tä õ'lesayen tä ihi Lehina. ₂₈Wet wuj lewäk tä itiyej wichi wet y'ulhan. Wet itiyej kanhi tä ihi honhattso wet ithatehen honhates iyhäj, mälhyej tä y'aw'en athana.”

₂₉Iche m'ayhay tä kay'ahanayej, mat lewuk t'at Lhawuk Dios. Häte iche m'ayhay tä lham itäfwnhat n'amejen, lhäy'e lhales, häp tä isej lhämtesna, yämthilek y'awoyepej wet tek y'aleyej.