Deut 30

₁Chik nichät atapehen nilhokej m'ayhay tä oyämetso, häp Lhawuk Dios lakäpfwayajay tä isen lhäy'e lakäpfwayajay tä ni'isachehen tä ofwel amhohentso, wet chik lhehiche honhates tä lham aithatehen, wuj tä lewo atichunhayaja, ₂wet lewoyay ahusey iyhäja wet lewoyaye lhämtes, mälhewek achowhal lhäy'e mälhewek atichunhayajay, häp amel lhäy'e ales, mälhyej tä one'tek lewoyaye ifwalana, ₃chik lewoyaye täjtso, Lhawuk Dios iwohla elha han'äyij wet itihla amejen lep'altsenyaj. Wet yachajiholak ihutwek amel tä letälhehen honhates tä lham aithatehen. ₄Tej chik lhehiche honhates tä wuj tä atosehen, mat Lhawuk Dios t'uhla amchehen wet ainachajiyela aka honhat. ₅Aichätyenhihola honhat tä atetsel yen lew'eta, wet alewuhuyla. Wet takäpfwayhiyeja amehen m'ak tä is, wet lhäy'ehila lhip chik wujpe ales, inuhla'pe atetsel.

₆Wet iwohla letetnekayeji ahusek häp lhämet, lhäy'e ales, achetsos, häpkhilek mälhewek achowhal lhäy'e mälhewek atichunhayajay tä lehumin Lhawuk Dios, yämthilek kat'ilahen. ₇Wet ichätyenla'pe nilhokej lakäpfwayajay tä ni'isachehen häp atayhfwas lhäy'e wichi tä n'äyi amhomche. ₈Wet amel lhäpnhiyeja Lhawuk Dios wet lewohiyela lham lenech'ethayaj, wet alechufwenejen nilhokej lhämtes tä one'tek lewoye tälhe ifwalana. ₉Wet chik mälhyejtso, lham takäpfwayhiyejela m'ak tä is nilhokej m'ak at chik häpek lhenlhi, wet wujla'pe ales, lhäy'e aläy, wet wujla akäs yachuyaj. Oyok matche, Lhawuk Dios akäjiyejlhila m'ak tä is chik iwoyej amehen, mälhyej tä akäjejlhi m'ak tä is tä iwoyeje amel atetsel, ₁₀chik amel letach'ahuye wet lewoye nilhokej lhämtes tä õ'lesayen tä ihi Lehina, wet lemälhtejwek achowhal lhäy'e atichunhayajay tä lewo ahusek elha.

₁₁Häp Lhawuk lhämet tä ofwel amhohen ifwalana athahit'a amhohen, wet häpkhit'a m'ak chik kasakanayej. ₁₂Ihit'a puleye wet tamenej chik lhok, “¿Atsihilak tiyäj puleye wet ichäj n'amehen wet itäfwnhat n'amejen yämthilek y'alhaichufwenejen?” ₁₃Häte tek iw'echehi lewomekitaj wet tamenej chik lhok, “¿Atsihilak tiyäj w'echehi lewomekitaj wet ichäj n'amehen wet itäfwnhat n'amejen yämthilek y'alhaichufwenejen?” ₁₄Tek mälhyejtso. Lhawuk lhämet tek atofwe ahilähen, ihi t'at apästey wet ihi t'at atichunhayaj yämthilek lewoye.

₁₅Lhek yahin, ifwalana ofwel amhohen m'ak tä häpe n'ow'atshancheyaj, lhäy'e m'ak tä is, lhäy'e n'ot'ilek, lhäy'e m'ak tä ni'isa. Wet tshupyene m'ak tä lehumin. ₁₆Chik lewoye m'ak tä ofwel amhohen ifwalana, wet lehumin Lhawuk Dios wet lenukwe len'äyij, wet lewoye nilhokej lhämtes lhäy'e lechufwenyajay, wet tek let'inhihena. Mat wujla'pe ales, wet Lhawuk Dios takäpfwayhla amehen chik lhehi honhat tä haw'et. ₁₇Matlak kawoyaye m'ak tä ofwel amhohenna, wet leleyej Lhawuk wet alewetahatej dios lhayis tä w'enha lhamej, wet letakhoschufwi tä len'okwiyej wet lhen awuhuya, ₁₈chik lewoye täjtso, ofwel amhohen athana tä let'inhihena, kalelhäj t'at. Wet pitajit'ala ifwalas chik lhehi honhat tä lechäthihola tä tumej tewok Jordán lhip elh.

₁₉Ifwalana one'tek pule lhäy'e honhat ifwenla ates, tsi one'tek letshupyene m'ak tä lehumin: n'ow'atshancheyaj wok n'ot'ilek, n'okäpfwayajay tä is wok n'okäpfwayajay tä ni'isa. Oyok, tshupyenaye n'ow'atshancheyaj häpkhilek kat'ilahen, lhäy'e ales, lhäy'e iyhäj tä lepes lheley. ₂₀Huminay Lhawuk Dios, yej leyej. Woye m'ak tä ifwel amhohen. Tsi tähestso häp tä haw'atshancheyaj tälhe, wet pitajla nekchämis chik lhehi honhat tä lham hit'untejche p'ante lhämet tä ifwenho atetsel Abraham, Isaac, Jacob, tä yok, “Ow'enhihola ales.”