Deut 4

₁Moisés äp tahuyej wichi wet yok:

Athana, Israel lhayis, ch'ahuyaye nilhokej Dios lhämtes tä pajche ochufwen amejen. Wet achufwenejen tä lewoyaye wet en achumyaja, häpkhilek kat'ilahen wet letiyäjo honhat tä Lhawuk, atetsel laka Dios, hiw'en amhohen, wet alhenay lewuhuya. ₂Yej t'isej elh wok lesoyej elh chik häpe häp m'ayhay tä one'tek lewoyaye. Woyaye Lhawuk Dios lhämtes tä one'tek lewoyaye.

₃Amel lew'enay m'ak tä Lhawuk Dios iwoyehte tä ihi Ba'al-peor, tä lham itäyhthen nilhokej wichi tä i'amejen tä n'okwiyej dios tä ihi honhattso. ₄Mat nilhokej amel tä kaleyayej Lhawuk Dios tek let'inhen.

₅Pajche ochufwente amejen nilhokej Owuk Dios lhämtes tä ne'tek ofwel amhohen, häpkhilek alechufwenejen wet lewoyaye chik lheyayhihila honhattso. ₆Woyaye wet häp tä enay achumyaja, häpkhilek wichi tä i'pe honhat hiw'en tä ahäpehen iyhäj tä ihanche m'akejen. Wet chik wichi iläte Lhawuk lhämtesna, lhamel yohlak, “¡Matche tä lehanyaj ihi wichina wet lehusey ihi!”

₇Ihichet'a wichi chik wujpey wet laka dios lhayis iyej lhamel chik häte iwoye n'amel tä in'amejen Lhawuk Dios tä y'at'änpejch'oye. ₈Wet ihichet'a wichi tä wujpey wet äp hiw'en nilhokej n'olhämtes tä isen chik häte iwoye tä ochufwen amejen ifwalana. ₉Häp tä oyok, amaj amejen. Yej p'ethatlä m'ayhay tä pajche lew'enay, wet yej leyej tä lhen atichunhayaja tä kamaj leläy. Chufwenejen ales lhäy'e achetsos.

₁₀Ifwalahte ajchalis ihi tä tatache Lhawuk Dios tä lham i'pe chenaj Horeb, wet tahuyhte n'oyej wet yok, “Hutwek wichi yämthilek iläte olhämtes wet lhaichufwenejen, häpkhilek iwunitn'o nilhokej ifwalas tä kamaj iläy tä i'pe honhat, wet ichufwenejen leles.”

₁₁Wet ifwalatso lhamel ihoye chenaj, wet iche itäj tä y'uho tä i'pe chenaj pajtha nichät puleye. Häte iche pule tä wuj tä ichalaj. ₁₂Wet Lhawuk tahuyej lhamel tä tumho itäj, wet lhamel iläte t'at lhämtes, mat hiw'enhit'a t'isan, tajlhamat lepak tä iläte. ₁₃Wet Lhawuk itäfwnhatej lhamel häp lhämet tä iwoye tä häpe Diez Mandamientos tä ilesayen tä iti'pe tunte lhipey. Wet häp tä ne'tek lhamel iwoye wet yen lechumyaja. ₁₄Wet ne'tek olham ochufwenejen lhamel nilhokej häp lhämtes yämthilek iwoye chik ihi honhat tä yenla lew'eta.

₁₅Häp ifwala tä Lhawuk tahuyehen lhamel tä tumho itäj tä i'pe chenaj Horeb, wet niwohit m'ak chik tatey hiw'en. Tä mälhyejtso, amel uyayhlä, ₁₆isit'alak alekänchi wet lhenlhi amhohen lepeyak m'ak at chik häpe, wet letech'aynej hin'o wok atsinha, ₁₇wok letech'aynej itshäwet wok afwenche, ₁₈wok letech'aynej m'ak tä lhaitonche honhat wok w'ahat. ₁₉Wok leyahin puleye wet lew'en ifwala, iwel'a, katetsel, lhäy'e iyhäj m'ayhay tä iche pule, yej ti amhi atichunhayaj tä lewunit tähestso wet len'okwiyej. Tsi Lhawuk Dios häp tä lhenhay nilhokej m'ayhay tä iche pule, yämthilek wichi tä ihiche laka honhates isej. ₂₀Wet Lhawuk tachuma lhamel, wet itonphä tä ihi Egipto tä hätet iwoye n'onhonthi tä õ'wachuhathiche chinhas, wet yen häpeya laka wichi, mälhyej tä lhayen amel Awuka ifwalasna.

₂₁Mat olham, amel letamenay n'oyej tä Lhawuk iti n'oyej lewäk, wet hit'unhatche lhämet tä olham tek oyisthihola tewok Jordán, wet tek otiyäjihola honhat tä is tä lham hiw'enla amhohen yämthilek alewuhuy. ₂₂Tä mälhyejtso, tek oyisthihola tewok mat oy'inhila tä oihi honhatna. Wet amel kalelhäj tä lhisthihola tewok, yämthilek letachumaye wet alhenla lewuhuya honhat tä is. ₂₃Mat uyayhlä, yej p'ethatlä lhämet tä Lhawuk Dios yäm kalelhäj tä iwoyej amehen. Yej lhenlhi amhohen lepeyak m'ak at chik häpe häp m'ayhay tä Lhawuk Dios n'äyej amhohen chik lhenlhi. ₂₄Tsi Lhawuk Dios häpe Dios tä nhumina chik õhp'ajtejlhi m'ak chik häpe, wet häpe itäj tä itäyhat m'ayek.

₂₅Wet chik nichäte ifwala tä athänhäy chik lhehi honhattso, wet iche ales, achetsos, wet chik alekänchi wet lhenwethä amhohen n'opeykas wet letech'aynej m'ak chik häpe, häp täjtso m'ak tä wuj tä ni'isa tä lewoyaye tä letatayhlä Lhawuk Dios wet lewäkyhayen. ₂₆Chik mälhhiyejatso akey, athana ofwel amho m'ak tä awit'äyhyajla: Ot'äne pule lhäy'e honhat yämthilek yäme m'ak tä lewoye, tä kalelhäj tä pitajit'ala lewhäy chik lheyayhi aka honhat tä tumej Jordán lhip elh, anofwiyeja. ₂₇Lhawuk aifwtsatkatla'pe honhatil, wet iyhäjfwaspej amel chik imälhehi tä iyej wichi chik häpe. ₂₈Wet len'okwihiyeja dios lhayis tä n'otkwey lhenhay, häp n'ocheyälis tä hal'ä lhäy'e tä tunte tä tatelhoy newahi wet äp niläthichet honhat, wet äp nit'eka wet äp lajit leyalha.

₂₉Mat chik amel let'ukwe Lhawuk Dios, mälhewek ahusek lhäy'e atichunhayaj, lelhokhiyela. ₃₀Wet chik tajyäme nekchämis wet i'amejen ateläythayajay, wet m'ayhay tä äyteschehen tä oyämetso nichät amehen, letapinhiyela Lhawuk Dios wet lewohiyela lhämtes. ₃₁Tsi lham tä hap'altsentsaj ilehit'ala amejen, wet tek itäyhthila amel. Tek hip'ethathilahlä häp lhämet p'ante iwoyeje atetsel tä yop'antekwe, “Omatthichela olhämet.”

₃₂Wet Moisés äp yok:

Chik lewatläk lehanej chik matche Lhawuk lhämettso, lhek tichunch'oye ifwalas p'ante kamaj ka'ewachehen, tälhe tä Dios yenlhi p'ante hin'o. Ätshane nilhokej wichi tä i'pe honhat chik iche p'ante ifwala tä lhamel hiw'en wok iläte m'ayhay tä häte iwoye m'ak tä wuj tä Lhawuk iwoyej amehen. ₃₃¿Hä iche p'iya wichi chik mälhyej iwoye ajchalis tä iläte Dios lepak tä yämlhi tä tumho itäj, wet n'ilahen? ₃₄¿Hä iche dios chik tachuma laka wichi tä iyej wichi iyhäj, wet hin'älit m'ayhay tä äyteschehen lhäy'e letetnhay tä wichi iseltejen, lhäy'e n'oka'tshayajay, lhäy'e lakhajyhayaj tä wuj, wet iwoye lechumtes tä lenhoch'ay ihi, mälhyej m'ak tä ajchalis hiw'en tä Lhawuk Dios tach'ote tä ihi Egipto? ₃₅Lhawuk ipäyne lhamel tähestso tä t'uhläk lhamel ihanej tä lham häpe Dios tä matche, ihichet'a elh. ₃₆Lham tahuyehen tä tumho pule, wet iläte t'at lepak tä yämlhi tä ichufwenej m'ak tä is chik iwoye. Wet ipäyne lhamel itätaj tä ihonhatena, wet iläte t'at lhämet tä tumho. ₃₇Lham ihumnhen atetsel, wet tatshupiye lhamel leles wet ifwayhtejen Egipto, häp tä isej lakhajyhayaj tä wuj. ₃₈Wet ithatej kanhi wichipej tä wujpey wet inu'pe lhamel, wuj tä takhajayhen, yämthilek lhamel ihiche laka honhates wet lhayen lewuhuya, mälhyej tä amel alhenay lewuhuya ifwalasna.

₃₉Tä mälhyejtso, hanayej wet tihiche ahusey tä Lhawuk häpe t'at Dios, Niyat tä ihi pule wet ihonhatena. Wet ihichet'a elh, ts'ilak lham. ₄₀Woye nilhokej lhämtes tä ow'en amhohen ifwalana, häpkhilek awit'äyhyaj newa amejen, lhäy'e ales tä lepes lheley, wet wujla'pe nekchämis chik lheyayhi honhat tä Lhawuk Dios hiw'enla amhohen pajla'tha tiyäj'attsiy.

₄₁Moisés tatshupiye tres hupuy tä tumej Jordán lhip elh tä hichä, ₄₂häpkhilek hin'o chik nhanahläk ilän elh tä kaletayhfwaya, ilethane wet yen lew'eta yämthilek õkniläna. ₄₃Häp hupuy tä lhey Beser tä i'pe chenaj lhip tä w'awulhchä tä ihi ts'anis, häp tä õhw'enhatej wichi tä letes Rubén. Wet wichi tä letes Gad õhw'enhatej hupuy tä lhey Ramot tä ihi Galaad. Wet lechowej wichi tä letes Manasés õhw'enhatej hupuy tä lhey Golán tä ihi Basán.

₄₄Häp täja Dios lechufwenyaj tä Moisés hiw'enho Israel lhayis, ₄₅lhäy'e lhämtes tä ifwenho wichi tä lhamel tälho Egipto ₄₆tä kamaj lhamel ihi tewok Jordán lhip tä tumej hichä, häp lakawayhi tä tatayhlä Bet-peor tä ihi honhat tä Amorreo lhayis laka rey kahonhat p'ante. Reytso lhey Sehón wet lew'et ihi hupuy tä lhey Hesbón. Wet Moisés lhäy'e Israel lhayis tä lhamel tälhe p'ante Egipto, häp tä lhamel ikalhi tä iwo laka'tshayajayej. ₄₇Wet Israel lhayis ihi t'at honhattso, lhäy'e honhat tä lewuk rey tä lhey Og tä äp lew'et ihi t'at Basán. Reyestso tä häpehen Amorreo lhayis lhamel lew'et Jordán lhip elh tä tumej hichä. ₄₈Wet honhattso tälhe Aroer tä iwhäye tewok Arnón lhip, pajtha nichäte chenaj tä lhey Sirión, tä äp õyen lheya Hermón, ₄₉wet imälhewek honhat tä ifwache Jordán lhip tä tumej hichä, pajtha nichäte Lewomekitaj Nosoy tä iwhäye chenaj tä lhey Pisga.