Israel lhayis ikalhi p'ante Og, rey tä ihi Basán
1Wet n'amel y'ekhen wet y'atiyäje honhat tä Basán. Matkat Og, rey tä ihi, yik, lhäy'e laka nifwotaj, yämthilek iwo laka'tshayaja n'amejen tä ihi Edrey. 2Wet Lhawuk tahuy n'oyej wet yok, “Yej nowaye niyattso. Tsi olham oyachaj ame, lhäy'e nilhok laka nifwotaj, lhäy'e laka honhat. Wet is chik letech'aynhiyeja Sehón, Amorreo lhayis laka niyat tä ihi Hesbón.”
3Wet mälhyejtso tä Lhawuk Dios tach'ot n'amehen yämthilek y'akalhi häp rey Og lhäy'e nilhok laka nifwotaj. Wet y'alänhen lhamel wet niwohit elh chik imälhehi. 4Häte y'akalhi nilhokej hupuy wet niwohit elh chik imälhehi. Tä nilhok hupuy tä y'awasthiche, iche sesenta, nilhok t'at honhat tä Argob tä rey Og lhayen niyatayej tä ihi Basán. 5Nilhokej häpehen hupuy tä takhajayhen, wet n'olafwey tä lep'otes lhäy'e lhip tä atoschephä, wet lepelis õhp'alkatejiche hal'äy tä õht'untejiche. Häte iche wujpey hupuy iyhäj tä newache n'olafwey tä lep'otes. 6Wet y'awasthiche t'at, wet y'ahämtej hin'ol, atsinhay, lhäy'e nä'tshas, mälhyej tä y'awoye tä ihi honhates tä lewuk rey Sehón tä ihi Hesbón. 7Tajlhama itshätäy tä y'atchuma, lhäy'e m'ayhay tä laha ihi tä lewuk lhatayhfwas.
8Wet mälhyejtetso tä y'akalhiche honhates tä lewuhuy Amorreo lhayis laka reyes tä lew'etes ihi Jordán lhip tä tumej hichä, tälhe tewok Arnón pajtha nichäte chenaj Hermón. 9Häp chenajna Sidón lhayis yen lheya Sirión, wet Amorreo lhayis yen lheya Senir. 10Y'akalhi nilhokej hupuy tä i'pe chenaj lhip tä w'awulhchä, imälhewek Galaad lhäy'e Basán, pajtha nichäte Salka lhäy'e Edrey, häp hupuy lhayis tä Og lhayen niyatayej tä ihi Basán. 11Häp rey Og tajlhamat lham tä imälhehi p'ante tä häpe Refaím lhayis elh. Lemäwet chinaj, hiw'en cuatro metros tä pitaj wet dos metros tä tsajo, wet kamaj iche t'at tä ihi Hup Lhokwetaj, Amón lhayis kahupuy.
Wichi tä letetsel Rubén lhäy'e Gad, lhäy'e lechowej häp wichi tä letes Manasés, õhw'enho lhamel honhat tä tewok Jordán lhip tä tumej hichä
12Häp honhat tä y'alhayen lewuhuya ifwalastso, ow'enho wichi tä tälhe letetsel Rubén lhäy'e Gad häp honhat tä tälhe Aroer tä iwhäye tewok Arnón lhip, pajtha nichätho lechowej chenhas tä ihi Galaad, lhäy'e hupuy. 13Wet lechowej wichi tä tälhe letes Manasés, ow'enho lhamel häp Galaad lhip tä imälhehi, lhäy'e imälhewek honhat tä Basán tä lewuk rey Og, lhäy'e imälhewek honhat tä lhey Argob, häp honhat tä wichi yen lheya Refaím lhayis kahonhat.
14Wet Jaír tä häpe wichi tä letes Manasés elh, lhayen lewuka häp honhat tä Argob pajtha nichäte lepes häp honhates tä Gesur lhäy'e Maaca. Wet yen lheya lham lhey häp honhat tä Basán, häp lhey Jaír Kahupuy. Wet lheytso kamaj häpe t'at tä lhey.
15Wet wichi tä letes Maquir, Manasés lhäs, ow'enho honhat tä Galaad. 16Wet wichi tä letes Rubén lhäy'e iyhäj tä letes Gad, ow'enho lhamel häp honhat tä Galaad tumej lhip elh wet tewok Arnón tumej lhip elh. Honhat tä ihi lechowejtso häp tä oyen lewuka lhamel, pajtha nichäte lechowej häp lakawayhi wet häp tä lepes. Wet tä tsajche nichäte tewok Jabok tä Amón lhayis kahonhat lepes. 17Häte ow'enho lhamel häp honhat tä ifwache tewok Jordán, tälhe lewomekitaj tä lhey Kineret tä tumej tafwojhiye, pajtha nichäte Lewomekitaj Nosoy tä tumej tapinhiye, häp honhat tä hap'alakpe chenaj tä lhey Pisga lhip tä tumej hichä.
18Wet ifwalastso ofwenho olhämet Rubén kawichi, lhäy'e Gad kawichi, lhäy'e lechowej Manasés kawichi. Oyok, “Amel Lhawuk Dios hiw'en amhohen honhatna wet alewuhuy t'at. Is chik nilhokej hin'ol tä ihanej tä iwo laka'tshayaja, iwo takwelheleya, wet is chik ichunlä lepuhfwas Israel lhayis chik yistho tewok Jordán. 19Tajlhama atsinhay lhäy'e nä'tshas, lhäy'e itshätäy tä wuj tä i'amejen, tä imälhehi honhatna tä ow'en amhohen, 20pajla'tha Lhawuk hiw'enho letamsek häp apuhfwas, mälhyej tä hiw'en amhohen, wet lhamel lhayen lewuhuya honhat tä lham hiw'enho lhamel tä tumej Jordán lhip elh. Wet chik wak'alh, is chik amel letapilaye honhatna tä ow'en amhohen.”
21Wet Josué pajche ow'enho olhämet tä oyok, “Am lew'en nilhokej m'ak tä Lhawuk Dios iwoyeje häp reyes Sehón lhäy'e Og. Mälhhiyejattso m'ak chik iwohiyejela n'oniyatyajay chik lenuhikwela. 22Yej nowaye lhamel, tsi Lhawuk Dios tach'otla amehen chik lewoyay aka'tshayaja.”
Lhawuk iwahnhiyejt'a Moisés chik tiyäjo Canaán
23Ifwalatso olhaip'altsene Lhawuk wet oyok, 24“Iwuk Dios, tälhe ifwalahte let'än n'oye, lewo tesa tä len'älit n'oyej awujyaj tä akawon'o, lhäy'e akhajyhayaj. Ihichet'a elh dios chik ihi pule wok honhat chik ihanej iwoyneje yämthilek yenlhi m'ayhay chik wichi iseltejen, mälhyej tä am lewoye. 25Olhaip'altsen ame, wahin n'oyej yämthilek oyistho tewok Jordán wet onchät lhip elhe. Tsi wuj tä ot'uhläk ow'en honhat tä wuj tä isilataj, häp chenhas tä isis lhäy'e Líbano.”
26Mat Lhawuk iti n'oyej lewäk, amel tä letamenay n'oyej, wet iwohiyet'a m'ak tä ot'alheje. Wet tahuy n'oyej wet yok, “¡Tajlhama! ¡Tek owatläk oläte täjtso! 27Mat ho'pe chenaj tä lhey Pisga lhip tä atojphä, wet yahnela tä tafwojhiye, lhäy'e tä tapinhiye, lhäy'e tä ifwala tälhche, lhäy'e tä ifwala y'uy. Mat Jordán tek lhisthihola. 28Fwenho Josué häp m'ak tä iwohiyela. Fwenho, is chik lhaikhajyen, tsi lhamlak lhayen lheteka häp wichi yämthilek lhamel lhayenla lewuhuya häp honhat tä lew'enhiyela.”
29Wet y'awo lhakasthawetahi häp lakawayhi tä tatayhlä Bet-peor.
