Ef 5

₁Tenay Dios, tä ahäpehen leles tä lehumnhay. ₂Wopej ahumnhayaja, mälhyej tä Cristo n'aihumnhen wet lhayachaje t'ilek lhatapehen, tä hätet iwoye m'ak tä õyachaje Dios tä õyen n'okhayajayej tä ikänitlhi t'at häp lham.

₃Mat n'okain'oyaj wok m'ak at chik häpe chik kok'aye, wok n'otkänyaj tä ni'isa, oyok, yej woyaye tähesna, wet yej lhenay ämeta, tsi ahäpehen Dios laka wichi. ₄Yej woye ämet chik len'äfwlhatejwethä aiyhäj, wok ämtes tä amukwehyaj wok ektshanyaj, tsi m'ayhaytso t'uhawethit'a amejen. Mat wopej graciasayej Dios. ₅Tsi lehanej t'at, elh chik iwo lakain'oyaja, wok iwoye m'ak tä kok'aye, wok alhaknhatsaj, lew'et ihihit'ala Cristo lhäy'e Dios Leniyatyaj. Tsi häp elh tä alhaknhatsaj, hätet iwoye chik yen häpeya laka dios m'ak tä nilhak'alch'oye. ₆Yej tach'ahuye elh chik häpe chik fwetaj ikänitlhi amejen lhämtes tä kamatachehen. Tsi häp m'ayhay tä oyämene, häp tä itone Dios lewäk wichi tä niwoyaye lham lhämtes. ₇Tä mälhyejtso, yej aletan'istej lhamel.

₈Ifwalas tä pajche amel ahusey ihi t'at honataj, mat athana tä lheyayej Lhawuk, ahusey ihi t'at isi. Wet häp tä oyok, Woyayepej m'ak tä t'uhawetej wichi tä häpehen isi leles, ₉tsi lhay tä wuj tä tälhe isi häpe n'o'isyaj, lhäy'e m'ak tä is alhoho, lhäy'e m'ak tä matche. ₁₀Ämay letäfwelej m'ak tä Lhawuk ihuminche. ₁₁Yej alet'aje wichi lakeyes tä najit lahaya tä tälhe honataj, mat n'älitpe. ₁₂Tek ot'uhläk oyäme m'ak tä lhamel weskatej tä iwoye, oyämhiyet'a, tsi on'äfwelhpe. ₁₃Mat nilhokej m'ak tä isi hin'älit, isiche t'at. ₁₄Wet häp tä õyok:

₁₅Tä mälhyejtso, uyayhlä wet tetshanay m'ak tä lewoye. Yej alhen isukisa mat äm ahusey ihi. ₁₆Wo kotsayej lewhäyna wet äm is m'ak tä lewoye, tsi ifwalasna isit'a. ₁₇Yej woye m'ak tä najit lahaya, mat äm matche tä let'uhläk letäfwelej Lhawuk lenech'ethayaj.

₁₈Yej alhen w'oknhasayej hat'es, tsi häp tä iwasthi wichi, mat ämpej tapokwe ahusey Espíritu tä Dios T'amajchet. ₁₉Ämejwethä amhomche salmos lhäy'e n'otenkay tä isen. Choywethä wet is chik ahusey iwunit Lhawuk. ₂₀Wopej graciasayej Dios Lhajcha nilhokej m'ayhay, häp tä isej Lhawuk Jesucristo.

₂₁Tä ahäpehen wichi tä itiyej lewujyaj Cristo, oyok, Is chik elh weihalhapej hätet iwoyek yen at lewuka häp elh.

₂₂Atsinhay tä hach'efwas ihi, en awuhuya hach'efwas, tech'aynej tä lhen at awuka häp Lhawuk. ₂₃Tsi atsinha lhetek t'at häp lech'efwa, mälhyet iwoye Cristo tä Dios leles lhetek. Häte Dios leles Lefwayhthi, tsi häpe lham t'isan t'at. ₂₄Tä mälhyejtso tä Dios leles yen Lewuka Cristo, häte atsinhay, m'ak at chik häpe chik iwoye, is tä yen at lewukayej lech'efwa.

₂₅Wet amel tä hin'ol tä hach'efwas ihi, humin hach'efwas, mälhyej tä Cristo ihumin Dios leles wet lhayachaje'pe t'ilek. ₂₆Häp täjtso tä iwoye yämthilek yen t'amajchetesa, häp tä isej Dios lhämet, wet ilejej inät tä ibautisaynej, ₂₇häpkhilek häpehen Dios leles tä isis chik lham itihi tä itayche, wet laj lech'ohleya, newache m'ak chik iyej, mat t'amajchetes t'at wet tek kok'ayehen.

₂₈Häte hin'o elhpej tä lech'efwa ihi, is chik ihumin lech'efwa, mälhyej tä ihumin lham t'isan. Tsi elh tä ihumin lech'efwa, lhaihumin t'at. ₂₉Ihichet'a elh chik häpe chik y'ulhan lham t'isan, mat ichunhan wet t'uye. Mälhyejtso tä Cristo iwoyeje Dios leles, ₃₀tsi häpe lham t'isan t'at, wet n'amel n'ahäpehen lhipey häp t'isantso. ₃₁Mälhyej tä Dios lhämet tä ihi Lehi yok, “Häp hin'o yikch'oye lajcha lhäy'e lako wet lhaip'ajtej lech'efwa, wet lhamel täkwfwasna hätet iwoyek hätefwajni.” ₃₂Mat lhek tetshan täja, oyok, iche m'ak tä tumchä tä ihi Dios lhämettso, wet olham otichunhayaj yok, yäme häp Cristo lhäy'e Dios leles. ₃₃Mat amel häte, is chik hin'o elh weihalhapej ihumin lech'efwa, mälhyej tä lhaihumin, wet atsinha is chik tek yen w'et m'ayeka lech'efwa.