Lhawuk ne'tek Israel lhayis yen t'amajchetayej häp n'ochunkatshay tä hin'ol
1Lhawuk tahuyej Moisés wet yok:
2–En amajcheta n'oyej n'ochunkatshay tä hin'ol. Tsi Olewuk t'at häp Israel leles tä lechunkatshay, lhäy'e leläy tä asnakis tä lechunkatshay.
Häp n'okäjyaj tä õtufw pan tä levadura newayej
3Moisés tahuyej wichi wet yok:
–Enaypeja atichunhayaja ifwalana tä amel lhekch'oye honhat tä Egipto wet nemhit ahäpehen Egipto lheley kwenkay. Tsi Lhawuk itonphä amel häp tä isej lakhajyhayaj tä wuj. Yej tufwa pan tä levadura iyej. 4Amel lhekhen ifwalana, häp iwel'a tä Abib. 5Lhawuk ifwenho p'ante ajchalis tä yok, “Kalelhäj olhämet, ow'enhihola ales lhäy'e achetsos häp honhat tä lewuk Canaán lhayis, Het lhayis, Amorreo lhayis, Hiv lhayis, lhäy'e Jebús lhayis.” Tä mälhyejtso, chik lechätaye honhattso tä t'os lhäy'e akäyek hätet iwoye inät, iläfwelchehen tä ihi, oyok, chik lechätayepej häp iwel'ana, 6is chik letufway pan tä levadura newayej pajla'tha siete ifwalas, wet häp ifwala siete lhen amajchetayej Lhawuk tä lewunit. 7Is chik siete ifwalas tä amel letufw pan tä levadura newayej. Wet honhat lhip chik häpe chik lheyayhi, yej t'amajeja levadura wok pan tä levadura iyej. 8Wet ifwalatso fwenhola äs wet lhok, “Tä owoye täja, häp tä oyen tichunhayaja m'ak tä Lhawuk iwoyejte n'oye tä itonphän'o tä otälho Egipto.”
9“Wet chik lewoye täjtso, hätehlat iwoye m'ak tä lhäytej akwey wok atacho, yämthilek kap'ethatahlä tä lhenpej ämeta Lhawuk lhämtes. Tsi lham tä itonphä amel tä letälho Egipto, häp tä isej lakhajyhayaj tä wuj. 10Häp tä tamenej tä is chik lhenaypej akeya tähestso nekchämpej nekchämpej, chik lechätaye iwel'ana.
Häpet n'ochunkatshay
11“Chik Lhawuk ihän amehen Canaán lhayis kahonhat wet hiw'en amhohen, mälhyej tä pajche ifwenho atetsel wet ifwel amhohen, 12is chik lhachaje Lhawuk nilhokej ales tä hin'ol tä achunkatshay lhäy'e aläy tä asnakis tä lechunkatshay. Tsi lham t'at tä Lewuk. 13Wet asno lhäs tä lechunkatsek tä asnak, is chik lhen lahayayej tson'ataj lhäs tä asnak wok kaylafwaj. Mat chik kawoya lahaya, is chik lenäk'äs lew'o. Häte is chik lewo t'awayhata Lhawuk tä lhen lahaya äs tä achunkatsek. 14Wet ifwalas tä tatay alhoho, chik äs tay'ätshan ame wet yok, ¿Atsi m'ak tä tamenej tä amel lewoyaye täja?, chulhola, olak, Lhawuk itonphähte n'amel tä n'ahäpe Israel lhayis tä y'ehi p'ante Egipto, häp tä isej lakhajyhayaj tä wuj, wet nemhit n'ahäpe Egipto lheley kwenkay. 15Tä Egipto kaniyat hit'unhat lehusek wet nit'uyahläk iwahintshi n'amel tä y'ekch'oye Egipto, Lhawuk ilänhen nilhokej Egipto lheley leles tä lechunkatshay lhäy'e itshätäy leles tä lechunkatshay. Häp tä tamenej tä olhamel olän itshätäy chunkatshay tä asnakis tä oyen n'okhayajayej Lhawuk. Häte owo t'awayhata, t'awayhat tä oyen lahaya oles tä ochunkatshay.
16“Tä mälhyejtso, tä lhenay akeya tähestso, hätehlat iwoye m'ak tä lhäytej akwey wok atacho, häpkhilek lhenaypej atichunhayaja tä Lhawuk itonphä n'amel tä n'ahäpe Israel lhayis tä y'ehi p'ante Egipto, häp tä isej lakhajyhayaj tä wuj.”
Israel lhayis inukwe len'äyij wet Dios iwo t'unfwaya
17Tä Egipto kaniyat iwahintshi Israel lhayis tä yikhen, Dios tek inuhatche n'äyij tä is alhoho tä tiyäje Filisteo lhayis kahonhat. Tsi yok:
–Elat Israel lhayis ihuminhit'a chik iwo laka'tshayaja chik iche wichik inuye. Mat elat lhamel t'uhläk yäple Egipto.
18Häp tä tamenej tä Dios inuhatche n'äyij tä inukwe ts'anis tä tiyäje Lewomekchät.
Tä Israel lhayis yikch'oye Egipto, hätet iwoye nifwotaj, lhamel ichäj laka'tshayajchal. 19Wet Moisés ichäj José lep'itsek. Tsi tä lham José kamaj iläy p'ante, ne'tek Israel lhayis hit'unhatche lhämet tä kalelhäj chik ichäjla lham lep'itsek chik lhamel yikch'oye häp Egipto. Wet häp tä ifwenho p'ante Israel lhayis wet yok:
–Matche tä Dios nämla amehen wet tach'otla amehen. Wet chik mälhhiyejatso, is chik amel lechäj op'itsek, yej n'äyla kana.
20Wet Israel lhayis yikch'oye p'ante Sukot, wet iwo lakasthawetahi Etam tä iwhäye ts'anis. 21Tä ifwala Lhawuk ichunlä lhamel tä ihi pule tä hätet iwoye tutsaj, wet lhamel ihän t'at tä yikhen. Wet tä honatsi puletso nech'e hätet iwoye itäj tä y'uho wet hin'älitpe lhamel. Wet häp tä lhamel yikhen t'at tä ifwala lhäy'e tä honatsi. 22Tä ifwala puletso yikhit'ach'oye Israel lhayis, wet tä honatsi hätet iwoye itäj tä y'uho tä hin'älitpe lhamel.
