Lhawuk ne'tek Israel lhayis yenlhi m'ak tä õyen lheya Pascua
1Lhawuk tahuyej Moisés lhäy'e Aarón tä lhamel ihi honhat tä Egipto, wet yok:
2–Häp iwel'ana is chik lhen häpeya iwel'a tä ichun tä ihi nekchäm. 3Fwenho nilhokej wichi tä Israel lhayis häp m'ak tä is chik lhamel iwoye. Chik nichäte ifwala tä diez häp iwel'ana, is chik elhpej tachuma tson'ataj lhäs wok kaylafwaj yämthilek lham lhäy'e lew'et lheley lhamel tufw chik nichäte lewhäy. Wok oyok, hin'o lhäy'e lew'et lheley w'enhayej itshäwet weihalha. 4Wet chik nintäkwa lhamel tä ihi lew'et, mat wuj itshäwet tä lhamel lhäk, is chik t'äne iyhäj tä lew'et iwhäye yämthilek lhamel tachufwiyejwek. Mälhyejtso tä is chik hiw'awlhat lhamhohen itshäwet tä lhamel tufw, yämthilek nimälheyahi lhip.
5“Is chik häpe itshäwet tä asnak tä hiw'en nekchäm weihalha, häp tson'ataj lhäs wok kaylafwaj tä isilataj tä newache m'ak chik iyej. 6Wet is chik wichi t'amajej pajla'tha nichäte ifwala catorce, häp iwel'a tä ichunna. Wet ifwalatso chik honaj is chik elh weihalhapej ilän. 7Wet lewukwe tä lhamel ichufwi tä t'ekhen, is chik y'ilenchehen itshäwet w'oyis lepe ch'utey lhäy'e tä tumphä. 8Honatsitso is chik lhamel tufw itshäwet t'isan tä hip'o, lhäy'e hal'ä w'oley tä tapay, lhäy'e pan tä levadura newayej. 9Yej tufw t'isan tä n'oya wok n'openek. Imälhewek t'isan is chik hip'o t'at, lhetek, takäläy, lhäy'e lakäsley. 10Wet yej t'amajej lhip chik imälhehi, mat wunho.
11“Wet uche haw'uyis, nayhtej amho niyäkw, wet wo anisäja, wet chäjilhi akwey häp atsut, wet kelit tä let'ekhen, tsi häpe t'at Lhawuk laka Pascua. 12Honatsitso onuhikwela imälhewek honhat tä Egipto, wet olänhihena nilhokej wichi tä n'ochunkatshay tä ihi, lhäy'e itshätäy leles tä lechunkatshay. Wet ottayhlahlä wet otihiyeja otasnhayaj nilhokej dios lhayis tä ihi Egipto. Ohäpe Dios tä matche. Häp täjtso olhämet. 13Wet itshäwet chik lelän, lew'oyis häpkhilek lhen atetnekayej awukwey tä lhechechufwi. Wet chik ow'enla itshäwet w'oyis tä let'ilenche hupe ch'utey, tek otiyäjlachufwi amel awukwey tä lhechufwi, häpkhilek laj awit'äyhyaja chik olänhen häp Egipto lheley. 14Wet is chik lhenaypej atichunhayaja ifwalatso, wet lhenay akäjyaja tä lewunitn'o tä ohäpe Awuk Dios. Yej leleyayej tä lhenay akeya, pajla'tha nichäte ales tä lepes lheley.”
Lhawuk ne'tek Israel lhayis yenlhi n'okäjyaj tä õtufw pan tä levadura newayej
15Wet Lhawuk äp yok:
–Is chik siete ifwalas tä letufway pan tä levadura newayej. Tälhe ifwala tä Pascua isit'ak let'amajayej levadura tä ihi haw'et. Elh chik häpek tufw pan tä levadura iyej tä kamaj ninofwaphä siete ifwalas, elhtso õ'sohiyeja tä iyej Israel lhayis. 16Wet häp ifwalatso is chik alehutaywek wet lhenay häpeya ifwala tä n'ot'amajchet, hätet iwoye ifwala tä siete. Wet täkwfwas ifwalastso yej tachumwethä. Tajlhama m'ak chik amel letufw tä lhenlhi amhohen.
17“Nekchämpej chik lechäte lewhäytso, is chik lhenaypej akäjyaja wet letufway pan tä levadura newayej. Enaypej atichunhayaja ifwala tä otonphä nilhokej amel tä lheyayhi Egipto. Yej leleyayej tä lhenay akeya, pajla'tha nichäte ales tä lepes lheley. 18Häp iwel'a tä ichun is chik tälhe ifwala catorce tä honaj chik lewo tesa tä letufw pan tä levadura newayej, pajla'tha nichäte ifwala veintiuno tä honaj. 19Wet yej t'amajej levadura chik ihi haw'et häp siete ifwalastso. Elh chik häpek tufw pan tä levadura iyej tä kamaj ninofwaphä siete ifwalas, õ'sohiyeja tä iyej Israel lhayis. Mälhhiyejattso lewit'äyhyaj hin'o, tej chik Israel wok hin'o tä w'enha lhamej. 20Tä mälhyejtso, yej tufw m'ak at chik häpek levadura iyej. Honhat chik häpek lheyayhi, chik lechätepej ifwalatso tufw pan tä levadura newayej.”
Moisés lhäy'e Israel lhayis lhamel yenlhi p'ante Pascua tä ichunpe honhat
21Wet Moisés iwo chenekaye nilhokej Israel lhayis tä thänhäy, ne'tek ihoye. Tä lhamel nichäte, Moisés ifwenho wet yok:
–Nilhokej amel Israel lhayis, elh weihalhapej hin'o is chik tachuma tson'ataj lhäs wok kaylafwaj, wet is chik ilän yämthilek lham lhäy'e lew'et lheley yenlhi Pascua. 22Wet tsäyho lehi häp lew'oyis, wet chumela hal'ä tä lhey hisopo lhachafwaj tä lew'ole ihi, wet uythola lew'oyis wet ilenchela awukwe lepe ch'utey lhäy'e tä tumphä. Wet isit'ak inuphä elh chik häpe tä ichufwi hup tä kamaj nin'äla'pe honhat. 23Tsi chik Lhawuk inukwe Egipto tä ilänhen n'ochunkatshay, hiw'enla w'oyis tä let'ilenche hupe lhipey, wet tek iwahnhiyejak ángel tä ilänhen wichi tiyäjchufwi awukwey.
24-25“Wet chik amel lechätho honhat tä Lhawuk hiw'enla amhohen, mälhyej tä pajche ifwel amhohen, yej leyeja tä lhen akeya tä lewujyen olhämettso. Chik nichätepej lewhäy, enlhi t'at täjtso, amel lhäy'e ales pajla'tha nichäte lepes lheley. Häp täjtso m'ak tä one'tek lewoye. 26Wet chik ales tay'ätshanej amehen m'ak tä tamenej tä lhenay akeya täjtso, 27chulhayhola wet lhok, Häp itshäwet tä õ'län tä Pascua, häp tä y'antichunejche tä Lhawuk ilänhen Egipto lheley, mat tiyäjihot'a Israel lhayis lewukwey tä ihi Egipto. Mälhyejtso m'ak tä iwoye tä n'aifwayhthen.”
Tä Israel lhayis iläte, t'upechehchä wet n'okwiyej Lhawuk. 28Tä ileyej, yäpnhomche lew'etes wet iwoye nilhokej m'ak tä Lhawuk ifwenho Moisés lhäy'e Aarón tä ne'tek lhamel iwoye.
Y'inhen n'ochunkatshay
29Tä honatsi chowej Lhawuk ilänhen Egipto lheley chunkatshay. Ichun niyat lhäs tä ihi len'ohyaj, pajtha nichäte iyhäj tä ihiche n'op'onthi leles, lhäy'e itshätäy leles tä lechunkatshay. 30Wet Egipto kaniyat nephä honatsitso, lhäy'e leniyatfwas, lhäy'e nilhokej wichi iyhäj tä ihi Egipto, wet wuj n'olhafwyhayaj tä ihi. Ihichet'a tefwajni hup chik newache elh tä y'il tä ihi.
31Wet tä kamaj honatsi niyat t'äne Moisés lhäy'e Aarón wet tahuyej wet yok:
–¡Mähen, mäch'oye oka honhat, amel lhäy'e nilhokej Israel lhayis! ¡Mähen wet n'okwiyayej Awuk Dios, mälhyej tä let'uhläk lewoyaye! 32¡Chäj aläy tä let'uhläk lechäj wet mähen! Wet alhyenay n'oye Dios.
33Wet Egipto lheley ne'tek Israel lhayis nakelchetshi wet yikch'oye laka honhat. Tsi lhamel yok:
–¡Chik ka'ekahen amel, nilhokej olhamel onofwila!
34Wet Israel lhayis itonphä harina tä lhamel ilhethiche tä levadura newayej. Wet imälhthiche lehis wet ikäfwnhiche wesas wet tilhäj. 35Wet iwoye m'ak tä Moisés ifwenho lhamel, t'alheje Egipto lheley m'ayhay tä oro lhäy'e tä plata, lhäy'e lew'uyis. 36Wet Lhawuk takäpfwayeje lhamel yämthilek Egipto lheley nemhit yen w'et m'ayeka wet tek n'äyej m'ak tä Israel lhayis t'alheje lhamel. Mälhyejtso tä Israel lhayis isoyej m'ak tä lewuk Egipto lheley.
Israel lhayis yikch'oye Egipto
37Israel lhayis yikch'oye Ramsés wet tiyäje honhat lhip tä lhey Sukot. Iche seiscientos mil (600.000) hin'ol, häte iche atsinhay lhäy'e nä'tshas. 38Wet iche wujpey wichi tä w'enhache lhamej tä kahäpeya Israel lhayis, wet wujpey w'asetas, tson'atas lhäy'e kayla lhayis. 39Wet lhamel tachuma harina tä ilhethiche tä itälhte Egipto wet yenlhi pan tä levadura newayej. Tsi tä Egipto lheley yokwes lhamel, wet letamsek ihiyejit'a tä iwaklhat lhäk wok yenlhi pan tä levadura iyej.
40Cuatrocientos treinta (430) nekchämis tä Israel lhayis ihi p'ante Egipto. 41Wet tä nichäte p'ante cuatrocientos treinta (430) nekchämistso, ifwalatso nilhokej Lhawuk laka wichi yikch'oye Egipto, mälhyej at iwoye nifwotaj. 42Honatsitso Lhawuk t'amajej t'at laka wichi tä lham itonphä tä tälho Egipto. Tä mälhyejtso, nilhokej Israel lhayis yäk nichäte leles tä lepes lheley, is chik t'amajej t'at honatsitso wet nimäyahen, yämthilek yen t'amajchetayej Lhawuk.
N'okeyis tä ihi Pascua
43Lhawuk tahuyej Moisés lhäy'e Aarón wet yok:
–Häp täja n'okeyis tä ihi Pascua: Hin'o tä kahäpeya Israel isit'ak tufw itshäwet tä õ'län tä Pascua. 44Mat häp elh tä n'okwenek tä n'ochäjek, chik pajche ikatej n'otetnek tä õyiset lho t'äj lhip, häp tä is chik tufw itshäwet. 45Mat hin'o tä w'enha lhamej tä häpe asiyak, wok lechumet tä tamenej tä iyej Israel lhayis, isit'ak tufw itshäwet. 46Wet chik letufway itshäwet, ewayhi awukwe. Isit'ak lehänej kanhi lhip itshäwet tä lelän. Häte isit'ak lenäk'äsen lhiley.
47“Is chik nilhokej Israel lhayis yen keya tä yenlhi Pascua. 48Mat oyok, Chik iche hin'o tä i'amejen tä kahäpeya Israel, wet t'uhläk tachufwi amejen tä Pascua yämthilek iwunitn'o tä ohäpe Lewuk Dios, chunkat is chik õ'woyeje nilhokej hin'ol tä ihi lew'et n'otetnek tä õyiset lho t'äj lhip. Wet chik iwoye täjtso, nech'e häp tä is chik tachufwi amejen, tsi nech'e hätet iwoyek nichäthihchä amel aka honhat. Mat oyachajo tä oyok, Elh chik n'otetnek tä õyiset lho t'äj lhip newayej, isit'ak tufw itshäwet tä õ'län tä Pascua. 49N'okeytso y'aje amel tä ahäpe Israel lhayis lhäy'e wichi tä kahäpeya tä i'amejen.”
50Israel lhayis iwoye nilhokej m'ak tä Lhawuk ifwenho Moisés lhäy'e Aarón tä ne'tek lhamel iwoye. 51Häp ifwalatso Lhawuk itonphä wichi tä Israel lhayis tä tälho Egipto, mälhyej at iwoye nifwotaj.
