Ezeq 14

₁Nämhen hin'ol tä thänhäy tä tälhe Israel lhayis, lhamel iho n'oye, t'uhläk oty'ätshane Lhawuk. ₂Wet Lhawuk tahuy n'oyej tä yok:

₃–Hin'o, häp hin'olna lhamel lhayachaje lecheyälis wet lhaimenyenej wet nichätho lech'isukyaj. ¿Hä owohiyela tä lhamel tay'ätshan n'oye? ₄Olham tä Olewuk Dios fwenho lhamel olhämet tä oyok, “Häp Israel lhayis elh chik häpe tä lhayachaje lecheyälis wet lhaimenyenej wet nichätho lech'isukyaj, wet athana ihoye oka profeta, t'uhläk ifwenho m'ak tä nhanayej, oyethiyela'pe lecheyälis wujpey. ₅Wet ot'änhiyela nilhokej häp Israel lhayis tä yik n'och'oye tä ihänlhi lecheyälis.” ₆Olham tä ohäpe Lewuk Dios fwenho lhamel olhämet tä oyok, “Wo ahusey iyhäja wet leyayej acheyälis. Tapilay n'oye wet leyayej nilhokej häp akeyis tä on'äyi amho'pe.

₇“Chik iche häp Israel, wok hin'o tä kahäpeya Israel tä iyej lhamel, chik lham ile n'oyej wet lhayachaje n'ocheyälis, wet lhaimenyenej wet nichätho lech'isukyaj, wet chik iche m'ak tä nhanayej wet ihoye häp profeta, häp tä tay'ätshan n'oye, olhamlak onchulho. ₈Ottayhlahlä häp hin'o tä mälhyejtso m'ak tä iwoye, wet oyenla tetnekayej otasnhayaj tä otiyej häpkhilek nilhokej wichi tä yämejwethä. Wet osohiyeja tä iyej oka wichi, wet häp tä nech'e amel lehanhiyeja tä ohäpe Awuk Dios.

₉“Wet chik profeta yen lhämeta m'ak tä kamatache, häp tä olham tä ohäpe Awuk Dios olham tä okanej häp profetatso, häp tä tamenej tä yäme m'ak tä kamatache. Wet otasnhila wet äp osohiyeja tä iyej oka wichi Israel lhayis. ₁₀Hin'o lhäy'e häp profeta tä tay'ätshane, lhamel tan'isichelawek, otasnhila'pe lech'isukyajay, ₁₁häpkhilek Israel lhayis nemhit ilehla n'oyej wet nemhit lhaikokyeneje häp lakeyistso. Wet lhamel häpkhila oka wichi wet olham ohäpkhila lhamel laka Dios. Olham tä ohäpe Lewuk olhämet täja.”

₁₂Wet Lhawuk tahuy n'oyej wet yok:

₁₃–Hin'o, chik iche wichi tä ihi honhat tä lew'et, wet lhamel iwo ch'isukyaja wet tatay n'ohlä, tek t'ifwti n'oyej, olham otasnhila lhamel, osohiyeja lhamel lhäk tä hiw'en wet ochenhiyela nehläs tä wuj, wet hin'ol y'inhihena, lhäy'e häp itshätäy. ₁₄Chik Noé lhäy'e Danel, lhäy'e häp Job, lhamel ihiyejn'e wichi tä ihi honhattso, ts'ilakhin'et tres lhamelna chik tafwayhihenn'e, häp tä is m'ak tä lhamel iwoye. Olham tä ohäpe Lewuk Dios olhämet täja.

₁₅“Wet chik ochenhiye itshätäy tä fwitses häp honhattso, wet ilänhihenn'e wichi pajin'e'tha nofwej, wet nech'e ts'anisin'e t'at, wet nehiche hin'o chik häpe chik ilunhilhi, häp itshätäy tä fwitses tä tamenej, ₁₆chik mälhyejtso, chik tres hin'oltso ihiyejn'e wichi tä ihi honhattso, wet tek ifwayhthihenn'e leles. Ts'ilakhin'et lhamel chik tafwayhen, wet honhat nech'e ts'anisin'e t'at. Olham tä ohäpe Lewuk Dios tä n'ilataj häp täja olhämet tä matche.

₁₇“Wet chik ochenhiye n'oka'tshayaj häp honhattso, wet one'thin'ek õ'länhen hin'ol lhäy'e häp itshätäy, ₁₈chik tres hin'oltso ihiyejn'e wichi tä ihi honhattso, wet tek ifwayhthihenn'e leles. Ts'ilakhin'et lhamel chik tafwayhen. Olham tä ohäpe Lewuk Dios tä n'ilataj häp täja olhämet tä matche.

₁₉“Wet chik ochenhiye äytes häp honhattso, häp owäkw tä owoye, wet y'inhihenn'e wichi lhäy'e häp itshätäy, ₂₀chik tres hin'oltso ihiyejn'e wichi tä ihi honhattso, tek ifwayhthihenn'e leles. Ts'ilakhin'et lhamel chik tafwayhen, häp tä is m'ak tä lhamel iwoye. Olham tä ohäpe Lewuk Dios tä n'ilataj häp täja olhämet tä matche.

₂₁“Olham oyok, Lhäy'ehila lhip chik ni'isa chik ochenhiyela Jerusalén cuatro lewit'äyhyajay tä hich'atej tä ni'isahen tä häpe n'oka'tshayaj, nehläs, itshätäy tä fwitses, wet äytes, häpkhilek ilänhen hin'ol lhäy'e häp itshätäy. ₂₂Mat ihichela iyhäjfwas wichi chik tafwayhen wet ichäjla leles wet yikhilach'oye Jerusalén. Wet chik iho amehen, wet amel lew'enla tä isit'a lhamel, wet häp tä nech'e lehanhiyeja häp m'ak tä tamenej tä otasin Jerusalén. ₂₃Chik lew'en lakeyis tä iwoye, wet häp tä lehanhiyeja tä khit'ak w'et owoyeje t'at owäkw Jerusalén. Olham tä ohäpe Awuk Dios olhämet täja.”