N'otenek tä õyen tichunhayaja Tiro lewit'äyhyaj
1Lhawuk tahuy n'oyej wet yok:
2–Hin'o, is chik leten häp wichi tä elh ileyej honhat letenek. 3Tsi is chik let'äyen häp Tiro, hupuy tä ihi n'äyhätetsel tä i'pe lewomekitaj, wet wujpey honhates iyhäj tä iche'pe lewomekitaj lhipey tä lhamel ichäjen häp lakäywet tä ifwelwethä. Is chik lefwenho olhämet Tiro tä lhok, “Dios tä matche yok,
“Tiro, am lefwetaj matche tä asilatyaj ihi.
4Häp honhatil tä lefwetaj aniyatej
pajtha nichäte t'at lewomekitaj chowej.
Hin'ol tä ayenlhihte aitech'aynej
barco tä lhäy'e lhip tä isilataj.
5Lhamel yenlhi amej häp hal'äy tä lhey ciprés
tä tälhe chenaj tä lhey Senir,
wet aka banderaw'ut häp tä yenejlhi
pänhichetek tä tälhe Líbano.
6Wet häp lechal tä õ'sekejlä inät
tä õyenejlhi häp hal'ätaj
tä tälhe honhat tä Basán.
Wet lhamel hip'o'pe ip tä tumchä
häp hal'äy tä ciprés tä tälhe honhat tä Chipre,
häp hal'äy tä lhamel y'ilenchehen häp elefante tsotey.
7Wet wesaj tä n'oyik
tä Egipto lheley lhenhay tä iwo lechala,
tä hin'oltso yäytejen häp lechinhas tä tälh atape,
häpkhilek aihuttshi chik leyalh tajo.
Wet häp tä äpte lhamel yen tetneka amej häp n'oyhiytso,
häpkhilek wichi tä atosehen hiw'en ame.
Wet elh wesaj tä ifwak'an lhäy'e tä ichät,
häp tä yen awukweya,
wet wesajtso itälhte honhat tä lhey Elisa lhipey.
8Wet Sidón lheley lhäy'e häp Arvad lheley,
lhamel yik achafwi tä iseklä inät,
wet hin'ol tä akawos tä barco lewos
tä wuj tä ihanej lechumet, häp tä yik amche.
9Wet häp hin'ol tä thänhäy tä Gebal lheley
wuj tä ihanej tä ayenlhi chik atwit'äy.
Wet barco lewos tä tälhe honhat chik häpe
iho ame tä ichäj m'ak tä lefwelwethä.
10Wet häp wichi tä lew'et Persia,
lhäy'e Lidia, wet lhäy'e häp Libia,
häpe aka sip'älis tä takhajayhen
tä iwo ka'tshayaja atape.
Wet ifwuhatwethä amhi
laka'tshayajchal tä hip'oyej letapehen,
lhäy'e häp lakawon'alis tä laka'tshayajchal,
wet matche tä lhamel iwo asilatyaja.
11“Häp hin'ol tä lew'et Arvad, lhäy'e häp am aka sip'älis, lhamel t'uye alafwek tä tuntey. Wet Gamad lheley häp tä t'uye hupuy tä iche'pe alafwek tä sip'älis lew'etes. Wet matche tä yen asilatyaja laka'tshayajchal tä ifwuhatchehchä tä itiche alafwektso.
12“Wet tä wuj akäywet, wet häp tä Tarsis lheley ihopej ame wet hiw'en amho lechinhas tä wuj tä laha ihi tä ithatlä m'ak tä i'amej.
13“Wet äpte Grecia, lhäy'e häp Tubal, lhäy'e Mesec, lhamel ifwelpej amho hin'ol lhäy'e häp bronce, t'uhläk ichäjej akäywet tä am lefwellhi.
14“Wet wichi tä lew'et Bet-togarma lhamel ithatlä yel'atas tä n'ochumyenhay, lhäy'e yel'atas tä n'owutey, lhäy'e mola lhayis, häp am akäywet tä lefwelwethä.
15“Wet wichi tä lew'et Rodas häp tä lhamel tach'ote akäywet tä lefwelwethä. Wet wichi tä ihiche honhates tä iche'pe lewomekitaj lhipey, tä nilhokej tä lhamel ichäjen akäywet tä lefwelwethä, wet lhamel ithatlä häp elefante tsotey lhäy'e hal'ä tä lhey ébano.
16“Wet häp Edom lheley wuj tä ichäj akäywet tä lefwelwethä. Ithatlä häp tuntey tä w'atshan tä matche tä isis, wet lhäy'e wesaj tä õ'pakej lecha tä yok fwam, lhäy'e n'oyhiy tä õ'wo lechala, wet lhäy'e häp wesaj tä isilataj tä õyenejlhi lino tä äpte õ'lesaynhiche, lhäy'e häp tuntey tä ichäthen tä isis, wet lhäy'e tuntey tä isathiche tä ichät.
17“Wet äpte Judá lhäy'e häp Israel lhayis, lhamel ichäjej akäywet häp trigo tä tälhe Minit, lhäy'e pasteles, wet akäyek, aceite, lhäy'e häp m'ayhay tä lenij akäjche.
18“Wet tä matche tä wuj häp m'ak tä lew'en, wet Damasco lheley ichäj akäywet tä lefwelwethä. Ithatlä hat'es tä tälhe Helbón, lhäy'e häp tson'ataj w'ole tä tälhe honhat tä lhey Sahar.
19“Lhamel itälhte Uzal häp hat'es, lhäy'e lechinaj tä pajche lhamel yenchelhi, lhäy'e canela, lhäy'e häp pinu, häpkhit'a akäyek, tä lenij akäjche, wet lhamel ichäjej akäywet tä lefwelwethä.
20“Wet häp Dedán lheley häp tä ichäjej yel'ataj howtes häp akäywet tä lefwelwethä. 21Wet Árabe lhayis lhäy'e nilhokej niyatey tä tälhe honhat tä lhey Kedar, häp tä lhamel ichäj akäywet tä lefwelwethä. Lhamel ithatlä häp tson'atas les tä pumfwetas, lhäy'e tson'atas tä hin'ol, wet lhäy'e häp kayla lhayis.
22“Wet häp wichi iyhäj tä lew'et Sabá, lhäy'e häp lhip tä lhey Tachettiche, tä lhamel äpte yen lechumeta tä ifwelwethä lakhäy. Lhamel ithatlä akäywet tä lefwelwethä häp m'ayhay tä lenij akäjche tä matche tä isis, lhäy'e tuntey tä laha ihi, wet lhäy'e häp oro.
23“Wet wichi tä lew'etes Harán lhäy'e Kané lhäy'e Edén, häp tä lechäjej akäywet häp m'ak tä lhamel ifwelwethä, lhäy'e m'ak tä Sabá lheley ifwel amho, lhäy'e Asirio lhayis, wet lhäy'e häp wichi iyhäj tä lew'et Kilmad. 24Wet am lechäj lew'uyis tä matche tä isis, lhäy'e wesas tä ifwak'anhen, lhäy'e n'oyhiy tä õ'wo lechala, wet lhäy'e n'oyhiy tä n'ot'äsawtes tä lechal w'enhahiche, lhäy'e häp niyhäy tä isis tä õ'fwinchehen.
25“Häp barcos tä wustas häp tä ichäj ame nilhokej m'ayhay tä oyämetso.
“Atemhaj iwoye barco tä nekche lewomekitaj,
achoyhat, wuj m'ak tä letalhunej.
26Häp hin'ol tä yik achafwi tä iseklä inät,
lhamel ihän ame lechowej häp lewomekitaj tä pitoj,
wet leyalh tä äytaji tä tälhe tä ifwala tälhche,
häp tä aiwasthi.
27Chik nichäthiyela lewhäy chik õ'ay'uythilahchä,
häp akäywet tä wuj tä lew'en,
lhäy'e laha tä wuj tä lekalhihlä
häp m'ak tä lefwelwethä,
wesila lech'oye häp lewomekitaj tä pitoj,
lhäy'e hin'ol tä barco lewos tä yik amche,
lhäy'e häp iyhäj tä lechumet tä ayenlhi chik atwit'äy,
lhäy'e aka wichi iyhäj tä lechumet tä ifwelwethä
häp akäywet tä lefwelwethä,
lhäy'e aka sip'älis tä n'oka'tshayajchal,
wet lhäy'e häp nilhokej wichi tä i'amhi.
28Wet lewomekitaj tä iwo lhetheya
nowayhiyela barco lewos
chik t'änhiyejawethä lhafwyhayajay.
29Wet iyhäj tä yikchufwi barcos tä iseklä inät,
lhamel inuhikwelahchä.
Wet nilhokhiyeja häp hin'ol
tä barco lewos tä yik amche,
lhamel wesila ufwey.
30Lhamel t'änlawethä tä ay'äyen,
wet matche tä äytajichela lhafwyhayajay.
Wet itsäyhichela'pe lhethey häp honhat,
wet nich'olehihilawethä häp mok'otaj.
31Wet am tä letamenhiyeja
chik lhamel yähäs lew'oley,
wet taw'uyhihichela wesas tä yelaj
tsi lhamel tesa amche,
wet tafwichelahchä tsi matche tä äytajichela
letichunhayajay tä ihiyejena.
32Lhamel itenla häp wichi tä elh ileyej honhat letenek,
tsi matche tä lhamel nitichunhila amche.
Wet yohlak,
Matche tä newache honhat chik õ'tech'aynej Tiro
tä ihipmhaji häp lewomekitaj lhip.
33Häp ifwalastso tä lechenepej m'ak tä lew'en
wichi tä ihiche honhatil iyhäj,
wet häp tä tamenej tä wujpey wichi tä lakäywet ihiche.
Tsi tä wuj m'ak tä lew'en tä matche tä laha ihi,
wet häp tä tamenej tä reyes tä i'pe honhat
hiw'en häp lakäywet tä wuj.
34Wet ifwalana tha lech'a wet awasi,
nech'e lhe lech'oye lewomekitaj tä pitoj.
Wet nilhokej häp m'ak tä alewuk tä letilhäj,
lhäy'e häp barco lewos tä yik amche,
lhamel tan'is at amej
tä let'uyhchä tä lhehi lewomekitaj.
35Wet nilhokej wichi tä ihiche honhates
tä ichehen lewomekitaj lhipey,
lhamel wuj tä inuhat lhamhohen
tä hiw'en awit'äyhyaj tä i'amej.
Wet nilhokej lhamel laka reyes
tä lenowayhyaj ichetpe tate'pelis.
36Wet wichi tä tälhe iyhäj honhates
tä lhamel yen chumeta häp lakäywet tä ifwelwethä,
lhamel inuhat lhamhohen tä hiw'en awit'äyhyajna.
Lhamel matche tä nowaye m'ak tä ni'isa tä i'amej,
tsi nemhit yachajohla chik lhehichela,
matche t'at tä attäy.”
