Ezeq 36

₁Lhawuk tahuy n'oyej wet yok:

–Hin'o, en ämeta olhämet tä ofwenho tachenhas tä ihi Israel lhayis laka honhat tä oyok, “Ch'ahuyaye olhämetna. ₂Olham ohäpe Awuk Dios. Häp Israel letayhfwas lhamel fwetaj lewuhuy t'at tachenhas tä tälhettsiy tä lewuhuy Israel lhayis. ₃Wet häp tä tamenej tä oyok, Hin'o, is chik lefwenho olhämet häp tachenhastso tä oyok, Olham ohäpe Awuk Dios. Wichi tä tälhomche nilhokej honhatil iyhäj tä lhamel iwo laka'tshayaja amejen, wet aiwasthiche wet lhayen häpeya amel awuhuy. Wet lhamel ailäkwiwethä wet matche tä iti amejen lhämtes tä ni'isachehen.

₄“Häp tä tamenej tä oyok, Ch'ahuyay n'oye, tachenhas tä lhehi Israel, lhäy'e akawayhil, lhäy'e tewok lhayis tä nekchehen akawayhil. Ch'ahuyay n'oye, hupuy tä nemhit wichi ihiche tsi häp tä atayhfwas aiwasthiche. Ch'ahuyay n'oye, honhates tä ts'anis t'at ifwalasna tsi häp tä wichi tä ihiche honhatil tä i'awhäyehen isohte amejen m'ak tä lew'en wet ayen läkwika. ₅Olham tä ohäpe Dios tä matche oyok, Owäkw tet iwoye itäj tä y'oho, wet owunhiyeja olhämtes tä äyteschehen häp wichi tä ihiche honhatil iyhäj. Wet häp iyhäj tä nem koyhyaj tä ottayhlä häpe t'at häp Edom lheley, tsi häp tä lhamel yente lakäjyaja tä lhayen lewuka olham oka honhat, wet ikänchi, wet tachuma nilhokej m'ak tä ihi.

₆“Wet häp tä oyok, Hin'o, en ämeta olhämet tä oyämeje honhat tä Israel. Wo silätayej tachenhas lhäy'e lakawayhil, lhäy'e tewok lhayis tä inukwehen lakawayhil. Fwenho olhämet tä oyok, Olham ohäpe amel Awuk Dios. Owoye olhämtes tä owäkw, tet iwoye itäj tä y'oho, tsi häp tä wuj tä amel leteläytej häp wichi tä tälhe iyhäj honhatil tä matche tä lhamel n'äyi amhomche. ₇Wet häp tä olham tä ohäpe Awuk Dios oyok, Oyämla matche tä wichi tä ihiche honhatil tä i'awhäyehen õn'äyihihomchela lhamel.

₈“Mat häp tachenhas tä ihi Israel, hal'äy tä wuschey tälhila'pe, wet yämla wuj lhay tä iwohiyela, häpkhilek amel tä oka wichi Israel lhayis äk ihi, tsi häp tä lewhäy tä lhäpnhiyela aka honhat. ₉Wet olham tä oihla amejen wet ot'uhla amehen, wet amel lesajihila honhat wet letutcheyhihena. ₁₀Wet oyämla wujpey amel tä aIsrael lhayis wet lhenla haw'eta honhat, wet hupuy tä atayhfwas iwasthichehte amel lhachajohla chik leneyhatchephä. ₁₁Matche, oyämla wujpey amel, lhäy'e itshätäy, wet wujlak lewo alesa. Wet yachajohlak lhen haw'eta honhat tä Israel, mälhyej iwoye ifwalas tä pajche, wet wujla m'ak chik lew'en, tafwayhlatpe akäywet tä pajche. Wet häp tä nech'e lehanhiyeja tä ohäpe Awuk Dios. ₁₂Amel tä ahäpehen oka wichi Israel, onachajila amehen aka honhat, häpkhilek lelunhilhi wet yachajo tä alewuhuyla. Wet honhat nemhit ihanhiyeja iwoyneja chik nitch'anlhaya amehen tä lewo alesa.

₁₃“Olham tä ohäpe Awuk Dios oyok, Wichi yäme tä honhat tet iwoyek tufwen wichi tä ihi, wet iwahnhiyejt'a lhamel chik iwo lelesa. ₁₄Häp tä tamenej tä oyok, Nemhit yachajohla chik tufwihena wichi, wet nemhit ihanhiyeja iwoyneja chik niwahnayej lhamel tä iwo lelesa. Olham tä ohäpe Awuk Dios olhämet täja. ₁₅On'äyhiyeja amhohen wichi tä ihiche iyhäj honhatil chik iyet amehen, wet nemhit leläthiyela chik ailäkwiwethä, wet honhat nemhit ihanhiyeja iwoyneja chik niwahna amejen tä lewo alesa. Olham tä ohäpe Awuk Dios olhämet täja.”

₁₆Lhawuk äp tahuy n'oyej wet yok:

₁₇–Hin'o, täjte Israel lhayis ihi lhamel laka honhat, wet ikänchiyej lakeyis tä ni'isahen häp honhat. Wet olham matche tä oy'ulhan lakeyistso, okokyene. ₁₈Wet häp tä tamenej tä otiyejte oka'tshayaj lhamel, tsi häp tä wuj iyhäj tä lhamel ilänhen tä ihi laka honhat, wet äpte ikänchiyej honhat tä lhamel n'okwiyej n'ocheyälis. ₁₉Wet häp tä otasinpe lhamel häp lakeyistso, wet ofwtsatkatpe honhatil iyhäj wet lhamel lhayej wichi tä w'enha lhamejen. ₂₀Wet nilhokej honhatil tä lhamel ihoyepej, lhamel tä tamenej tä wichi iläkwlhi olhey tä n'ot'amajchet. Wet wichi yopejkwe, “Häp täjtsi häp Dios tä N'owujtaj laka wichi, nemhit ihi Lewuk laka honhat.” ₂₁Wet matche tä olham olätpe olhey tä n'ot'amajchet tä Israel lhayis tamenej tä wichipej tä lhamel nichäte tä iläkwlhi.

₂₂Wet häp tä Lhawuk yok:

–Hin'o, is chik lefwenho Israel lhayis olhämet tä oyok, “Olham ohäpe Awuk Dios. Häp m'ak tä owohiyela, häpkhit'a amel tä Israel lhayis chik letamenej tä owoye. Mat olhey tä tamenej tä owohiyela m'ak tä owoye. Tsi häp tä amel letamenej tä wichipej tä lechäte iläkwlhi olhey. ₂₃Olham nech'e opäynhiyela wichi tä i'pe honhat tä olhey häpe häp n'ot'amajchet, tä amel letamenejpej wichi iläkwlhi. Wet häp tä nech'e lhamel ihanhiyeja tä olham tä ohäpe Dios tä matche, chik opäyne lhamel tä olhey häpe n'ot'amajchet. Olham tä ohäpe Awuk Dios olhämet täja. ₂₄Olham oaitonhichephäla tä lhehiche honhates tä kahaw'eta, oaihutlawek wet onachajila amehen honhat tä amel haw'et. ₂₅Wet otsäyhla atapehen inät tä isathi wet olejla amejen hach'ohle tä alekokyeneje acheyälis, lhäy'e nilhokej hach'ohle tä tälhe akey chik häpe. ₂₆Wet ow'enla amhohen ahusey tä nech'ayhis lhäy'e atichunhayaj tä nech'ayek. Wet osohla amejen ahusey tä t'unhen tä tet iwoye tuntey, wet ow'enla amhohen ahusey tä lehuminn'o häpkhilek lewoye nilhokej olhämtes tä ofwenhopej häp amel. ₂₇Wet otihla amhiche olham oka Espíritu, häpkhilek lehänlhi olhämtes lhäy'e ochufwenyajay wet lewoyaye. ₂₈Wet nech'e lhehihila häp honhat tä ow'enhohte achätilis, wet ahäpkhila oka wichi wet olham ohäpkhila aka Dios. ₂₉Wet ofwayhthila amejen nilhokej akeyis tä ikokyen amehen, wet otkäpfwayhiyela yachuyaj häpkhilek matche tä wuj tä lew'en, wet nemhit yachajohla chik ochenla amehen häp nehläs. ₃₀Wet otkäpfwayhiyela hal'äy tä i'pe honhat, lhäy'e yachuyajw'etes, häpkhilek yäm wuj lhay tä iwoye, wet nemhit yachajohla chik han'äfwlhi ihiche tä wichi iyhäj ayen läkwika tä anehläs länhay. ₃₁Wet chik letichunaych'oye akeyis tä ni'isahen lhäy'e hach'isukyajay tä lewoyepmhaji, len'äfwelhichehena tsi häpe akeyis tä hich'atej tä ni'isa. ₃₂Olham tä ohäpe Awuk Dios oyok, Khit'a tä owoye täja tä häp tä aisen. Mat olham t'at tä ow'en amhohen häpkhilek alet'ayhatchä wet len'äfwelhchehen hach'isukyajay tä lewoyayepmhaji.

₃₃“Olham tä ohäpe Awuk Dios oyok, Chik olejla amejen hach'isukyajay tä ikokyen amehen, wet häp tä nech'e yachajohlak lhehihichela honhates tä haw'etes, wet leneyhthichephäla hupuy tä wasiche. ₃₄Häp honhat tä õyente ts'anisa nemhit ts'anisla. Wichihlak häpe tä nekche honhattso hiw'enla tä yachuyaj ihi. ₃₅Wet lhamel yohlak, Lhek yahinya häp honhatmhaj ts'anisna, wet nech'e tet iwoye yachuyajw'et tä Edén. Wet häp hupuymhaj wasiche tä wichi newahi, nech'e wichi ihi wet lelafwek tä tuntey tach'opway. ₃₆Wet wichi tä kamaj iläyhen tä ihiche honhates tä i'awhäyehen, lhamel nech'e ihanhiyeja tä olham tä ohäpe amel Awuk onech'aynhiche häp hupuy tä wasiche wet yachajo tä otutcheyhi yachuyajw'etes tä wasichehte. Olham tä ohäpe Awuk ofwel amhohen olhämetna wet akalelhäj tä omatthichela.

₃₇“Wet olham tä ohäpe Awuk Dios oyok, Wet kamaj ihichela m'ak elh tä oyenhoplhi Israel lhayis. Ow'enhihola m'ak chik lhamel t'alhej n'oye, wet otkäpfwayhiyela lhamel häpkhilek tet iwoye tson'atas tä wujpey. ₃₈Häp honhatmhaj wasiche nech'e wichi tapohikwela, wet tehlat iwoye tson'atas mhaji tä õ'hänepej Jerusalén tä õyen otw'ayhata tä nichätepej lewhäy tä n'okäjyaj. Wet häp tä nech'e lhamel ihanhiyeja tä olham ohäpe Lewuk Dios.”