Ezeq 37

₁Lhawuk iti n'o'pe takwey wet laka Espíritu yik n'ochufwi, iti n'ohi honhat tä w'awulhchä tä ihi tachenhas chowej, tä nulis tä wichi lhiley tapoyej tä ihi. ₂Wet häp tä Lhawuk ilunkat n'okwe nilhokej häp lhipey tä nulis ihi, wet imälhewek honhattso tä wuj n'olhiley tä i'pe, wet matche tä tamchächehen. ₃Wet Lhawuk yäm n'oye tä yok:

–Hin'o, ¿hä lefwetaj n'olhileytsi yachajo tä iläyhihena?

Wet onchulho tä oyok:

–Iwuk Dios, am tä lehanej chik mälhhiyejatso.

₄Wet häp tä Lhawuk tahuy n'oyej tä yok:

–Hin'o, en ämeta olhämet tä ofwenho n'olhileytsi tä lhok, “N'olhiley tä tamchächehen, ch'ahuyaye Lhawuk lhämet ₅tä yok, Ow'enla amhohen haw'atshancheyaj häpkhilek yachajo tä leläyhen. ₆Ow'enla amhohen asätäy lhäy'e asanis, wet op'ohiyeja atapehen äj, wet ow'enla amhohen haw'atshancheyaj wet yachajihola tä leläyhen. Wet nech'e lehanhiyeja tä olham tä ohäpe Awuk Dios.”

₇Wet ofwenho lhamel Dios lhämettso. Wet tä kamaj oyämhoplhi t'at lhamel, wet oläte häp honhat w'ahu tä näm, lepak äytajiy. Wet häp tä n'olhileytso nech'e t'u lhamchehen wet elhpej ihi t'at lhip tä lew'et. ₈Wet tä oyahin, wet ow'en lesätäy tä näme lhamel, wet nech'e inuphä t'isanis, wet nech'e häp tä t'äj hip'o'pe lhamel. Mat kamaj lew'atshancheyaj ihihichet'a.

₉Wet häp tä nech'e Lhawuk tahuy n'oyej tä yok:

–Hin'o, en ämeta olhämet, änch'oye Espíritu, ok, “Espíritu, is chik lenäm tä letälhe honhat lhipey tä ihi cuatro tä leyalh lhayis tälhe, wet afwutpe häp n'olhileytsi häpkhilek yachajo tä lew'atshancheyaj ihiche.”

₁₀Wet ofwenho Espíritu häp Dios lhämettso. Wet näm Espíritu wet tiyäjo lhamel wet nech'e lew'atshancheyaj ihiche, wet nechephä wet takasthen, wet tet iwoye sip'älis tä wujpey.

₁₁Wet häp tä Lhawuk tahuy n'oyej tä yok:

–Hin'o, häp wichi tä Israel lhayis tet iwoye n'olhileyna. Lhamel yopej, “Matche tä tamchächehen ilhiley wet tatäy t'at lhaniwhayaj. Ihichet'a m'ak chik n'aisiyeja, y'attäy t'at.”

₁₂“Wet häp tä is chik lhen ämeta olhämet tä ofwenho lhamel tä oyok, Olham ohäpe Awuk Dios. Ofwoynhichehena amel hap'itseyhay lehis wet oainuhthichephäla. Wet onachajila amehen aka honhat Israel, tsi ahäpehen olham oka wichi. ₁₃Wet chik ofwoynhichehena hap'itseyhay lehis wet oainuhthichephäla, wet häp tä nech'e lehanhiyeja tä ohäpe Awuk Dios wet ahäpehen oka wichi. ₁₄Wet olham otihla amhiche oka Espíritu häpkhilek ailäythen, wet yachajo tä ohänla amehen häp honhat tä matche tä häpe amel aka honhat. Wet nech'e lehanhiyeja tä olham tä ohäpe Awuk olhämet täja wet omatitche t'at.”

₁₅Lhawuk äp tahuy n'oyej wet yok:

₁₆–Hin'o, chuma hal'ä wet lesayen, tihi “N'oniyatyaj tä ihi Judá”. Wet äp chuma hal'ä elh wet lesayen, tihi “N'oniyatyaj tä ihi Israel”. ₁₇Wet p'ajtitwek hal'äytso häpkhilek tet iwoyek weihalha tä ihi akwey. ₁₈Wet chik aiyhäj tä haw'etfwas yohlak, “Fwel n'ohohen m'ak tä yäme häp hal'äy tä lep'ajtitwek tä ihi akwey”, ₁₉wet fwenho lhamel olhämet tä oyok, “Olham ohäpe amel Awuk Dios. Olham otchumhiyela häp hal'ä tä Israel lhey ihi, lhäy'e elh tä Judá lhey ihi, op'ajthilawek häpkhilek weihalha tä ihi otkwey.”

₂₀“Wet is chik wichi hiw'en tä ihi akwey hal'äy täkwfwasna tä alesaynhay iche'pe. ₂₁Wet fwenho olhämet tä oyok, Olham ohäpe amel Awuk Dios. Olham otonhiphäla nilhokej häp Israel lhayis tä lhayej wichi iyhäj tä i'pe honhat, wet ohutlawek wet onachajiyela häp honhat tä matche tä lhamel lew'et. ₂₂Op'ajthilawek häp lhamel tä ihi honhattso häpkhilek weihalha, wet äp weihalha niyat tä iyej lhamel, wet nemla yachajo chik lhaiw'enhathen wet nemla yäm täkwfwas leniyatyaj. ₂₃Wet nemla yachajo chik lhaikokyenejehen lecheyälis tä on'äyihomche lhäy'e lakeyis tä matche tä ni'isahen. Ofwayhthiyejena lech'isukyajay tä lhamel tatayej n'ohlä wet olejla lech'ohle tä iyej lhamel. Wet lhamel häpkhihena oka wichi wet olham ohäpkhila laka Dios.

₂₄“Wet laka niyat häpkhila elh tä tet iwoye okawo David, wet ts'ilak lham tä t'uhiyehena lhamel, tehlat iwoye tson'ataswo, häpkhilek lhamel ihänlhi olhämtes lhäy'e ochufwenyajay wet iwoye. ₂₅Lhamel nech'e ihihila honhat tä ow'enhohte okawo Jacob, häp honhat tä lhamel lechätilis lew'et mhaji. Wet häp tä lhamel yenla lew'eta nilhokej nekchämis, lhäy'e leles, wet lhäy'e häp leles iyhäj tä ihichehena chik paj. Wet elh tä tehlat iwoye okawo David häp tä lajit lepesa tä lham t'at tä häpe lhamel laka niyat. ₂₆Olham oyenla oka wichiya häp lhamel, tsi häp tä ot'uhläk matche tä letamsekis ihiche. Wet ihichet'ala ifwala chik häpe chik olehiyeja tä oyen häpeya oka wichi. Wet otihiyeja okäpfwayaj lhamel häpkhilek t'aytshi wet wujpey lhamel. Wet lajit lepesa tä Owukwe tä Ot'amajchet iyej t'at lhamel. ₂₇Wet olham oihiyeja t'at lhamel, wet ohäpkhila laka Dios wet lhamel häpkhila oka wichi. ₂₈Wet chik Owukwe tä Ot'amajchet ihiyeja lhamel nilhokej nekchämis, wet wichi tä ihiche iyhäj honhatil ihanhiyeja tä olham tä ottshupiye häp Israel lhayis tä oyen oka wichiya wet oyen t'amajchetesa.”