Ezeq 39

₁Wet Lhawuk äp tahuy n'oyej wet yok:

–Hin'o, en ämeta olhämet tä otiyej Gog tä oyok, “Gog tä ahäpe elh tä niyatej Mesec lhayis lhäy'e Tubal lhayis, olham ohäpe Dios tä matche wet oayen otayhfwaya. ₂Oaitilhkathihila wet oyikhila achafwi, otälhthila ame haw'et tä matche tä atofwey tä tumej tafwojyhiye, wet ohänla ame tachenhas tä ihi Israel. ₃Onäk'äsila alutsej tä ihi akwey tä hats'amkat, wet häp hach'ähal tä ihi akwey tä afwomkat akwey istakhiyeja. ₄Wet õ'ailänla chik lhehi tachenhas tä ihi Israel, lhäy'e nilhokej häp aka sip'älis, lhäy'e wichi tä lhaip'ajtit amej tä tälhe iyhäj honhatil. Wet nilhokhiyeja häp afwenchey tä n'okotses tä w'enhahiche, wet lhäy'ehila itshätäy tä fwitses, lhamel tufwila amel asanis tä iche katsi ₅tä w'et ilhatpe honhat. Olham tä ohäpe Dios tä lhamya, olhämet täja wet matche. ₆Ochenhiyela itäj häp Magog lhäy'e wichi tä ichehen lewomekitaj lhipey tä niwohit m'ak chik lhamel yen lhakliya, matche tä letamsekis ihiche lhamel. Wet häp tä nech'e lhamel ihanhiyeja tä olham tä ohäpe Dios tä matche.

₇“Olham otäfwnhathiyeja oka wichi Israel häp olhey tä n'ot'amajchet. Wet nemhit otch'anlhahiyela wichi chik iläkwilhila olhey tä n'ot'amajchet. Wet häp tä wichi iyhäj tä w'enha lhamejen ihanhiyeja tä olham tä ohäpe Dios tä N'ot'amajchet tä Israel lhayis Lewuk. ₈Lhek tetshan olhämet, nämla t'at ifwala tä oyämetso, mathichela, w'et oyämhilhit'a. Olham tä ohäpe Dios tä matche olhämet täja.

₉“Chik nichäte ifwalatso, Israel lhayis tä ihiche lew'etes lhamel yikhiyela letayhfwas ka'tshayajchal wet yenlat lelhetesa. Hip'ohihena laka'tshayajchal tä hip'oyej letape tä w'enhahiche, lhäy'e lelutses, lhäy'e lech'ähal, lhäy'e laka etektas, wet lhäy'e lehunis, wet w'awulhiyeja siete nekchämis lelhetesna. ₁₀Wet nemla nilhak'alejlhi chik t'ukwe lelhetes, wet nemla yisthen hal'äy tä ihi tayhi, tsi häp tä lhamel yenlat lelhetesa n'oka'tshayajchaltso, häp tä ilhänhiyejila itäj. M'ak tä pajichela letayhfwas isoyej lhamel, nech'e lhamel tä äp isohiyeja. Olham tä ohäpe Dios tä matche olhämet täja.

₁₁“Wet chik nichäte ifwalatso, wet Gog olham ow'enhihola häp honhat lhiphaj tä ihi Israel häpkhilek õ'tihi lep'itsek. Häpe honhat tä w'awulhchä tä wichi tä asiykas len'äyhitaj tä ihi lewomekitaj lhip tä ifwala inuhiphä. Wet hip'ohihila asiykas tä ilunhen len'äyhitaj, tsi häp tä õ'tihiyeja nilhokej Gog laka sip'älis lep'itseyhay häp lham lep'itsek. Wet häp tä õyenla lheya häp Gog kasip'älis kahonhat. ₁₂Wet siete iwel'a lhayis tä Israel lhayis tajänlahlä lhamel, wet nech'e nofwiphäla tä õtjänchehlä, wet nofw häp m'ak tä kok'aye tä i'pe honhat. ₁₃Wet nilhokhiyeja häp wichi tä tajänchehlä lhamel lep'itseyhay, tsi häp tä oyenlat len'ohyaja lhamel. Wet häp ifwalatso on'älthila owujyaj tä in'oyej. Olham tä ohäpe Dios tä matche olhämet täja. ₁₄Wet chik tajyäme siete iwel'a lhayis, wet häp tä ochenla wichi tä oyen lewosa tä ilunche nilhokej honhat tä t'ukwe lep'itseyhay iyhäj tä imälhehi, wet häpkhilek lhamel tajänchehlä. Wet nech'e matche tä isila häp honhat, nofw lakokhayaj tä ihi. ₁₅Wet elh chik häpe häp wichi tä ilunche honhat, chik hiw'en elh häp n'olhile, is chik iwo letetnekayej häpkhilek wichi tä lewos tä tajänchehlä tä itihi Gog kasip'älis kahonhat, lhamel tajänhichelahlä tä itihi honhattso ₁₆häpkhilek is honhat, nofw lakokhayaj tä ihi. (Äpte ihichela honhat tä nitäkw hupuy tä ihi tä lheyla Sip'älis Kahonhat.)”

₁₇Wet Lhawuk äp tahuy n'oyej wet yok:

–Hin'o, äne nilhokej afwenchey lhäy'e itshätäy tä fwitses tä tälhe nilhokej lhipey, ok, “¡Lhuyay ahutwek, tufway äk tä wuj tä Lhawuk iwaklhat amhohen tä i'pe tachenhas tä ihi Israel! Letufwla häp t'isan wet leyähiyeja w'oyis. ₁₈Letufwla t'isanis sip'älis tä õ'länhen, wet leyähiyeja lew'oyis niyatey tä i'pe honhat. Lhamel tehlat iwoyek häpe tson'atas wok kayla lhayis tä õ'länhen, wok tehlat iwoyek häpe tolo les tä yätajen tä õ'länhen tä tälhe honhat tä Basán. ₁₉Chik Lhawuk ilänhen wichitso, letufwla häp t'alhä pajla'tha letshatejen wet leyähiyeja lew'oyis pajla'tha aw'oknhasej. ₂₀Wet Lhawuk iwaklhatla ahilähen häp yel'atas t'isanis, wet lhäy'e t'isanis wichi tä iche'pe yel'atas tä iwo laka'tshayaja, lhäy'e sip'älis t'isanis, wet lhäy'e nilhokej häp wichi tä n'oka'tshayajwos t'isanis, häpkhilek amel letufw pajla'tha matche tä lhipsejen. Olham tä ohäpe Dios tä matche olhämet täja.”

₂₁Wet Lhawuk äp yok:

–Häp tä mälhyejtso häp owujyaj tä opäynhiyela wichi tä w'enha lhamejen tä ihiche honhates. Wet lhamel hiw'enla okalelhthayaj tä häpe owäkw lhäy'e tä otasin lhamel. ₂₂Wet tälhe ifwalatso Israel lhayis nech'e ihanhiyeja tä olham tä ohäpe Lewuk Dios. ₂₃Wet äpte wichi iyhäj ihanhiyeja tä oyokwestech'oye Israel lhayis häp lhamel laka honhat tsi häp tä lhamel iwohte lech'isukyaja wet tatayhte n'ohlä. Wet häp tä tamenej tä ochäyi ithattehlä lhamel wet oyachaje letayhfwas wet ilänhen häp lhamel. ₂₄T'uhawetej t'at m'ak tä owoyeje, tsi lhamel lhaikänchiyej lakeyis tä ni'isa tä iwoyej lhamehen lhäy'e tä matche tä tatay n'ohlä. Wet häp tä tamenej tä ochäyi ithatlhihlä.

₂₅“Wet nech'e olham tä ohäpe Dios tä Israel Lewuk oyok, Athana op'altsenhihena nilhokej häp oka wichi Israel lhayis, tä häpehen häp Jacob leles. Wet owohla elha m'ak tä iyej lhamel, häpkhilek õhw'enho len'ohyaj häp olhey tä n'ot'amajchet. _26-27Onachajila alhoho lhamel tä ihiche honhates tä kalew'etesa tä lhamel iyej wichi iyhäj tä letayhfwas. Wet häp tä nech'e lhamel iwohlat letamsekisa tä ihi honhat tä matche tä lew'et, wet nemhit ihichela wichi chik istunlawethä häp lhamel. Wet häp tä mälhyejtso tä opäynhiyela wichi iyhäj tä ohäpe Dios tä matche tä N'ot'amajchet, häpkhilek nilhokej lhamel hiw'en. Wet Israel lhamel n'äfwelhichehena lakeyis tä tatayejte n'ohlä, wet yenla tichunhayaja. ₂₈Olham oyokwestech'oye laka honhat wet ochene lhamel häp wichi iyhäj tä w'enha lhamejen. Mat otonhichephäla lhamel wet onachajiyela häp honhat tä lhamel lew'et. Niwohit elhaj lhamel chik omälhthilahchä. Wet nech'e lhamel ihanhiyeja tä ohäpe Lewuk Dios. ₂₉Wet nemla ochäyi ithatlä oka wichi Israel, mat otsäyhla'pe lhamel häp oka Espíritu. Olham tä ohäpe Lewuk Dios olhämet täja.”