Ezeq 38

₁Lhawuk tahuy n'oyej wet yok:

₂–Hin'o, lhek tilhake häp honhat tä lhey Magog wet en ämeta olhämet tä otiyej Gog, häp elh tä niyatej wichi tä Mesec lhayis lhäy'e wichi tä Tubal lhayis. ₃Fwenho olhämet tä oyok, “Gog tä ahäpe elh tä niyatej Mesec lhayis lhäy'e Tubal lhayis, olham ohäpe Dios tä matche wet oayen otayhfwaya. ₄Oaitilhkathihila, otihihila hak'aj häp onichäte wet oaitonhiyeja kanhi, lhäy'e nilhokej aka nifwotas tä wujpey, lhäy'e yel'atas, lhäy'e sip'älis tä iche'pe yel'atas, tä pajche iwaklhathen laka'tshayajchal tä hip'oyej letape tä w'enhahiche, lhäy'e lefwajnhates. ₅Wet lhamel yikhihena, wet iyhäj tä tälhe Persia yikhichela lhamel, lhäy'e iyhäj tä tälhe Etiopía, lhäy'e tä tälhe Libia. Wet nilhokhiyeja häp lhamel tä lhetekp'otes ihi, lhäy'e m'ak tä hip'oyej letape. ₆Wet lhäy'ehila nilhokej sip'älis tä tälhe honhates tä lhey Gomer lhäy'e Bet-togarma, matche tä lhamel lew'et atofwey, tälhe honhates tä itafwojyhiye, lhäy'e häp wichi tä wujpey tä lhaip'ajtej lhamel.

₇“Is chik alewaklhat, wet waklhat nilhokej aka sip'älis tä i'amej wet a'en niyatayej lhamel. ₈Chik tajyäme wujpe nekchämis, wet ihichela olhämet tä ochen ame, wet häp tä lenuhiyela honhat tä letayhfwas itiyejte laka'tshayaj häp wichi tä ihi. Lhamel pajche ifwtsatpehen honhates, lhayej t'at wichi iyhäj, wet laka honhat Israel ts'anis mhaji. Mat chik paj wet yachajohlak lhamel ihi honhat tä lew'ettso, tsi häp tä otonhichephäla lhamel tä iyej wichi iyhäj, wet nech'e nilhokej lhamel tä letamsekis ihi. ₉Wet chik lechäthiyela honhattso, wet atehlat iwoye pelhay tä näm tä pule tä wuj nekche, am lhäy'e aka sip'älis, wet lhäy'e häp wichi iyhäj tä wujpey tä lhaip'ajtit amej, wet lep'ohlatpe häp honhattso.

₁₀“Olham tä ohäpe Dios tä matche oyok, Chik nichäte ifwalatso, wet lhenhilhila atichunhayajay tä matche tä ni'isa ₁₁wet lhohlak, Olham onuhiyela häp honhat tä laj lelafweka wet wichi tä ihi lhamel iwot letamsekisa, lajit lenowayhyaja, wet laka hupuy lajit lelafweka wet äp lajit lepe p'otesa. ₁₂Wet lhohlak, Olham osohla honhattso wet otchumhiyela nilhokej m'ak tä häpe n'okäywet tä ihi. Wet äp onuhiyela hupuy tä pajichela õyenchelhi tä wichi tä õ'tonhichephäla tä tälhe iyhäj honhates tä häp tä lhamel yenla lew'eta. Häpe wichi tä hiw'enla leläy lhäy'e iyhäj lakäywet, wet honhat tä lhamel ihi häpe honhat lechowej. ₁₃Häp Sabá lheley lhäy'e Dedán laka wichi, lhäy'e wichi tä tälhe Tarsis lhäy'e wichi lew'etes tä atott'ahomche tä lhamel yen lechumeta tä ifwelwethä häp lakäywet, lhamel tay'ätshanhila ame, yohlak, ¿Hä lefwetaj leso häp Israel lhayis kahonhat? ¿Hä lehutwek aka sip'älis häpkhilek letachuma Israel lhayis lakäywet? ¿Hä letachumhiyela laka oro lhäy'e laka plata, lhäy'e leläy, lhäy'e nilhokej häp m'ak tä wuj tä hiw'en, häpkhilek lehäne haw'et?”

₁₄Wet Lhawuk äp tahuy n'oyej wet yok:

–Hin'o, en ämeta olhämet tä ofwenho häp Gog wet oyok, “Olham ohäpe Dios tä matche. Chik nichäte ifwalas tä oka wichi Israel letamsekis ihi, am alekhajyenla ₁₅wet letälhiyela aka honhat tä matche tä atofwey tä itafwojyhiye, äy'ehila nifwotas tä takhajayhen tä wujtaj'atpey tä iche'pe yel'atas tä laka'tshayajchal. ₁₆Wet lenuhiyela oka wichi Israel, atehlat iwoye pule tä wuj, lep'ohla'pe honhat. Chik nichäte lewhäy ifwalas tä lepes, ochenla ame häpkhilek lenuye oka honhat, wet nech'e wichi tä ihiche honhatil iyhäj nitäfwenhila n'oyej. Wet oayenla lewoya m'ak tä olham owoye, tsi häp tä opäynhiyela wichi tä ohäpe Dios tä matche tä N'ot'amajchet.

₁₇“Olham tä ohäpe Dios tä matche oyok, Am tä oyämte ame häp ifwalas tä pajche tä oyämyenejtewethä okawos tä Israel lhayis laka profetas, tä amälhhiyejatna tä oaineyhthiphäla häpkhilek letatayhlä häp Israel lhayis.

₁₈“Olham tä ohäpe Dios tä matche oyok, Chik Gog inuhiyela häp honhat tä Israel, wet olham owunhiyejola owäkw tä äytajche. ₁₉Matche, owäkw tehlat iwoye itäj, wet häp tä oyäm kalelhäj tä oyok, Chik nichäte ifwalatso, ihichela häp honhat w'ahu tä äytajiy tä ihi Israel. ₂₀Wet häp w'ahat lhayis, lhäy'e afwenchey, lhäy'e itshätäy, lhäy'e m'ayhay tä lhaitonchehen honhat, wet lhäy'e nilhokej häp wichi tä i'pe honhat, lhamel tachetteyhiyejchehena lenowayhyajay. Wet tachenhas nichäthichela kanhi wet wasihichela, wet nilhokej n'olafwey tä tuntey nichätla kanhi. ₂₁Olham owohla oka'tshayajayej Gog chik ihi oka honhat, wet häp tä nech'e laka sip'älis lhamenla t'at chik lhailänhen. Olham tä ohäpe Dios tä matche olhämet täja. ₂₂Wet otasnhila häp Gog, wet ochenhiyela äytes wet t'ilek matche tä tanhoch'ayhla. Wet ochenhiyela pelhay, wet wujla inät tä iläfwelchehen, lhäy'e häp kalatu, wet itäj lhäy'e azufre, wet ochätyenla'pe häp Gog, lhäy'e laka nifwotas, wet lhäy'e häp wichi tä wujpey tä lhaip'ajtej tä tälhe iyhäj honhatil. ₂₃Wet häp tä wujla'pey wichi chik hiw'en tä ohäpe Elh tä N'ot'amajchet lhäy'e tä lewujyaj ihi. Wet lhamel nitäfwenhila n'oyej wet ihanhiyeja tä ohäpe Dios tä matche.”