Gén 20

₁Abraham yikch'oye p'ante honhat tä ihi, wet ihoye ts'anis tä lhey Négueb wet yen lew'eta hupuy tä lhey Gerar, häp hupuy tä Kadés tumej lhip elh wet Shur tumej lhip elh. ₂Wet tä ihi honhattso, ifwenho wichi tä lech'efwahit'a häp Sara, lech'inhä t'at. Tä mälhyejtso, Abimelec, niyat tä ihi Gerar, ne'tek lakawos yike Sara yämthilek lham yen lech'efwaya. ₃Matkat honatsitso Abimelec lefwilhek iche tä Dios tahuyej tä yok:

–Let'inla, tsi atsinha tä letachuma lech'efwa ihi.

₄Matkat tä lham niwoya m'ak chik iwoyeje Sara, nichulho Dios wet yok:

–Iwuk, ¿hä let'uhläk lelän hin'o tä niwoyaye m'ak tä ni'isa? ₅Abraham lham t'at tä ifwel n'oho tä lech'inhä t'at atsinha. Häte lham atsinha yäme tä lechila t'at. Wet häp tä oyenek matche wet tamenej tä otchuma. Ihichet'a m'ak chik ni'isa chik owoye.

₆Wet Dios nichulho tä ihi lefwilhek wet yok:

–Ohanej t'at tä lhenek matche m'ak tä õ'fwel amho wet häp tä lewoye täjtso, wet äp tamenej tä olham otch'anlhahit'a ame wet tek leyatchen atsinha, yämlek lajit atesa n'ohlä. ₇Mat athana achaje lech'efwa häp hin'otso, tsi lham häpe profeta wet ay'alhyenlan'o ame häpkhilek kat'ila. Mat chik ka'achajaye, am lhäy'e haw'et lheley y'inhihena.

₈Tä mälhyejtso, tä nech'e fwamlafwaj Abimelec nephä wet t'äne lakawos wet ifwenho häp lefwilhek. Tä lhamel iläte, wuj tä lenowayhyaj ihi. ₉Wet Abimelec t'äne Abraham wet tahuyej tä yok:

–¿Atsi m'ak tä ni'isa tä owoyej ame yämlek lechätyen o'pehen owit'äyhyaj? ¿Chipte tä leton n'o'pe och'isukyaj tä wuj, lhäy'e oka wichi? ¡Lewoye m'ak tä nit'uhaweta amej chik lewoye! ₁₀¿Atsin'aj atichunhayaj tä häpe tä lewoynejetso m'ak tä lewoye?

₁₁Abraham nichulho wet yok:

–Otichunhayaj oyonajkwe, “Wichi tä ihi honhatna newache lenowayhyaj chik itiyej Dios. Lhamel imenyenla n'oyej och'efwa wet tachumhiyela wet ilänlan'o.” ₁₂Mat oyok, matche t'at, och'inhä t'at, tsi ojcha tä lhäse. Mat lakohit'a oko, w'enha lhamej lako, häp tä tamenej tä oyen och'efwaya. ₁₃Wet tä Dios ne'tek oyikch'oye ojcha lew'et, ofwenho lham atsinha tä oyok, “Is chik lewoye tä owoye. Honhat chik häpe chik y'anchätho, is chik lhok, Ochila.”

₁₄Tä mälhyejtso, Abimelec yachaje Abraham lech'efwa Sara, wet yen t'awayhata tson'atas, w'asetas, lhäy'e lakawos tä hin'ol lhäy'e tä atsinhay. ₁₅Wet yok:

–Owahin amej oka honhat. Tetshan lhip chik lehumin chik lhen haw'eta, ehi t'at.

₁₆Wet äp tahuyej Sara wet yok:

–Lhek yahinya, ow'enho achila mil chinaj t'äj yämlek nittäya tä wichi tä i'amej ayen lhämeta tä ahäpe atsinha tä is, wet nehit katsik yäm ame chik fwetaj ates ihi.

₁₇Tä mälhyejtso, Abraham y'alhyene Dios Abimelec, wet ichesat, lhäy'e lech'efwa, lhäy'e lakawos tä atsinhay, yämlek iwo lelesa. ₁₈Tsi Sara tä tamenej tä Dios tek iwo lelesa atsinhay tä ihi Abimelec lew'et.