Gén 21

₁Lhawuk yen tichunhayaja Sara wet yäm matche lhämet tä pajche ifwenho. ₂Tä Abraham häpe hin'o tä wuj tä hich'ut, wet nech'e hich'otshan Sara. Wet tä nichäte p'ante lewhäy tä Dios yok, “Häp lewhäytso häpkhilek lewohla äsa”, wet matche t'at, nichätchä lhäsaj. ₃Wet Abraham yen lheya Isaac, ₄wet iwo p'ante lhijtsekayej tä hiw'en ocho ifwalas, mälhyej tä Dios ne'tek iwoye. ₅Abraham hiw'en p'ante cien nekchämis tä nech'e iche p'ante Isaac. ₆Wet Sara letichunhayaj yok, “Dios hiw'en n'oho m'ak tä oyen t'ischeyeka. Wet elh chik häpek ihanch'oye tä owo olhäsa, lhamtej t'ischeyhiyeja. ₇¿Atsihit elh chik ifwenho p'ante Abraham chik yop'antek, Sara iwohla lhäsa? Ihichet'a. Matkat athana owot lhäsa tä lham häpe hin'o tä hich'ut t'at.”

₈Wet Isaac lhaichihelit, wet ifwala p'ante Sara ilehtej lakat'os, Abraham yenlhi lakäjyaj tä wuj.

₉Wet iche ifwala tä Sara hiw'en lakawo'tsinha Agar lhäs Ismael tä iläkwlhi Isaac. ₁₀Wet Sara yik tä ifwenho Abraham wet yok:

–¡Chen okawo'tsinha, lhäy'e lhäs! ¡Tsi t'uhawethiyejt'ak han'äfwajtso isej akäywet tä lewukla olhäs Isaac!

₁₁Tä Abraham iläte, wuj tä äytaj letichunhayaj, tsi lhäs t'at Ismael. ₁₂Mat Dios tahuyej wet yok:

–Yej lhen alhakliya han'äfwaj lhäy'e lako tä häpe akawo'tsinha. Woye t'at m'ak tä Sara ne'tek lewoye, tsi ales tälhiyela äs Isaac leles. ₁₃Wet akawo'tsinha lhäs häte oyenla häpeya lajcha wichi tä wuj, tsi äs t'at.

₁₄Tä ifwala elh tä nech'e fwamlafwaj, Abraham hiw'enho Agar pan lhäy'e inät tä ihi lehi tä tsänt'äj wet tilhäj, wet hiw'enho lhäs Ismael, wet yok:

–Mäh.

Wet Agar yik, wet inukwe honhat tä ts'anis tä tumejlä hupuy tä Beerseba. ₁₅Tä yäm kanhi, y'im inät tä ichäj. Tä mälhyejtso, hin'äy lhäs, itichufwi hal'ä hupel ₁₆wet yikch'oye, lhaitontehlä tä tatayphä, tsi tek t'uhläk hiw'en lhäs chik y'il. Wet tä tatayphä, tafwlhi. ₁₇Wet Dios iläte mamse tä tafwlhi, wet laka ángel t'än tä tum puleye wet yok:

–Agar, ¿atsi m'ak tä awit'äyhyaj? Yej nuhat amho, tsi Dios iläte mamse lhafwyhayaj. ₁₈Nephä, chuma äs, yej leyej wet uye, tsi olham oyenla häpeya wichi tä wuj lajcha.

₁₉Wet Dios hin'ältej Agar häp chowej tä inät ihi. Wet Agar ihoye wet itsäche lehi tä tsänt'äj, wet ihäne lhäs Ismael wet iyäynej.

_20-21Wet Dios tach'ote mamse wet lhaichihelit, wet yen lew'eta honhat tä ts'anis tä lhey Parán. Wet häpe hin'o tä takwey isi tä ichäjlhi lutsej hal'ä. Tä paj lako itiyej atsinha tä lew'et Egipto wet yen lech'efwaya.

₂₂Wet häp ifwalastso niyat Abimelec lhäy'e laka sip'äl kaniyat tä lhey Ficol, lhamel ihoye Abraham. Wet Abimelec tahuyej wet yok:

–Ow'en tä Dios i'amej tä lhenlhi m'ak chik häpe. ₂₃Tä mälhyejtso, unhatche n'oyej ämet tä y'ehi täjna tä y'ehi tä Dios tatache, häpkhilek ohanej tä kalelhäj tä tek letihla n'oyej akanyaj, lhäy'e oles lhäy'e ochetsos, wet lewohiyepeja n'oyej m'ak tä is, lhäy'e wichi tä ihi honhat tä lhehina, mälhyej tä olham owoyejnaj ame.

₂₄Abraham nichulho wet yok:

–Matche olhämet.

₂₅Wet nech'e Abraham tahuyej Abimelec wet yok:

–¿Chiwoye tä akawos iso n'oyej chowej tä inät ihi?

₂₆Abimelec nichulho wet yok:

–Häp tä n'am hanej. Nech'e tä oläte, tsi amtej lefwenhit'a n'oho.

₂₇Wet Abraham tachuma tson'atas lhäy'e w'asetas wet hiw'enho Abimelec, wet lhamel iwoyej lhamehen lhämet tä hit'unhatche tä yämlat matche m'ak tä t'uhläk iwoye. ₂₈Wet äp Abraham hiw'enhat siete tson'atas les. ₂₉Wet Abimelec tay'ätshane wet yok:

–¿Atsi m'ak tä tamenej tä lewoye täja?

₃₀Abraham nichulho wet yok:

–Chuma siete tson'atas les tä ow'en amho tä häpe otetnekej tä matche, olham t'at tä olhenek chowej tä inät ihi.

₃₁Häp tä tamenej tä honhattso õyen lheya Beerseba, wok õyok, Chowej tä ot'unhatche olhämet. Tsi häp p'ante tä Abraham lhäy'e Abimelec ihi tä hit'unhatche lhamejen lhämet tä iwoye.

₃₂Tä lhamel ileyej, Abimelec lhäy'e Ficol lhamel yäple Filisteo lhayis kahonhat. ₃₃Wet Abraham yen lakäsa hal'ä tä lhey tamarisco tä ihi Beerseba. Wet t'änch'oye Lhawuk, Dios tä n'ilataj, wet n'okwiyej. ₃₄Wet pitaj lewhäy tä Abraham ihi p'ante Filisteo lhayis kahonhat.