Gén 22

₁Tä tajyäme m'ayhay tä mälhyejentso, Dios yelhtshayen Abraham t'ekhahyaj. Wet t'änch'oye Abraham wet yok:

–¡Abraham!

Lham nichulho wet yok:

–Oikana, Iwuk.

₂Wet Dios tahuyej wet yok:

–Chuma äs Isaac, äs tä weihalha tä wuj tä lehumin, wet chäj amche wet hoye honhat tä lhey Moria. Wet chik lechäte, läna wet wunhola, ena olham otw'ayhata, tila'pe chenaj chik opäynhila ame.

₃Tä mälhyejtso, tä fwala elh tä nech'e fwamlafwaj, Abraham nephä wet yenlhi lew'utefwaj asno. Wet yisthen lelhetes yämthilek iwunho m'ak tä yen Dios t'awayhata. Tä wak'alh, yik tä ihoye honhat tä Dios ne'tek ihoye, lhäy'e lhäs Isaac, lhäy'e täkwfwas lakawos. ₄Wet tres fwalas tä lhamel iwo lew'ekyaja, wet nech'e n'äle häp lhip tä ihoye. ₅Wet Abraham tahuyej lakawos wet yok:

–Mälheyay kana, uye asno. Olham lhäy'e mamse ohoye chenajfwaj tä n'äle l'ini yämthilek on'okwiyej Dios. Wet chik oleyej, otpinla amehen.

₆Abraham tachuma lelhetes wet ilhuhyenej Isaac, wet tachuma laka tsonhat lhäy'e itäj wet yikhen. ₇Wet Isaac tahuyej lajcha Abraham wet yok:

–¡Ijcha!

Abraham nichulho lhäs wet yok:

–¿Atsi m'ak tä lewatlä, yäs?

Isaac yok:

–Iche itäj lhäy'e hal'äy, ¿mat chip ihi tson'ataj lhäs chik y'alän?

₈Lajcha nichulho wet yok:

–Yäs, Dios hiw'enla n'amhohen tson'ataj lhäs.

Wet lhamel yikhen t'at. ₉Tä nichäte lhip tä Dios ne'tek ihoye, Abraham yenlhi altar, wet iti'pe hal'äy, wet nech'e yäyit lhäs Isaac wet iti'pe altar. ₁₀Wet tachuma laka tsonhat yämthilek ilän lhäs. ₁₁Mat Lhawuk laka ángel tum puleye tä t'änpe tä yok:

–¡Abraham! ¡Abraham!

Lham yok:

–Oikana, Iwuk.

₁₂Ángel tahuyej wet yok:

–Yej wo m'akayej mamse. Tsi tä kan'äyayejo Dios äs tä weihalha, n'äl tä ahäpe hin'o tä matche tä iwoye Dios lhämet.

₁₃Abraham iyahinphä, wet hiw'ene tson'ataj tä lech'ul nahahi tuskal. Wet yike wet iti'pe lhäsw'et, wet häp tä ilän wet iwunho wet yen Dios t'awayhata. ₁₄Wet Abraham iwo lheya lhiptso wet yok, “M'ak tä owatlä Lhawuk hiw'en n'oho.” Wet häp tä kamaj fwalasna wichi yok:

–Lhawuk hiw'enho elh m'ak tä iwatlä tä i'pe chenaj.

₁₅Wet Lhawuk laka ángel tä tum puleye yachajo tä tahuyej Abraham ₁₆wet yok:

–Lhawuk lhämet yokwe, “Tä lewoye täjtso tä kan'äyayej n'oho äs, häp äs tä weihalha, ot'unhatche lhamej olhämet, ₁₇oyok, Olham matche tä wuj tä otihla amej okäpfwayajay tä isen, wet oyämla wujpey wichi tä häpe ales tä tälhila ame. Tehlat iwoye katetsel tä ihi pule, wet tehlat iwoye holo tä iwhäye tewok. Wet lhamel ikalhihipeja letayhfwas, ₁₈wet otkäpfwayhiyejela le'isyaj wichi tä w'enhache lhamej tä ihiche nilhokej honhates, häp tä isej ales tä lepes lheley, tsi am lewoye olhämet.”

₁₉Tä Abraham ileyej nilhokej m'ak tä iwoye, lham lhäy'e lhäs Isaac yäple lakawos. Wet lhamel yikhen tä yäple Beerseba tä Abraham yen lew'eta.

₂₀Tä tajyäme p'ante fwalas iyhäj, Abraham itoyne tä lech'inij Nacor lhäy'e lech'efwa Milca iwo lelesa. ₂₁Lhäs tä ichun lhey Us, wet lech'inij lhey Buz, wet iche lhamel lech'inij tä lhey Kemuel tä häpe p'ante Aram lajcha. ₂₂Wet lepuhfwas häpehen Kesed, Hazo, Pildás, Idlaf, lhäy'e Betuel. ₂₃Betuel häpe p'ante Rebeca lajcha. Häp tähestso ocho Milca lhäy'e Nacor tä häpe Abraham lech'inij leles.

₂₄Häte Nacor iwo lelesahlä häp atsinha elh tä lhey Reúma. Lheyis Teba, Gaham, Tahas, lhäy'e Maaca.