Gén 27

₁Isaac nech'e häpe hin'o tä hich'ut t'at wet nemhit hiw'enche honhat. Fwala elh p'ante, t'äne lhäs tä thaläkw, Esaú, wet yok:

–¡Yäs!

Esaú yok:

–¿Chiwoye, ijcha?

₂Isaac nichulho wet yok:

–Yäs, lew'en tä och'ut t'at. Fwala chik häpe olehiyeja honhat. ₃Häp tä ot'uhläk lehoye tayhi, wet chäj alutsej lhäy'e hach'ähal wet ukwe tshäwet. ₄Wet enlhila apenek tä akäj mälhyej tä lhenlhipej tä wuj tä oy'akän, wet häna n'oye yämthilek otufw. Wet ow'enla amho okäpfwayaj tä kamaj n'am leyej honhat.

₅Mat Rebeca iläte Isaac tä tahuyej lhäs Esaú. Wet tä Esaú yik tä ihoye tayhi tä t'ukwe tshäwet yämthilek yenhoplhi lajcha, ₆wet Rebeca ihoye lhäs Jacob wet yok:

–Olätene ajcha tä tahuyej achila Esaú wet yok, ₇“Ukwe tshäwet wet enlhila apenek tä akäj yämthilek otufw. Wet ow'enla amho okäpfwayaj tä kamaj n'am leyej honhat.”

₈Tä Jacob iläte lako, wet yen tichunhayaja täjtso. Wet Rebeca äp ifwenho tä yok:

–Tä mälhyejtso, yäs, tetshan olhämet wet woye m'ak tä one'tek lewoye. ₉Mäh hoye lhaläy wet chäj n'oye täkwfwas kayla lesas tä yätajen, wet olhamlak oyenlhi openek tä akäj tä ajcha wuj tä y'akän. ₁₀Wet amlak lehäne häpkhilek tufw, wet hiw'enla amho lakäpfwayaj tä kamaj nileyayej honhat.

₁₁Jacob nichulho lako wet yok:

–Ochila wuj lew'ole tä i'pe t'äj, mat olham ow'ole ihihit'a. ₁₂¿Chihla iwoyek ojcha tachas n'okwe wet nitäfwel n'oyej tä n'am häpe Esaú tä laj ow'oleya? Wet yenla n'oye hin'o tä iläkwlhi wet takäpfwayhiyeja n'oye m'ak tä ni'isa, häpkhit'ala m'ak chik is chik okatej.

₁₃Matkat lako yok:

–Yäs, is chik nichät n'o'pe olham häp m'ak chik ni'isa. Mat am woye olhämet, mäye kayla lesas wet hän n'oye.

₁₄Tä mälhyejtso, Jacob yik tä yike kayla lesas wet ihäne lako. Wet lham yenlhi lepenek tä akäj tä Isaac wuj tä y'akän. ₁₅Wet itonphä Esaú lew'uyis tä isis tä t'amajej, wet hiw'uyyenhi Jacob. ₁₆Wet ikäfwlejchehen kayla t'ähes Jacob takweyey lhäy'e lew'o lhip tä laj lew'oleya. ₁₇Wet nech'e hiw'enho lepenek lhäy'e pan tä pajche iwaklhat, ₁₈wet Jacob ihäne lajcha wet yok:

–¡Ijcha!

Isaac yok:

–¡Hää! ¿Atsi olhäs tä ahäpe?

₁₉Jacob nichulho lajcha wet yok:

–Ohäpe äs tä thaläkw, Esaú. Wak'alh t'at m'ak tä lene'tek oyenlhi amho. Athana nephä wet tayphä, tufw tshäwet tä otälhte tayhi wet w'en n'oho akäpfwayaj.

₂₀Isaac tay'ätshane lhäs wet yok:

–Yäs, ¿chipte tä yofwajkwet lesakanej tshäwet?

Jacob nichulho lajcha wet yok:

–Awuk Dios tä tach'ot n'oye, wet häp tä yofwajkwet osakanej.

₂₁Mat Isaac yok:

–Äm alhoho, yäs. Otchasla amche, tsi ot'uhläk kalelhäj chik matche tä ahäpe olhäs Esaú.

₂₂Wet Jacob ihowhäye lajcha, wet lajcha tachasche wet yok:

–Jacob lepak t'at tä oläte, mat takweyey häpe t'at Esaú takweyey.

₂₃Tä mälhyejtso, Isaac nitäfwenhiyejt'a lhäs tä häpe, tsi Jacob takweyey lew'ole ihi t'at, hätet iwoye lechila Esaú. Matkat tä Isaac nech'e t'uhläk takäpfwaye lhäs, ₂₄yachajo tä tay'ätshane wet yok:

–¿Hä matche tä ahäpe t'at olhäs Esaú?

Jacob nichulho lajcha wet yok:

–Matche, ohäpe t'at Esaú.

₂₅Tä mälhyejtso, lajcha yok:

–Yäs, w'en n'oho olhäk. Otufwila m'ak tä lelän tä tälhe tayhi, wet ow'enla amho okäpfwayaj.

Jacob hiw'enho lajcha häp lhäk wet tufw. Wet ichäje vino wet iyä. ₂₆Tä ileyej, wet yok:

–Yäs, lhu ho n'oye, ts'u och'alo.

₂₇Tä Jacob ihowhäye yämthilek hits'u lajcha ch'alo, Isaac tan'isinej lew'uyis. Wet nech'e takäpfwayeje lhämtesna wet yok:

₃₀Wet Isaac ileyej tä takäpfwaye Jacob. Wet häpet tä Jacob yik, näm Esaú tä tälhe tayhi tä t'ukwe tshäwet. ₃₁Wet lham yenlhi lepenek tä akäj, tä wak'alh ihäne lajcha wet yok:

–Nephä, ijcha, tufw tshäwet tä otälhte tayhi wet w'en n'oho akäpfwayaj.

₃₂Wet lajcha Isaac yok:

–¿Atsi tä ahäpe?

Lhäs nichulho wet yok:

–Ohäpe Esaú, äs tä achunkatsek.

₃₃Tä Isaac iläte, lhäy'e lhip tä ichettiche wet yok:

–Tä mälhyejtso, ¿atsi tä ihone n'oye wet ichäj n'oye tshäwet tä ipen? Wet olham otufwne tä kamaj kanäma, wet tä oleyej otkäpfwayene. Athana okäpfwayaj iyej t'at.

₃₄Tä Esaú iläte lajcha tä iwoyetso, wuj tä tafwlhi wet t'än tä yok:

–¡Ijcha, häte olham w'en n'oho akäpfwayaj!

₃₅Mat Isaac yok:

–Pajche hach'inij ihomat n'oye wet y'akan n'oyej, wet lham t'at tä ichäj okäpfwayaj tä ot'uhläk ow'en amho.

₃₆Wet Isaac yok:

–¡Ya'that õyen tajya lheya Jacob! ¡Nech'e dos veces tä y'akan n'oyej! Ichun, iso n'oyej on'ohyaj tä ohäpe achunkatsek, wet athana äp iso n'oyej akäpfwayaj tä lewukn'o. Ijcha, ¿hä newache akäpfwayaj elh yämthilek lew'en n'oho?

₃₇Isaac nichulho lhäs wet yok:

–Ch'ahuye olhämet. Pajche oyen awuka Jacob, oyen lakawosa nilhokej lepuhfwas. Wet ofwenho tä oyok, “Is chik wuj trigo tä lew'en, lhäy'e vino.” Mat am, yäs Esaú, nemhit iche m'ak chik owoyej ame.

₃₈Mat Esaú tujlhache tä yok:

–¿Mat chiwoye, hä newache elh akäpfwayaj, ijcha? ¡Häte olham käpfway n'oye!

Tä iwoyetso, yachajo tä ifwitsenej tä tafwlhi.

₃₉Wet nech'e Isaac ifwenho lhäs wet yok:

₄₁Tälhe täjtso Esaú n'äyiho'pe Jacob häp lajcha käpfwayaj tä hiw'enho. Wet letichunhayaj yok, “Tek pajiyeja wet ojcha y'inhila. Chik tajyäme, olänla och'inij Jacob.”

₄₂Tä Rebeca ihanej m'ak tä lhäs Esaú t'uhläk iwoye, ichene elh lakawos häp Jacob wet yok:

–Äne ayej.

Tä Jacob nichäte, wet yok:

–Ch'ahuye olhämet. Achila Esaú t'uhläk ailän yämthilek iwo lahaya m'ak tä lewoyeje. ₄₃Tä mälhyejtso, woye m'ak tä ofwel amho. Mäh lethane ochila Labán lew'et tä ihi Harán, ₄₄wet eweja ayej pajla'tha tafwaytshi lewäk achila ₄₅wet nem yen tichunhayaja m'ak tä lewoyeje. Wet chik ow'en chik is t'at, owohla siläta ame häpkhilek letapil. Tsi tek ot'uhläk tan'iswek oles chik y'inhen.

₄₆Wet nech'e Rebeca tahuyej Isaac wet yok:

–Matche tä oy'elej häp Het lhayis ka'tsinhay tä Esaú lech'efwas. ¡Elat chik Jacob äp yen ch'efwaya elh atsinha tä häte iwoye lhamel tä lew'et honhatna, is chik oy'il, ochutthiyejt'a!