Gén 28

₁Tä mälhyejtso, Isaac t'äne Jacob wet yok:

–Lhawuk i'amej. Athana lhek tetshan olhämet, oyok, Yej lhena hach'efwaya elh atsinhay tä ihi honhatna Canaán. ₂Mäh hoye achäti Betuel lew'et tä ihi honhat tä Padán-aram, wet ena hach'efwaya elh awithok Labán les tsinhay. ₃Is chik Dios tä laj letumfwaya iti amej lakäpfwayaj tä is wet hiw'en amho wujpey ales häpkhilek wujpey wichi tä tälh ame. ₄Wet is chik hiw'en amho lhäy'e ales häp lakäpfwayaj tä ifwenho p'ante Abraham, häpkhilek alewuhuy t'at häp honhat tä kalhaw'eta tä y'ehina, mälhyej iwoye lhämet p'ante ifwenho Abraham.

₅Wet häp tä Isaac ichene p'ante lhäs Jacob häp honhat tä lhey Padán-aram. Wet ihoye lewithok Labán lew'et, häp hin'o tä lham lako Rebeca lechila tä lajcha häpe Aram lhayis elh tä lhey Betuel.

₆Esaú hiw'en tä lajcha Isaac hiw'enho lakäpfwayaj Jacob wet ichene honhat tä lhey Padán-aram yämthilek yen ch'efwaya elh atsinhay tä lew'et honhattso. Wet hiw'en tä lajcha takäpfwaye häp Jacob wet n'äyejo chik yen ch'efwaya elh atsinhay tä lew'et Canaán, ₇mat lajcha lhäy'e lako ne'tek ihoye Padán-aram, wet lham yik tä ihoye t'at. ₈Tä mälhyejtso, Esaú nitäfwelej tä lajcha lhäy'e lako tek ihumnhen häp atsinhay tä lham lech'efwas tä lew'et Canaán. ₉Wet lham yik tä ihoye Ismael, Abraham lhäs, wet yen ch'efwaya lhäse tä lhey Mahalat tä häpe Nebayot lepuhfwa. Wet nech'e tres lech'efwas tä nilhokej, täkwfwas tä lew'et Canaán wet elh häpe Ismael lhäse.

₁₀Jacob yikp'antech'oye Beerseba wet inukwe n'äyij tä tiyäje Harán. ₁₁Tä yäm p'ante kanhi, honaj t'at, fwala y'uy, wet tä imä tachuma tunte wet t'aleyej. ₁₂Wet lefwilhek ihi, tafwilhanej n'ot'äsawet tä tälho pule pajtha taji t'at honhat, wet Dios laka ángeles inupejchä wet äp yäpilphäpej. ₁₃Häte hiw'en tä Lhawuk takasitwhäye lham wet tahuyej tä yok:

–Ohäpe Dios tä achäti Abraham Lewuk wet ajcha Isaac Lewuk. Am lhäy'e ales ow'enhihola honhat tä lemähina, ₁₄wet häpkhila wichi tä wujpey, hätehlat iwoye honhat mok. Wet lhamel ifwtsatla'pe honhat, yenla lew'eta honhat tä tumej tafwojhiye, lhäy'e tä tapinhiye, lhäy'e tä hichä, lhäy'e tä kaphä. Wet wichi tä w'enhache lhamej tä ihiche nilhokej honhates isiyeja okäpfwayaj tä tälh ame lhäy'e ales. ₁₅Olham oi'amej wet ot'uhla ame honhat chik häpek lehoye, wet chik paj oainachajiyela honhatna. Olehit'ala amej, wet oyämla matche olhämet tä ofwel amhona.

₁₆Tä Jacob n'om, wet yok:

–¡Matche tä Lhawuk ihi t'at häp honhatna, mat nech'e tä ohanej! ₁₇Wet wuj tä noway wet yok:

–¡Lhipna n'ot'amajchet t'at! ¡Dios lew'et täjna wet pule lepe!

₁₈Tä nech'e fwamlafwaj Jacob nephä, wet tachuma tunte tä yen t'alaja, wet ikasthayen wet itsäype aceite tä yen t'amajcheta. ₁₉Wet häp honhattso fwalas tä pajche iche p'ante hupuy tä ihi tä lhey Luz. Mat Jacob iwo elha lhey, wet yen lheya Betel, wok oyok, Dios Lew'et. ₂₀Wet hit'unhatche lhämet tä yok:

–Chik Dios nek n'okwe wet t'u n'oye tä owo ow'ekyaja, wet hiw'en n'oho olhäk lhäy'e ow'uy, ₂₁wet newache owit'äyhyaj pajla'tha oyäple ojcha lew'et, chik mälhhiyejatso, oyok, Lhawuk häpkhila oka Dios. ₂₂Wet tunte tä okasthayenna häpkhila Dios Lew'et, wet oyok, Nilhokej m'ak chik lew'enla n'oho ow'enla amho lhip tä diezmo.