Gén 38

₁Ifwalastso Judá yikch'oye lepuhfwas wet yen lew'eta häp hin'o tä lhey Hira lew'et tä ihi hupuy tä lhey Adulam. ₂Wet Judá ihumin p'ante atsinha tä lew'et häp honhattso, tä lajcha häpe t'at Canaán lhayis elh tä lhey Súa. Tä mälhyejtso, Judá yen p'ante lech'efwaya. ₃Wet tä paj hich'otshan, wet iwo lhäsa wet yen lheya Er. ₄Tä paj yachajo tä iwo lhäsa wet yen lheya Onán. ₅Wet äp yachajo tä iwo lhäsa wet yen lheya Sela. Wet lhästso nichätp'antehchä tä ihi hupuy tä lhey Kezib.

₆Wet tä thaläkw p'ante Judá lhäs tä lechunkatsek tä lhey Er, lham iwhayen, itiyej atsinha tä lhey Tamar. ₇Mat Lhawuk y'ulhanej Er m'ak tä ni'isa tä iwoyepej, wet häp tä isoyej lew'atshancheyaj. ₈Tä Judá hiw'en tä y'il lhäs Er, wet tahuyej lhäs Onán wet yok:

–Lemäyej lhan'alaj. En hach'efwaya wet wo alesa, häpkhilek achila tä pajche y'il leles ihihlä lech'efwa, mälhyej lhakey.

₉Mat Onán ihanej t'at tä leles chik ihihlä len'alaj, lhamhit'alak õyen lajchaya. Häp tä tamenej chik imäyej len'alaj wet chik iwoyneje atsinha, tach'anlhahiyet'ak m'ak tä tälho tiyäjo atsinha, mat itsäy honhate yämthilek nich'otshana wet newache lechila leles chik ihihlä. ₁₀Wet Lhawuk wuj tä nhumina m'ak tä Onán iwoye. Tä mälhyejtso, isoyej lew'atshancheyaj wet häte y'il.

₁₁Wet Judá tahuyej len'alaj Tamar wet yok:

–Is chik lehoye ajcha lew'et wet ehi t'at, pajla'tha thaläkw olhäs elh Sela.

Mat m'ak tä Judá yen tichunhayaja, nowayhläk lhäs Sela tan'isej lechilalis tä y'inhen. Tä mälhyejtso, Tamar yäple lajcha lew'et wet ihi t'at.

₁₂Tä paj p'ante, lham Judá lech'efwa, Súa lhäse, ileyej honhat. Wet tä paj tä noj tä yen tichunhayaja lech'efwa tä y'il, lham yik tä ihoye hupuy tä lhey Timnat tä lakawos ihi tä yisetchehen leläy tson'atas w'ole. Wet lakalay'i Hira yikche tä iwo t'unfwaya. ₁₃Wet tä Tamar ihanej tä lakachäti Judá ihoye Timnat yämthilek yisetche tson'atas w'ole, _14-15lham ilanhi lew'uy tä tesa w'uy wet iwo iyhäja lew'uyis, wet iwo lep'ota tatey häpkhilek wichi nitäfwelayej. Wet yik tä nichäte lepe tä tiyäje hupuy tä lhey Inät Täkwfwas tä ihi n'äyij tä ihoye Timnat. Tamar iwoynejetso m'ak tä iwoye tsi ihanej tä Sela nech'e thaläkw t'at, matkat Judá itihiyejt'a yämthilek yen ch'efwaya. Wet tä Judá hiw'en atsinha tä tatayphä tä iwhäye n'äyij, yenek häpe elh atsinhay tä kain'oyaj länhay tä iwo lep'ota tatey. ₁₆Wet Judá ihoye, nitäfwenhiyejt'a tä häpe len'alaj, wet tahuyej tä yok:

–¿Hä lewoyek owoyej ame m'ayek?

Atsinha nichulho wet yok:

–¿Atsihila m'ak chik lew'en n'oho chik owoye?

₁₇Judá yok:

–Othatla ame kayla lhäsaj.

Atsinha nichulho wet yok:

–Is t'at, mat is chik len'äy n'oyej aka m'ayek, wet chik lethat n'oye kayla oyachajila ame.

₁₈Judá tay'ätshane atsinha wet yok:

–¿Atsi m'ak tä let'uhläk on'äy amej?

Atsinha nichulho wet yok:

–N'äy n'oyej afwujhi, lhäy'e n'opätnek tä lenayhtej amho, lhäy'e atsut.

Wet Judá hiw'enho, wet yikche atsinha, tälhe täjtso hich'otshan. ₁₉Wet tä tafwaytshi m'ak tä Tamar iwoye, yik wet ilanhi tateyp'ot wet yachajo tä taw'uyhi lew'uy tä tesa w'uy.

₂₀Tä paj Judá ichen lakalay'i Hira, ne'tek ihäne kayla lhäsaj häp atsinha yämthilek atsinha yachaje laka m'ayhay tä hin'äyej. Matkat tä Hira nichäte, nemhit hiw'en atsinhatso. ₂₁Wet tay'ätshane hin'ol tä ihi Inät Täkwfwas wet yok:

–¿Chip ihi kain'oyaj länek tä lew'et täja, häp atsinha tä tatayphä tä iwhäye n'äyij?

Hin'oltso nichulho wet yok:

–Ihichet'a kana atsinhak kain'oyaj länek.

₂₂Tä mälhyejtso, yik wet yäple lakalay'i Judá. Tä nichäte, wet ifwenho tä yok:

–Ow'enhit'a atsinha. Häte oty'ätshaneje wichi tä ihi Inät Täkwfwas, wet lhamel yok, “Ihichet'a kana atsinhak kain'oyaj länek.”

₂₃Wet Judá nichulho lakalay'i wet yok:

–Is t'at, is chik lhayen at lewuka oka m'ayhay tä iyej, häpkhilek newache hin'ok n'ailäkwethä. Tsi tek ofwech'enlhi, othate kayla lhäsaj wet am lhekchufwi, mat lew'enhit'a.

₂₄Tä tajyäme p'ante tres iwel'as, wet õ'fwenho Judá wet õyok:

–Han'alaj Tamar yikejwethä hin'ol, wet athana hich'otshan t'at.

Tä Judá iläte, ifwitsenej lhämet tä yok:

–¡Is chik õ'tonphä wet õ'thatho itäj!

₂₅Matkat tä wichi itonphä tä ihi lew'et, lham ichene lhämet lakachäti Judá wet yok:

–Lhek yahin m'ayhayna tä ochen ame. Oyenek letäfwelej t'at hin'o tä lewuk häp n'ofwujhina, lhäy'e n'opätnek tä õ'nayhtej lhamho, lhäy'e n'otsut. Oyok, hin'o tä lewuk tähesna häp tä och'otshanlä.

₂₆Tä Judá iyahin m'ayhay tä len'alaj ithate, nitäfwelej tä lham t'at tä lewuk. Wet yok:

–Is alhoho m'ak tä Tamar iwoye. Olham tä ni'isa m'ak tä owoye. Tsi ofwech'enlhi tä n'am w'enho olhäs Sela yämthilek iyej.

Tälhe täjtso Judá yachajihot'ak lechuyaje häp atsinhatso.

₂₇Nichäte p'ante ifwala tä Tamar iwo lhäsa, wet täkwsilis t'at. ₂₈Elh tä ichun takwey n'änhi. Wet atsinha tä t'uye tachuma niyäkw lhotafwaj tä ichät, wet yäytej takwey wet yok:

–Häp täja elh tä ichunchä.

₂₉Matkat nemhit n'äl takwey, wet tä nichätchä häpkhit'a, mat häpe elh tä imälheche elh n'äyij häp tä ichun tä nichätchä. Tä mälhyejtso, atsinha tä t'uye yen lheya Fares, tsi yok:

–¡Matche tä lewo han'äyija!

₃₀Wet nech'e nichätchä elh tä õyäytej niyäkw tä ichät häp takwey, hin'ofwaj t'at, mälhyej iwoye lechila Fares. Wet õyen lheya Zera tä yok, Osilatyaj, wok yok, Ichät.