Gén 43

₁Lhäy'epej lhip nehläs tä iche honhat. ₂Wet tä noj p'ante n'olhäk tä Jacob leles ichäj tä tälhe Egipto, lham tahuyej leles wet yok:

–Achajo tä lhekhen wet chäj n'amhohen lhip m'ak chik y'atufw.

₃Mat Judá nichulho lajcha wet yok:

–Häp niyat tä ihi Egipto hit'unhatche lhämet, ifwelnaj n'ohohen tä yok, “Chik kachäja alhoho hach'inij tä lepes, yej tapil alhoho.” ₄Tä mälhyejtso, chik letach'anlhayek nek n'okwehen Benjamín, oyikhihena tä ot'ukwe lhip trigo. ₅Mat chik kawahna n'okwehen, oyikhihent'a. Tsi kalelhäj t'at lhämet häp niyat tä ihi tä yok, “Chik kachäja alhoho hach'inij tä lepes, yej tapil alhoho.”

₆Wet Israel, wok oyok, Jacob, yok:

–¿Chipte tä wuj m'ak tä ni'isa tä lewoyayej n'oye tä lefwenhon'aj niyat tä iche elh amel hach'inij?

₇Lhamel nichulho lajcha wet yok:

–Tsi lham wuj tä tay'ätshanej n'oyehen wichi tä ohäpehen lhäy'e ow'et lheley. Wet äp yok, “¿Hä kamaj iläy amel ajcha? ¿Hä iche elh amel hach'inij?” Tä mälhyejtso, olhamel ofwenho t'at m'ak tä tay'ätshanej n'oyehen. Wet otihiyejt'a chik yohlak, “Chäj alhoho hach'inij.”

₈Wet nech'e Judá tahuyej lajcha wet yok:

–Chik y'at'uhläk y'aläyhen, ch'anlhaye mamsek nek n'okwehen. Olhamlak ot'uye, wet oyikhen t'at athana, häpkhilek kay'at'ilahen, lhäy'e lhales. ₉Lewit'äyhyaj chik häpe, olhamlak olhuk. Chik n'am nachaj ame äs, olhamlak otes ihi ahilä wet lajit lepesa. ₁₀Wet chik kahäpkhiya täjtso tä y'alhainahhathi, äp onämhihenn'e tä otälhe Egipto.

₁₁Lajcha nichulho wet yok:

–Tä mälhyejtso, woye täja. Chuma m'ak tä wuj tä is tä ihi honhatna, wet chäje niyat yämthilek lhen t'awayhata: häp hal'ä lhits'i tä laha ihi, lhäy'e akäyek, lhäy'e m'ak tä lenij akäjche, lhäy'e mirra, lhäy'e nueces, lhäy'e almendras. ₁₂Wet chäj lhip chinaj t'äj, häte chäje chinaj t'äjn'aj ihiche akhäyhis yämthilek lhachaje. Tsi elat wetahin'aj m'ak tä iwoye. ₁₃¡Mähen! Chäj hach'inij wet achajo tä lehoye hin'o tä lhämaye. ₁₄Wet is chik Dios tä lajit letumfwaya ne'tek aip'altsenhen wet inuhatphä apuhfwa tä ihi n'op'onthi wet häte nitsokalhi Benjamín. Mat olham, chik õ'näyej at n'oho oles, is t'at, oteläythiyeja t'at.

₁₅Wet lhamel tachuma m'ayhay tä ichäje niyat yämthilek yen t'awayhata. Wet ichäj chinaj t'äj tä yachaje niyat, lhäy'e chinaj t'äj yämthilek ichäjej lhäk. Häte ichäj lech'inij Benjamín, wet yikhen tä ihoye Egipto. Tä lhamel nichäte José, ₁₆hiw'en tä lhamel ichäj t'at lech'inij Benjamín. Wet tahuyej lakawo tä t'uye lew'et wet yok:

–Häne ow'et häp hin'oltsi. Wet län w'asetaj wet enlhi yämthilek otchufwiyej chik ot'ek chik ifwala ihi lechowej.

₁₇Wet José lakawo yenlhi t'at m'ak tä laka niyat ne'tek iwoye, wet ihäne José lew'et häp lhamel. ₁₈Mat lhamel wuj tä nowayhen wet yok:

–¡Lhamel t'ukwe t'at m'ak chik yenla lhatesa! Oyenek chinaj t'äjnaj õ'nachaj n'amehen, häp tä tamen n'amejen tä õ'naihän kana yämthilek õ'nu n'amehen, wet õ'naichumyenlawethä mälhyet n'okwenkay, wet äp õ'tsoklawethä lhaw'utey asnolis.

₁₉Wet tä nichäte José lewukwe lepe, wet tahuyej José lakawo ₂₀wet yok:

–¡Iwuk, olhamel wuj tä olhakli ihi! Tä onämhen naji tä oneke olhäk, häpkhit'a m'ak chik häpek owoye. ₂₁Mat tä olhamel oyikhen ifwalatso, wet tä honatsi olhamel omähi lhip tä onchätho. Wet tä ofwoyenpe olhamel okhäyhis, ow'en tä nilhokej olhamel tä oka chinaj t'äj ihi t'at lhip tä tumphä. Niwohit elh olhamel chik tatäy laka chinaj t'äj. Wet häp tä olhamel onachaj kana athana. ₂₂Häte äp ochäj lhip chinaj t'äj yämthilek ochäj lhip olhäk. Mat ohanhiyejt'a elh tä häpe tä ithathomche olhamel okhäyhis häp oka chinaj t'äjtso.

₂₃José lakawo nichulho wet yok:

–Wo atamsekisa, yej noway. Amel lhäy'e ajcha, amel aka Dios häp tä ithathomche akhäyhis häp chinaj t'äj. Tsi olham ohanej tä otchumnaj'atlä amel aka chinaj t'äj tä lechäjej trigo.

Tä ileyej tä iwoyetso, yike Simeón wet inuhatphä wet ihäne lhamel. ₂₄Wet nech'e ichätyen lech'oye lhamel häp José lewukwe, wet hiw'enho inät yämthilek ilejen lepach'ol. Häte hiw'enho lhäk häp asnolis. ₂₅Wet lhamel iwaklhat m'ayhay tä ichäje José, wet inihihlä yämthilek yen t'awayhata tä näm tä ifwala ihi lechowej. Tsi lhamel ihanej tä ihihila José lew'et chik t'ekhen.

₂₆Tä José näm, lhamel hiw'enho t'awayhtes tä ichäje wet t'upechehchä tä ihi tä José tatache pajtha letachol taje honhat. ₂₇Wet José tay'ätshane lhamel wet yok:

–¿Chiwoye amel? ¿Chiwoye ajcha, häp hin'o tä thaläkw tä lefwelaynaj n'oho? ¿Hä is t'at, kamaj iläy?

₂₈Lhamel itihi lakamchetey honhat wet yok:

–Akawo, olhamel ojcha, kamaj is t'at, kamaj iläy t'at.

₂₉Wet José hiw'en tä Benjamín tä häpe lham lepuhfwa tä lako lhäs iyej t'at lhamel. Wet yok:

–¿Hä häp täjtsi amel hach'inij tä lepes tä lhäme naji?

Lhamel yok:

–Häpe.

Wet José tahuyej Benjamín wet yok:

–Is chik Dios takäpfway ame, yäs.

₃₀Tä iwoyetso, wuj letichunhayaj tä hiw'en lech'inij wet t'uhläk tafwlhi. Mat yikch'oye lepuhfwas wet tiyäjchufwi lewukwech'o elh wet tafwlhi. ₃₁Tä ileyej tä tafwlhi, ilejejpe inät tatey wet inuphä. Wet tahuyej lakawos wet yok:

–¡Hän alhoho olhäk!

₃₂Wet José iyej mesa elh, wet Jacob leles iyej elh mesa, wet Egipto lheley tä iyej lhamel häte w'enhayej elh mesa tä iyej. Tsi wichi tä lew'et Egipto n'äyejo elh chik tachufwiyej Hebreo lhayis tä t'ekhen. ₃₃Wet José lepuhfwas tatachephä tä iläte José lhämet tä ikalelhätchä tä ihiche lew'etes, chunkat elh tä thaläkw pajtha nichäte elh tä lepes lhele. Tä lhamel hiw'en m'ak tä José iwoye, wuj tä iseltejen wet iyahin lhamehen. ₃₄Wet José ne'tek lakawo tachuma lham lhäk lhip tä i'pe laka mesa wet hiw'enho lhamel. Wet yäm wuj tä hiw'enho Benjamín, inu'pe m'ak tä hiw'enho lepuhfwas iyhäj. Wet José lhäy'e lepuhfwas lhamel iyä wet wuj tä akäswethä.