Jacob ihoye Egipto, lhäy'e lew'et lheley
1Israel, wok oyok, Jacob, yik, ichäj nilhokej lakäywet. Tä nichätho honhat lhip tä lhey Beerseba, wet ilän itshäwet wet iwunho tä yen n'okhayajayej lajcha Isaac laka Dios. 2Wet honatsitso lew'enek ihi. Dios t'änch'oye tä yok:
–¡Jacob! ¡Jacob!
Lham nichulho wet yok:
–Oikana.
3Dios yok:
–Ohäpe Dios tä ajcha laka Dios. Yej noway tä lehoye Egipto, tsi oyämla wujpey ales chik lhamel ihi. 4Oyikhila amche tä lehoye, wet äp olhamlak otonphä lhamel chik tälho. Häte chik leleyej honhat, José ihla awhäye.
5Jacob yikch'oye Beerseba wet leles ithatho kaletas tä Egipto kaniyat ichene, lhäy'e lhamel lech'efwas lhäy'e leles. 6Wet Jacob lhäy'e nilhokej lew'et lheley lhamel ihoye Egipto. Ichäj leläy lhäy'e nilhokej lakäywet tä lhamel ikalhi tä ihi Canaán. 7Wet nilhokej leles lhäy'e lechetsos tä yikche.
Jacob leles lhäy'e lechetsos
8Häp tähesna lheyis häp Israel leles tä ihoye Egipto, wok oyok, Jacob lhäy'e leles, lhäy'e lechetsos:
Jacob lhäs tä lechunkatsek tä lhey Rubén, 9lhäy'e leles tä lheyis Hanoc, Falú, Hesrón, lhäy'e Carmi.
10Wet häte Rubén lech'inij Simeón leles tä lheyis Jemuel, Jamín, Ohad, Jaquín, Sóhar, lhäy'e Saúl tä lako häpe Canaán lheley ka'tsinha.
11Wet häte Simeón lech'inij Leví leles tä lheyis Gersón, Coat, lhäy'e Merari.
12Wet häte Leví lech'inij Judá leles tä lheyis Sela, Fares, lhäy'e Zera. Häp Judá leles iyhäj tä lheyis Er lhäy'e Onán, lhamel pajche y'inhen p'ante tä ihi Canaán.
Wet häte Fares leles tä lheyis Hesrón lhäy'e Hamul.
13Wet häte Judá lech'inij Isacar leles tä lheyis Tola, Puva, Job, lhäy'e Simrón.
14Wet häte Isacar lech'inij Zabulón leles tä lheyis Sered, Elón, lhäy'e Jahleel.
15Häp tähestso Jacob leles tä ihihlä lech'efwa Lea tä lhamel ihi p'ante Padán-aram. Häte iche lhäse tä lhey Dina. Tä nilhok leles lhäy'e lechetsos, iche treinta y tres hin'ol lhäy'e tä atsinhay.
16Häte Gad leles tä lheyis Sefón, Hagui, Esbón, Suni, Eri, Arodi, lhäy'e Areli.
17Wet häte Gad lech'inij Aser leles tä lheyis Imna, Isúa, Isuy, Bería, lhäy'e lhamel lech'inhä tä lhey Sera.
Wet häte Bería leles tä lheyis Heber lhäy'e Malquiel.
18Häp tähestso Jacob leles tä ihihlä Zilpa, häp Labán kawo'tsinha tä hiw'enho p'ante lhäse Lea, lhäy'e lechetsos. Wet iche dieciséis tä nilhokej.
19Häte Jacob lech'efwa tä lhey Raquel leles tä lheyis José lhäy'e Benjamín. 20Wet José leles tä ihihlä lech'efwa Asenat häpehen Manasés lhäy'e Efraín. Lhamel nichäthihchä Egipto. Asenat häpe sacerdote tä lhey Potifera tä lew'et On, häp tä lhäse.
21Wet häte José lech'inij Benjamín leles tä lheyis Bela, Bequer, Asbel, Gera, Naamán, Ehi, Ros, Mupim, Hupim, lhäy'e Ard.
22Häp tähestso Raquel lhäy'e Jacob leles lhäy'e lechetsos. Iche catorce tä nilhokej.
23Häte Dan lhäs tä lhey Husim.
24Wet häte Dan lech'inij Neftalí leles tä lheyis Jahzeel, Guni, Jezer, lhäy'e Silem.
25Häp tähestso Jacob leles tä ihihlä Bilja, häp Labán kawo'tsinha tä hiw'enho p'ante lhäse Raquel, lhäy'e lechetsos. Wet iche siete tä nilhokej.
26Häp tähestso Jacob leles lhäy'e lechetsos tä yikche tä ihoye Egipto. Tä ts'ilak lhamel iche sesenta y seis, mat tek õhp'ajtej atsinhay tä letichelis tä õ'kalelhät. 27Wet iche täkwfwas José leles tä lhamel nichäthihchä Egipto. Tä mälhyejtso, iche p'ante setenta Jacob lew'et lheley tä ihi p'ante Egipto.
Jacob lhäy'e José lhaiw'enhen
28Wet Jacob ichen p'ante lhäs Judá wet yok:
–Mäh hoye José. Is chik iho n'oye tä oihi Gosén.
Tä José ihanej tä lajcha nämho Gosén, 29ne'tek õ'waklhat lehi kaletaj yämthilek ihoye lajcha. Wet tä yik, tä nichäte tatsufwelej wet pitaj tä tafwlhi. 30Wet Israel tahuyej lhäs wet yok:
–¡Athana chik oy'il, mat okäjyaj ihi t'at, tsi oaiw'en tä kamaj leläy t'at!
31Wet José tahuyej lechilalis lhäy'e nilhokej lajcha w'et lheley wet yok:
–Oyäple niyat, ofwenhihola tä amel lhäy'e ojcha lhäy'e lew'et lheley lenämhen tä letälhe honhat tä Canaán yämthilek lheyay n'oyej, 32wet lechäj aläy lhäy'e nilhokej m'ak tä alewuhuy. Ofwenhihola tä amel achumet t'at tä lechihelit tson'atas, kayla lhayis lhäy'e w'asetas. 33Wet chik niyat t'än amehen wet tay'ätshanej amehen m'ak tä amel achumet, 34fwenhola tä häpe t'at tson'atas tä lhen achumeta tä lechihelit, lhäy'e kayla lhayis, lhäy'e w'asetas, mälhyej tä achätilis iwoye. Häpkhilek lham yen amel haw'eta Gosén, tsi Egipto lheley ihuminhit'a chik yen w'etfwaya wichi tä tson'atas lewos.
