Õ'häne Jacob lep'itsek honhat tä Canaán
1José tatsufwelej lajcha p'itsek wet tafwlhi, wet hits'u lech'alo. 2Wet ifwenho hin'ol tä lechumet tä y'ilenche n'op'itsek m'ak tä lenij akäjche, wet yok:
–Ilenche ojcha Israel p'itsek yämthilek ninajuta.
3Wet cuarenta ifwalas tä lewhäy tä õy'ilenche n'op'itsek häp kachatso, wet nech'e lenij ikalho. Wet setenta ifwalas tä Egipto lheley yen tichunhayaja Jacob tä y'il.
4Wet tä tajyäme täjtso, José tahuyej hin'ol tä leniyatfwas tä ihi Egipto kaniyat lew'et, wet yok:
–Chik matche tä amel lhenayn'o häpeya hin'o tä laha ihi, woye tä owoye, fwenho niyat, 5täjnaj ojcha eyte y'inhi, wet tahuy n'oyej tä yok, “Unhatche n'oyej ämet tä kalelhäj tä letihla n'ohi op'itsekw'et tä pajche owaklhatte tä ihi honhat tä Canaán.”
“Wet häp tä olhaip'altsene niyat yämthilek iwahintshin'o wet oyikchufwi ojcha p'itsek. Chik oleyej, otpinla.”
6Wet niyat nichulho José lhämet tä ichene, wet yok:
–Is t'at, mätchufwi ajcha, häne t'at lep'itsekw'etn'aj ne'tek lehäne, mälhyej m'ak tä lham t'alhejn'aj amek lewoyeje.
7Tä mälhyejtso, José yikchufwi lajcha p'itsek tä ihäne Canaán. Wet nilhokej hin'ol tä len'ohyajay ihi tä ihi Egipto kaniyat lew'et, lhamel yikche, lhäy'e hin'ol tä kalelhäjiche tä ihi Egipto, 8lhäy'e nilhokej Jacob lew'et lheley, leles, lhäy'e lham José lew'et lheley tä yikche. Tajlhama nä'tshas lhäy'e leläy tä imälhehi Gosén. 9Iyhäj wichi ihiche kaletas tä n'oka'tshayajchal, iyhäj iche'pe yel'atas, wujpey wichi. 10Tä nichäte lhip tä lhey N'osapkanw'et tä tumej tewok Jordán lhip tä hichä, wuj lhafwyhayaj. Wet siete ifwalas tä José yen tichunhayaja lajcha tä y'il. 11Wet tä wichi tä ihi Canaán hiw'en lhamel lhafwyhayaj, wet yok:
–¡Matche tä äytaj Egipto lheley tichunhayaj!
Wet häp tä lhamel yen lheya lhiptso Abel-misraim, häp n'olhämet tä yok, Egipto lheley lhafwyhayaj.
12Tä mälhyejtso, Jacob leles iwoyeje lajcha nilhokej m'ak tä ne'tek iwoyeje. 13Lhamel ihäne t'at lep'itsek häp honhat tä Canaán, wet itihi chowej tä ihi Makpela tä tumej hupuy tä Mamre lhip tä hichä. Häp chowejtso ihi p'ante Het lhayis elh tä lhey Efrón kahonhat, mat Abraham ichäj p'ante yämthilek häpe lew'et lheley p'itseyhayw'et.
14Tä José ileyej tä itihi lajcha p'itsekw'et, lham lhäy'e lepuhfwas, lhäy'e nilhokej wichi tä iwo t'unfwaya, lhamel yäple Egipto.
José tek iwo hayahlä m'ak tä ni'isa tä lechilalis iwoyeje p'ante
15Tä Jacob ileyej honhat, wet leles letichunhayaj yok, “Elat José nech'e yenla tichunhayaja m'ak tä ni'isa tä y'awoyejehte, wet fwitsajla n'amehen.”
16Tä mälhyejtso, iwo chenekaye yämthilek ifwenho lhamel lhämet tä yok:
–Tä kamaj iläynaj lhajcha, 17t'unajläk olhamel ofwel amho lhämet tä yok, “Woye tä owoye, is chik letäyhtej letes achilalis tä lhamel iwoyejte ame m'ak tä wuj tä ni'isa.” Häp tä tamenej tä olhamel olhaip'altsen ame, ot'uhläk letäyhat n'oyejen otes, tsi ohäpehen lhajcha laka Dios lakawos t'at.
Tä José iläte lechilalis lhämet tä õ'fwenho, tafwlhi.
18Wet nech'e nekhen lechilalis tä ihoye. Tä nichäte, t'upechehchä pajtha letachol taje honhat, wet tahuyej José wet yok:
–Olhamel onäm ame tsi ohäpehen t'at akawos.
19Mat José nichulho lhamel wet yok:
–Yej nowayhen. Ohanhiyejt'ak owoye m'ak tä Dios niwoyayej amehen. 20Amel lefwetajay lewoyej n'oye m'ak tä ni'isa. Mat Dios itilhkat täjtso yämthilek häpe t'at m'ak tä is, mälhyej tä y'aw'en ifwalasna. Wet wuj wichi isej wet tafwayej lewit'äyhyaj. 21Tä mälhyejtso, yej nowayhen. Ow'enla amhohen äk, amel lhäy'e ales.
Wet tä lhamel iläte José lhämtes tä wuj tä is, iwo letamseka.
Tä tajyäme p'ante wujpe nekchämis, José ileyej honhat
22José lhäy'e lepuhfwas tä lajcha leles, lhamel tujlhache t'at tä ihi Egipto. Wet José hiw'en p'ante ciento diez nekchämis, 23wet lechetsos tä Efraín leles tajpe wet hiw'en. Häte José tachuma lechetsos tä Maquir leles. Maquir lajcha häpe José lhäs tä lechunkatsek, Manasés.
24Tä ifwala elh p'ante José tahuyej lechilalis wet yok:
–Athana tatäy lhimphaj wet oy'inhila. Mat Dios nämla amehen wet tach'otla amehen, wet lhamlak itonphä amel wet ihänla amehen honhat tä lham pajche ifwenho Abraham lhäy'e Isaac lhäy'e Jacob.
25Wet José ne'tek Israel leles hit'unhatche lhämet tä iwoyeje. Yok:
–Matche tä Dios nämla amehen wet tach'otla amehen. Wet chik mälhhiyejatso, is chik amel lechäj op'itsek, yej n'äyla kana.
26José hiw'en p'ante ciento diez nekchämis, wet y'il tä ihi Egipto. Wet õy'ilenche kacha tä lenij akäjche wet õ'thatho lehi.
