1Tä mälhyejtso, n'atujlhache yämthilek n'ahäpehen iyhäj tä wak'alh t'at. Isit'ak kamaj y'ehi t'at n'ochufwenyajay tä ichunte tä y'alhaichufwenejen häpet Cristo. Yej n'äple m'ayhay tä pajche y'ahanej ihi, mälhyej n'ochufwenyaj tä yäme tä y'awo lhahusey iyhäja, wet y'aleyej m'ayhay tä ihän n'amehen lhat'ilek, lhäy'e täjte nech'e y'at'ekhaye Dios, 2lhäy'e n'ochufwenyaj tä yäme häpet bautismo, lhäy'e tä õ'ti'pe n'otkweyey häp Dios leles, wok häp tä õyen lhämeta n'op'itseyhay chik inuhikwephäla, lhäy'e n'okalelhthayaj tä t'un. 3Tek y'alhainahhathihila m'ayhayna, mat y'atujlhahichela, chik Dios ihuminche.
4-6Tsi lhamel tä pajche iwo lehusey iyhäja, isi iyej t'at lhamel, wet ikän m'ak tä tälhe Dios, wet ikatej Espíritu tä T'amajchet, wet ikän Dios lhämet tä is, wet nitäfwelej n'okhajyhayajay tä ihichela ifwalas tä itay alhoho. Mat chik lhamel ileyej Cristo, nemhit ihanej iwoyneje yämthilek yachajo tä iwo lehusey iyhäja. Tsi chik mälhyejtso, hätet iwoye chik yachajo tä hip'ajtej cruz häp Dios Lhäs wet itihi wichi leläkwyhanyajay.
7Lhamel hätet iwoye honhat, tä iwompejchä, inät tiyäjo. Wet chik wichi tä tutcheyhen tä ihi teskanejen yachuyaj tä tälho, kalelhäj tä iche t'at Dios lakäpfwayaj tä ihi. 8Mat chik tajlhamat ch'uthanil lhäy'e hon'al tä tälho honhattso, laha ihihit'a. Kalelhäj tä ihi t'at lewit'äyhyaj tä itay alhoho, wet ilepese õ'wunhiyeja.
Kalelhäj tä y'anchäthiyela lhafwayhyaj, tsi y'anukwe t'at n'äyij tä tälhe
9Mat häp amel, ipuhfwas tä oalehumnhay, tej tä oyäme m'ayhay tä oyämetso, mat oyok, Kalelhäj tä lenuyaykwe n'äyij tä is, wet m'ayhay tä isen tä tälhe afwayhyaj i'amejen. 10Tsi Dios häpkhit'a elh tä ni'isa alhoho, wet tek hip'ethathilahlä m'ak tä amel lewoyaye lhäy'e ahumnhayaj tä letiyej lham. Pajche len'älitay ahumnhayajna tä letach'otaye lham laka wichi, wet lelehiyejt'a yäk athana. 11Wet wuj tä owatläk nilhokej amel elh tefwajpejni tujlhache t'at tä hin'älit tä lhay'amkatej yäk nichäte lepes, häpkhilek imälhewek tä lhayäm matche m'ak tä inihihlä. 12Yej alhenay häpeya wichi tä n'etäjwethä, mat tenay lhamel tä iwo lechayaja lhäy'e tä tujlhache, wet ikatej t'at m'ak tä Dios ifwenho p'ante.
13-16Oyäme ayej häpet n'olhämet tä õht'unhatche.
Häp hin'ol, chik iwoye lhämet chik häpe wet yäme tä matche lhämet, iwo lheya elh tä lewujyaj inu'pe, yämthilek ikalelhät tä matche. Wet chik wichi tatayejwek lhämtes, iwatläk iwo lheya elh tä lewujyaj ihi, yämthilek hit'unhatche lhämet tä iwoye, wet nech'e ileyej tä yämwethä lhamhomche. Mat tä Dios ifwenho p'ante lhämet Abraham, iwo lheya lham lhey tä hit'untejche lhämet tä iwoye, tsi newache elh tä lewujyaj inu'pe yämthilek ikalelhät. Yok, “Olham matche tä wuj tä otihla amej okäpfwayajay tä isen, wet oyämla wujpey wichi tä häpe ales tä tälhila ame.” Wet tä Abraham tujlhache, tek lhailhaklitlhi tä inihich'oye, häp tä ikatej t'at m'ak tä Dios ifwenho p'ante.
17Wet y'aw'en tä wichi tä lewuhuyla häp m'ak tä Dios ifwenho p'ante, lham t'uhläk wuj tä hin'ältejen lhamel tä kalelhäj t'at m'ak tä lham yenlhi, tek iwo elha lhämet tä pajche iwoye. Häp tä tamenej tä iwo lheya lham lhey tä hit'untejche lhämet.
18Tä mälhyejtso, iche täkwfwas m'ayhay tä Dios iwoye. Iche lhämet tä hit'unhatche tä ifwel n'amhohen, wet äp iwo lheya lham lhey tä iwoye lhämettso. Wet tä y'ahanej tä kalelhäj t'at m'ayhayna, lhäy'e tä Dios ihanhiyejt'a chik w'et yämlhi, häp tä wuj tä ikhajyen häp n'amel tä y'alethane lham wet y'achaye tä itihlat n'amejen m'ak tä ne'tek y'anihihlä. 19-20Wet lhanihayajna, häp tä itsoklhi lhahusey wet kalelhäj t'at, hätet iwoye lecha tä ihi barco. Chik lewos ithatchä, itsoklhi t'at lehi wet tek yikch'oye tä ihi. Wet elh tä lhanihayaj iyeji häpe t'at Jesús, häp lham tä tiyäj w'echehi lep'ot tä tumejlä Dios Lew'et tä ipuleye, wet iwo lhan'äyija. Lham nech'e häpe Sacerdote tä Lhamya yämlek tiyäj'attsiy, mälhyet iwoye Melquisedec p'ante.
