Jesús häpe elh tä lhayen Lewoyayej Dios lhämet tä hit'unteji m'ak tä inech'aynhi tä iwoye
1M'ak tä lhamya tä laha ihi tä oyäme, häpe t'at täja tä oyok: Iche n'amel lhaka Sacerdote tä Lhamya, tä häpe elh tä oyämene. Lham itayphä tä ipuleye, ihi t'at Dios tä N'owujtaj leniyatyaj lhip tä lefwomkat, 2wet yenlhi lechumet tä ihi Dios Lew'et tä T'amajchet, wok oyok, Dios Lew'et tä lhamya tä häpe Lhawuk lhenek, häpkhit'a hin'ol lhenek.
3Häp elh tä Sacerdote tä Lhamya, õyen häpeya elh tä lewo yämthilek yachaje Dios n'otw'ayhtes tä tälhe wichi, lhäy'e tshätäy tä õ'länhenpe n'och'isukyajay. Tä mälhyejtso, Jesús häte iwohiyet'ak newache m'ak tä lham yachaje Dios.
4Chik lham kamaj ihí honhatena, tek lew'et ihiyeji yämthilek häpe sacerdote. Tsi ichehen kana sacerdotes tä yachaje Dios n'otw'ayhtes tä tälhe wichi, mälhyej tä Ley p'ante tälhe Moisés ne'tek õ'woye. 5Mat m'ak tä lhamel yen lechumeta häpkhit'a m'ak tä lhamya, häpe t'at m'ak tä ipuleye lepeykas t'at. M'ak tä tamenej tä y'ahanej tä häpe lepeykas, häp tä Moisés eyte yenhilhi p'ante Dios lew'et tä ihonhatena, Dios ifwenho p'ante wet yok, “Nilhokej m'ak tä lhenlhi, äm kalelhäj tä letech'aynej t'at täjnaj opäyen ame tä lhe'pe chenaj.” 6Mat athana n'amel lhaka Sacerdote tä Lhamya tä häpe Jesús, Dios hiw'enho lechumet tä lhäy'e lhip tä laha ihi. Tsi hip'ajtej wichi häp Dios, häp tä lhayen Lewoyayej Dios lhämet tä hit'unteji m'ak tä inech'aynhi tä iwoye. Wet lhämettso lhäy'e lhip tä laha ihi, tsi ifwel n'amhohen tä häpkhilek lhäy'e lhip tä n'aisej.
7Chik Dios lhämet p'ante ichun hi'isyenhi wichi, tek iwatläk iche elh tä nech'ayek. 8Mat tä Dios hiw'en tä wichi niwoyaye, yen tesayej wet yop'antekwe:
“Nämla fwalas tä oyenhilhila
elh olhämet tä nech'ayek
chik owohiyejela wichi tä Israel lhayis
lhäy'e Judá lhayis.
9Tek hätehla iwoye olhämette owoyeje lechätilis,
tä otsok takwey tä otälhtho honhat tä Egipto.
Mat tä lhamel niwoyaye olhämet,
olham oleyejte lhamel, yokwe Lhawuk.
10Mat chik fwalas tä itay alhoho,
olhämet tä owohiyejela Israel lhayis häp täja:
Otiyäjaynhihola letichunhayajay häp olhämtes,
wet olesaynhihila lehusey.
Wet ohäpkhila laka Dios,
wet lhamel häpkhila oka wichi.
11Nemla iwatläk elh ichufwenej
lepuhfwa wok elh at chik häpe
häpkhilek nitäfwel n'oyej tä ohäpe Lewuk.
Tsi nilhokhiyeja lhamel chik nitäfwenhila n'oyej,
elh tä laj len'ohyaja
yäk nichäte elh tä len'ohyaj ihi.
12Otäyhthiyeja m'ak tä ni'isachehen tä iwoye,
wet nemla oyen tichunhayaja lesukyajay.”
13Tä Dios yok, “Oyenhilhila elh olhämet tä nech'ayek”, hin'älit tä yen häpeya lewumek elh p'ante ichun. Wet m'ak tä lewumek hich'ut t'at, wet tott'a alhoho lewhäy wet nofwila.
