Dios lehumnhayaj tä itiyej laka wichi tä äkleyhtses
1Lhawuk yok:
“Täjte Israel lhayis kamaj tet iwoye n'atfwas,
ohuminte, otonphähte tä ihi Egipto,
otech'aynej t'at che oles.
2Tha tä oyachajlhaho tä ot'äne,
wet nemhit w'et iwoye tä lhaitonte n'ohlä.
Iwo t'ewayhtesa dios lhayis tä kamatachehen,
wet yen n'okhayajayej lecheyälis
häp incienso tä iwunhomche.
3Mat olhamte tä ochunlä oka wichi Israel,
wet äp ochufwenejte lew'ekyaj tä iwoye,
mat lhamel nitäfwenhit'a n'oyej tä ot'uyehen.
4Otonej lhame ohumnhayaj lhäy'e op'altsenyaj.
Otott'ayne och'alos,
otech'aynej n'atfwas tä lelemsas,
wet ot'upeyejchä tä ochunnhen,
5mat lhamel tapinhit'a n'oye.
Häp tä tamenej tä yäpnhiyela Egipto,
wet Asiria lhayenla niyatayej lhamel.
6Õ'tihiyeja n'oka'tshayaj häp lew'etes
wet õ'wasthihichela lelafwey tä tach'opwayhen.
Nofwihena t'at oka wichi,
häp m'ayhay tä yenwethä tä tamenej.
7Oka wichi lajit whäya tä tatay n'ohlä.
Lhamel t'änpe laka dios tä kamatache,
mat tach'othiyet'a.
8“Israel, ohanhiyejt'a oaiwoyneje
che ole amejen, te oaiwomhit'a.
Okalhihit'a che oaitech'aynej
honhates tä lhey Adma lhäy'e Seboyim
täjte owit'äyen.
Ohusek ayen at lhakliya,
op'altsenyaj iyej amhiche.
9Olehathichela owäkw tä oti amejen,
te oyachajihot'alak owasthi Israel.
Tsi ohäpe Dios, ohäpkhit'a hin'o.
Ohäpe Ot'amajchet wet oi'amejen,
wet che onäm amehen,
khit'a che oaitäyhthen.”
10Wichi ihänla Lewuk Dios
wet lham tanhätinhilhila,
tehlat iwoye t'owalhaj,
häpkhilek leles tachettichehen
wet nekhen tä tälhe lhip tä ifwala y'uy wet lhaihutej.
11“Tehlat iwoye afwenchey
tä iteläfwit tä tälhe Egipto,
wet che tälhe Asiria tehlat iwoye hokwinhas,
wet äp oyachajiholat lew'ette.
Olham tä ohäpe Lewuk Dios
olhämet t'at täjtso.”
Dios laka wichi lech'isukyaj
12Lhawuk yok:
“Israel lhayis ilän n'oyej
lhämtes tä kamatachehen
wet iti n'oyej lakafweynhayajay.
Wet Judá lhayis lhaitonte n'ohlä,
tajlhamat lewuk tä takwey lhenek.
