1Israel lhayis nilhokej m'ak tä iwoye lajit lahaya,
tsi iläyejen at leyalh.
Y'ayhatlhatshi t'at lhämtes tä kamatachehen
lhäy'e lech'atkanyajay.
Iwoyeje Asiria niyatyaj
häp lhämtes tä ischehen
yämthilek lhayen puhfwasa,
wet ichene t'ewayhtes tä aceite häp Egipto.”
2Lhawuk itiyej letes Judá lhayis
wet itasnhila Israel.
Yenla letesa lakeyis tä iwoye,
wet äp iwohla lahaya lechumyaj tä ni'isa.
3Tä kamaj nichätahchä,
letes Jacob pajchet wak'alh t'akanyaj
tä iwohiyejela lechila.
Tä thaläkw p'ante wet äp täkleyejlhi Dios,
4täkleyejlhi ángel tä häpe Dios wet ikalhi.
Wet lhafwyhayaj ihi tä iwo chalayejlhi.
Wet täjp'ante ihi Betel,
wet Dios ihoye t'at wet Jacob yämhoplhi.
5¡Matche, Lhawuk Dios tä laj letumfwaya,
häp tä lhey t'at!
6Tä mälhyejtso, Israel lhayis,
amel tä ahäpehen Jacob leles tä lepes lheley,
humin Awuk Dios, ekhaye t'at häp lham,
wet woyaye m'ak tä is alhoho.
7Lhawuk yok:
“Israel lhayis iten Canaán lhayis lakeyis.
Lakaw'awlhanhatchal häpkhit'a m'ak tä matche,
tsi ihumin tä iwo t'akanyaja.
8Lhamel yok,
Matche tä wuj m'ak tä in'oyejen,
wuj okäywet tä ohut lhamejen.
Niwohit täjche ihanej iwoyneje
che tahuy n'oyej tä yok,
Chinaj t'äj tä i'amej
häpkhit'a achumet laha.
9“Olham tä ohäpe Awuk Dios
tälhe täjte lheyayhi Egipto,
yachajiholak oyen awukweya wesas lhipey,
tehlat iwoye täjte oho amehen
tä lheyayhi honhat tä ts'anis.
10Otahuyejte profetas
wet oy'isejte lhip lew'enhay,
wet äp otälhte lhamel olhämtes
tä otech'aynej m'ayhay tä ochufwenej wichi.
11Ihi Galaad dios lhayis tä laj lahaya,
dios lhayis tä kamatachehen.
Ihi Gilgal tä wichi yen n'okhayajayej
w'asetas tä ilänhen.
Mat t'ewayhtesw'etes tet iwoye tuntey tä õ'iskonhen
tä iwhäye yachuyajw'etes.”
12Jacob ilethane p'ante honhat tä Aram.
Tä ihi t'uyehen tson'atas
häpkhilek nilhoke atsinha tä lech'efwa.
13Profeta t'at tä Lhawuk ne'tek itonphä
Israel lhayis tä ihi p'ante Egipto,
wet äp profeta t'at tä t'uye p'ante lhamel.
14Israel lhayis iwäkwyhayen Lhawuk,
häp tä tamenej tä Lhawuk lewäkw ihi.
Häp tä tamenej tä Lhawuk yachajiyela n'olänyajay,
wet iwohla lahayayej leläkwyhanyajay tä itiyej.
