Oseas 4

₁Israel lhayis, lhek ch'ahuyaye

Lhawuk lhämet tä yok:

“Ohunut m'ak tä i'amejen,

amel tä lheyayhi honhatna.

Tsi ihichet'a m'ak tä is alhoho tä i'amejen,

wet ihichet'a n'op'altsenyaj,

wet äp katäfwela n'oyej tä ohäpe aka Dios.

₂Amel let'isejpej lhip akalelhthayaj tä kamatache,

lhäy'e tä w'et lhäm'atwethä.

Äp a'anikoyis wet äp a'etantses,

letäkwyen awuhuy, aneytsehyaj ihihit'a,

wet äp lekänlhache akaläncheyyaj.

₃Wet häp tä honhat tesache wichi tä y'inhen.

Tan'isej t'at itshätäy lhäy'e afwenchey,

lhäy'e w'ahat tä y'inhen tä ihi inät.”

₄Lhawuk yok:

“Isit'a che iche elh

che itiyej letes elh wok ifwone elh.

Tsi amel tä ahäpehen sacerdotes,

häp tä oti amejen ates.

₅Amel lhäy'e profetas

lechäthichela katsi ifwala wok honajche,

wet olham otäyhthila Israel tä ako.

₆Oka wichi nitäfwenhit'a n'oyej,

häp tä tamenej tä noj t'at.

Wet tä amel tä ahäpehen sacerdotes

te letäfwenhit'a n'oyej,

olehat amejen tä letach'ote ochumet.

Wet tä amel nemhit letetshan ochufwenyaj

tä ohäpe aka Dios,

häp tä tehla olham nemla otetshan ales,

pajla'tha nichäte lepes lheley.

₇“Tä lhäy'epej iyhäj sacerdotes,

lhäy'epej lhip lech'isukyaj tä tatayej n'ohlä.

Wet häp tä osohiyeja len'ohyajay tä iti lhamejen,

häpkhilek on'äfwlhatwethä lhamel.

₈Lhamel iwo kotsayej oka wichi lech'isukyajay,

wet häp tä hich'atlhayeje lhamel tä iwo lech'isukyajaya.

₉Otan'isthiyeja wichi häp sacerdotes.

Oyenla letesa lakeyis tä iwoye,

wet äp owohla lahaya lechumyaj tä ni'isa.

₁₀“Lhamel t'ekhihena mat kamaj nichuyuhihena.

Iwohla lakain'oyajaya mat lajit lelesa.

Tsi lhamel ile n'oyej tä ohäpe Lewuk Dios

wet lhayachaje lecheyälis.

₁₁Hat'es itäyhat n'olechowej.

₁₂Oka wichi tay'ätshene lecheyä tä hal'ä

wet nichulhejot lep'eltshayaj.

Tsi lhamel tet iwoye atsinha tä kain'oya,

lakeyis tä iwoye inuhatchetshi lhamel,

wet häp tä ile n'oyej tä ohäpe laka Dios.

₁₃Ihoye len'okhayajw'etes tä i'pe tachenhas

yämthilek iwo t'ewayhtesa lecheyälis

wet iwunho incienso tä ichufwi hal'äy lehupelis.

Häp tä tamenej tä ales tsinhay iwo lakain'oyaja,

wet äp atichey nits'ilkata elh tä iyej.

₁₄Oyenhit'a letesa ales tsinhay tä iwo lakain'oyaja,

lhäy'e atichey tä nits'ilkata elh tä iyej.

Tsi lhamel ihänlhi lakeyis hin'ol

tä iwoye m'ak tä hich'atej tä ni'isa

tä lhaip'ajtej atsinhay tä ihi n'on'okhayajw'etes

tä yen chumyaja lakain'oyaj.

Tä hin'ol iwoynejetso,

wet fwetaj ikäjyenejlhi

laka dios lhayis tä w'enha lhamej,

wet y'isej tä iwo t'ewayhtesa.

Mälhyej'attso tä wichi tä laj lechowhala

nichätho lewit'äyhyaj.

₁₅“Tej tä amel tä Israel lhayis

alekänchiyayej acheyälis,

is che Judá lhayis niteya lewoye.

Yej tiyäjo Gilgal,

wet yej taw'ulhiphä N'omukwehyajw'et.

Wet yej wo olheya Dios tä n'ilataj

tä lewoye ämet che häpe.

₁₆Tsi Israel tet iwoye w'asetaj tä nitch'ahuyaye lewuk.

Nemhit ohanej owoyneje che otihi honhat tä lhäk ihi

che te iwoye tson'atas che ifwihen.

₁₇Lhamel lhayachaje lecheyälis tä w'et t'ekhayehen.

¡Tej t'atni!

₁₈Lew'okw tä iwit'äyen

wet äp yachajlhaho lakain'oyaj.

Laka hin'ol ihumin m'ak tä iwo len'äfwlhiya.

₁₉Leyalhtaj ichäjla lhamel,

wet t'ewayhtes hin'äfwlhatlawethä.