Oseas 5

₁“¡Sacerdotes, lhek ch'ahuyaye olhämetna!

¡Lhäy'e Israel lhayis, lhäy'e n'oniyatyaj wuhuy,

is che letach'ahuwethä tsi amel ates ihiche!

Tä lehoyaye Mispa lhäy'e tachenaj tä Tabor

tä len'okwiyayej acheyälis,

wet tet iwoyek lhähäyayhi niyäkw,

tet iwoyek lheyayhiche hotanajch'oye.

₂Wet tä lehoyaye Sitim,

tet iwoyek lhenlhi amhohen chowej tä pitoj.

Häp tä tamenej tä otihla amejen otasnhayaj.

₃Ontäfwelej Israel wet y'aje m'ak tä lhamel iwoyepej.

Iwo keyayej iyhäj tä ka'olhama wet lhaikänchi.”

₄Tä lhamel iwoye m'ak tä ni'isa,

ikalhihit'ak tapile laka Dios.

Tsi lhamel tet iwoye atsinha tä kain'oya,

wet häp tä tamenej tä nitäfwelayej Lewuk Dios.

₅Tä lhamel lhaichäjwethä,

wet häp tä hin'älit tä letes ihi.

Tä lhamel iwoye m'ak tä ni'isa,

tet iwoyek tanhäphänwethä,

wet Judá lhayis tan'iswekej lech'isukyajay.

₆Lhamel fwetajlat t'ukwe Lewuk Dios,

ichäjla leläy tson'atas lhäy'e w'asetas

yämthilek ilänhen wet hiw'enho tä yen n'okhayajayej.

Mat nilhokhiyet'ala tsi pajche lhaitontehlä lhamel.

₇Nemhit lhay'amkatej Lewuk Dios,

tsi leles w'enha lhamej lajcha.

Wet häp tä che iwel'a nech'e n'äle,

laka honhates nofwila t'at.

₈¡Afwutache tson'ataj ch'u

tä n'oka'tshayajcha tä ihi Gabaa!

¡Is che pitsaje tä tumho Ramá!

¡Yej ch'amkatej N'omukwehyajw'et,

häpkhilek Benjamín lhayis nich'amajayej!

₉Olham ofwenho wichi tä Israel

häp m'ak tä ihiyeja lhamel.

Tsi kalelhäj t'at, äytajichela

che nichäte ifwala tä õ'tihiyeja n'otasnhayaj.

₁₀Lhawuk yok:

“Häp wichi tä Judá lhayis lewuhuy

tet iwoye hin'ol tä y'ayhattshi tuntey

tä pajche õ'tihi línea tä lepes laka honhat.

¡Tha op'ohiyeja'pe owäkw lhamel,

tehlat iwoye tewok tä t'ulhpe honhat!

₁₁Israel nemhit ihanej iwoyehen,

tsi n'okalelhthayaj t'äsche'pe lhamel,

häp tä lhamel lhayachaje

dios lhayis tä kamatachehen.

₁₂Häp tä olhaitech'aynhiyeja mohot tä tuj Israel

wet oyets'äjlawethä wichi tä Judá lhayis.

₁₃“Che Israel lhaiw'en tä t'inhayaj ihi

wet Judá hiw'enla lelätshay,

Israel ihohiyela Asiria

häpkhilek t'alheje lech'otyaj

häp niyat tä lewujyaj ihi.

Tha tejlak tetso thayej,

ihanhiyejt'ala iwoyneje che ichestejen t'inhayaj

wok ichestejen lelätshay.

₁₄Tet iwoye t'owalhaj tä inuye m'ak,

tehlattso che onuye Israel lhäy'e Judá.

Olhamlak owo lhipeya,

che oleyej, wet ochäjitshila

wet niwohit täjche isohla n'oyej.

₁₅“Oyäpnhiyelat lhip tä oyen w'eta,

pajla'tha lhamel nitäfwenhiyeja lech'isukyajay tä iwoye

wet t'uhla n'okwe.

Tsi che lelhakli ihi, wet t'uhla n'okwe.”