Isa 11

₁David leniyatyaj hätet iwoye hal'ä tä õyiset.

Mat mälhyej tä letälhes

lhäy'e lhachal tälho lefwettsil,

mälhhiyejatso niyat tä nech'ayek

tälhiyela lhamel tä letes p'ante David.

₂Wet Lhawuk laka Espíritu

yikhit'alach'oye tä i'pe,

wet iwohla lehanyaja lhäy'e tä lehusek ihi,

wet letäfwnhayaj ihi lhäy'e lakhajyhayaj.

Wet itihiyejpeja len'okhayaj Lhawuk

wet iwohiyela lhämtes.

₃Matche, ihumnhila tä n'okwiyej Lhawuk

wet iwoye lhämtes.

Wet iwohit'ala lakalelhthayajayejpe iyhäj

häp m'ak tä tatelhoy hiw'en

wok m'ak tä wichi yäme.

₄Yämla is alhoho lakalelhthayaj

tä itiyej wichi tä p'elitses,

wet tach'othiyela lhamel

tä newache lech'otyaj tä ihi honhat.

Lhämtes hätehlat iwoye hal'äk õ'päjejlhi hin'o,

wet ilänhiyeja leyalh tä tälhche lak'aj

häp wichi tä ni'isahen.

₅Tek itihiyeja kanhi häp m'ak tä is alhoho

lhäy'e m'ak tä matche.

₆Wet chik mälhhiyejatso,

tson'ataj lhäs ihlawhäye m'awotaj

wet letamsek ihi t'at.

Wet kayla lhäs iwohlat t'elakw'etawhäye hay'äj,

wet w'asetaj lhäs lhäy'e t'owalhaj

ihlawek tä lhaichihelthen,

wet tach'anlhahiyela han'äfwaj chik yikchufwi.

₇Wet w'asetaj lhäy'e sulaj lhayenla t'unfwasa,

wet leles imählawek.

Wet t'owalhaj tufwila hup,

hätehlat iwoye w'asetaj.

₈Wet han'äfwaj tatsiteyhiyeja

chowej tä amlhäj ihi

wet y'uyitche takwey.

₉Wet ihichet'ala elh chik häpe

häp lhamel tä ihi chenaj tä ot'amajchet

chik iwit'äyen m'ak at chik häpe.

Mat hätehlat iwoye lewomekitaj,

inät tapoyej tä ihi,

mälhhiyejattso honhat tapoyejej

wichi tä nitäfwelej Lhawuk.

₁₀Wet häp ifwalatso niyat tä nech'ayek

tä tälhiyela letes David,

neyhiphäla tä häpe n'otetnek

yämthilek wichi tä ihiche honhates hiw'en.

Wet lhamel ihohiyela,

wet lewujyaj tä isi ihihila häp lham lew'et.

₁₁Wet häp ifwalatso

Lhawuk yachajiholak hin'älit lakhajyhayaj,

wet lhayenla Lewuka iyhäjfwas laka wichi,

wet inachajila tä tälhe Asiria lhäy'e Egipto,

lhäy'e tä tälhe Patros, lhäy'e Etiopía,

lhäy'e Elam, lhäy'e tä tälhe Babilonia,

lhäy'e Hamat, lhäy'e tä tälhehen

honhates tä iwhäye lewomekitaj.

₁₂Wet hin'älthila m'ak tä yen letetneka

yämthilek wichi tä i'pe honhat hiw'en

tä lham nech'e yachajo tä ihutwek

häp Israel lhayis lhäy'e Judá lhayis

tä ifwtsatpehen honhat.

Lhamel tälhiyela tä ifwala tälhche,

lhäy'e tä ifwala y'uy,

lhäy'e tä tafwojhiye,

lhäy'e tä tapinhiye.

₁₃Wet Israel lhayis t'äytenyaj nemla iche,

wet Judá letayhfwas nemla iche.

Israel lhayis nemla y'äytene iyhäj tä tälhe Judá,

wet häte lhamel nemla yen letayhfwasa Israel lhayis.

₁₄Wet lhamel lhaip'ajthilawek

wet inuye Filisteo lhayis tä ihi tä ifwala y'uy,

wet lhaithathiyejahchä lhamel laka chenhas,

hätehlat iwoye iyhäjkottaj

tä lhaithatejchä lelänek.

Wet lhamel isohiyejawethä lakäywet

häp wichi tä ihi tä ifwala tälhche,

wet lhayenla lewuhuya häp honhates

tä Edom lhäy'e Moab,

wet yenla lakawosa häp Amón lhayis.

₁₅Lhawuk yämla y'im häp Lewomekchät,

wet ipiynhila'pe takwey tewokitaj Éufrates,

ichenhiyela yafwthitaj tä äytaji

yämthilek lhaiw'enhathen siete tewok lhayis,

wet wichi yisthihola

wet ilanhichet'a lenisähes, tsi pitojit'ala.

₁₆Wet chik Lhawuk laka wichi lhipna

tapil chik tälhe Asiria,

ihichela n'äyij chik lhamel inukwe,

hätehlat iwoye Israel lhayis tä tälhe p'ante Egipto.