Isa 15

Häp honatsi tä õ'wasthi honhat

tä hupuy ihi tä lhey Ar,

lewit'äyhyaj ihi Moab.

Häte iwoye äp õ'wasthi tä honatsi häp Kir,

Moab tatäy.

₂Wet häp wichi tä lew'et Dibón

lhamel ihoye chenhas tä yen n'okhayajw'eta

yämthilek tafwchehchä.

Moab hip'altsen Nebo lhäy'e Medeba tä wasiche,

wet nilhokej wichi tä õyisetchehen

lew'oley lhäy'e lepäsey.

₃Lhamel taw'uyhiche lew'uyis tä yelaj

tä inukwehen hupuy kawayhil,

wet tä iche'pe lewukwey lhäy'e tä ilunwethä,

lhamel t'änwethä wet wuj tä lhafwyhayaj ilänhen.

₄Hesbón lheley lhäy'e Dios Wujyaj lheley,

lhamel t'alhch'oye n'och'otyaj,

wet wichi tä ihi Jahas

iläte t'at lhamel tä t'änwethä.

Häp tä tamenej tä Moab kanifwotaj

wuj tä inuhat lhamhohen

wet tachettiyejche lenowayhyaj.

₅Olham wuj tä op'altsen Moab,

tsi wichi tä ihi yikhen tä ilethanhen

pajtha nichäte honhat tä Zoar

lhäy'e Eglat-selisiya.

Lhamel tafwchehchä tä iho'pe

lhip tä atojphä tä lhey Luhit,

wet iyhäj tä inukwe n'äyij tä ihoye Horonaim

wuj tä t'änwethä tä hiw'en hupuy tä wasiche.

₆Häp inät tä ihi Nimrim y'imche wet tamchäy hon'al.

Hal'äy y'il t'at wet niwohit hal'äk w'atshan.

₇Häp tä tamenej tä wichi

tachuma lakäywetes wet yikhen,

wet tiyäj w'echehi tewok lhäsaj

tä wuj sichuyuk ihi.

₈Mälhewek honhat tä Moab

tä n'olhafwyhayaj tume,

wet wichi tä ihi Eglaim

lhäy'e Hal'äytas Pek iläte t'at.

₉W'oyis nitsäyhihomchela inätes tä ihi Dimón,

tsi ochenhiyela lewit'äyhyaj

tä lhäy'e lhip tä ni'isa.

Häp wichi tä yikch'oye Moab tä ilethanhen,

t'owalhas tä fwitses tufwihena,

lhäy'e wichi tä imälhehi honhat.