Isa 27

₁Ifwalatso Lhawuk itihiyeja letasnhayaj tä wuj

häp Leviatán tä häpe amlhätaj

tä tatsaylhi tä yik wet äp iläfwel.

Matche, itasnhiyeja lefwajnhat

tä tanhoch'ay wet äp takhajay,

wet äp ilänla m'akitaj tä ihi lewomekitaj.

₂Wet ifwalatso Lhawuk yohlak:

“Wo atenekayej olafwek tä oka uvas ihi.

₃Olham tä ohäpe Awuk Dios ot'uye t'at

wet wuj tä otsäype inät.

Ot'uye tä ifwala lhäy'e tä honatsi

yämthilek lewit'äyhyaj newache.

₄Tek otwäkwäye, mat chik iche

ch'uthanil lhäy'e hon'al chik ihi,

ottayhlahlä wet owunhihola.

₅Chik lewatläk ot'u ame

yämthilek newache awit'äyhyaj, a'isyen n'oye.

Oyachajo, oyok, a'isyen n'oye.”

₆Häp ifwalas tä tatay alhoho,

Israel lhayis, häp wichi

tä tälhe letes p'ante Jacob,

lhamel iwohla lefwettsila,

wet iwohla letälhesa,

wet iwohla lhawoya,

wet lhay tapohiyeja honhat.

₇Dios itasin Israel,

mat tek itech'aynej tä itasin

wichi tä ilhaklit lhamel.

Wet ilänhihent'a Israel

mälhyej tä ilänhen wichi tä ilänhen lhamel.

₈Mat tä Dios itasin laka wichi,

ichene honhat tä kalew'eta,

wet leyalh tä äytaji ihutej kanhi,

hätet iwoye yafwthitaj

tä tälhche tä ifwala tälhche.

₉Mat itäyhthiyeja letes häp Israel

chik lhamel iwoye Dios lhämetna tä ne'tek iwoye:

Is chik iwo lemoka laka altares tä ni'isa,

wet is chik iwasthiche hal'äy

tä dios tsinha tä lhey Asera lepeykas,

lhäy'e altares tä iti'pe incienso tä iwunho

tä iwujyenej dios lhayis tä kamatachehen.

₁₀Nemhit is hupuy tä takhajayhen,

hätet iwoye n'owukwe tä õyikch'oye,

wet hätet iwoye ts'anis, wichi ihihit'a.

Itshätäy yen at lhäkw'eta,

wet tufw hal'äy pesey wet imähen.

₁₁Hal'ä lhachal ichähen tä tamchäy,

wet atsinhay ihutwek wet yen lhetesa.

Tä niwohit m'ak chik Israel lhayis ihanej,

häp tä tamenej tä Dios tä lhenek lhamel nip'altsena.

₁₂Wet ifwalatso Lhawuk isekhiphäla m'ayhay,

tälhiyela tewok tä wuj tä lhey Éufrates,

pajla'tha nichäte tewok tä tumejlä Egipto,

hätehlat iwoye hin'o chik isekphä trigo.

Mat amel, Israel lhayis,

Lhawuk tachumla amehen aelh weihalhapej.

₁₃Wet ifwalatso õyafwuthichela

tson'ataj ch'u tä lhamya,

wet wichi tä ifwtsatpehen honhat tä Asiria,

lhäy'e iyhäj tä õ'häne honhat tä Egipto,

nilhokej nekhihena yämthilek

n'okwiyej häp Lhawuk tä i'pe

chenaj tä t'amajchet tä ihi Jerusalén.