Isa 40

₁“Khajyen oka wichi, khajyen lehusey”,

yokwe lhaka Dios.

₂“Äm is ämtes tä lhämhoplhi Jerusalén.

Fwenho tä noj tä wichi tä w'enhache lhamej

yäm äytajche lechumyaj häp oka wichi.

Pajche iwo lahaya m'ak tä ni'isa wet noj letes,

tsi lhamel pajche ikatej otasnhayaj tä wuj

tä lech'isukyajay tamenej.”

₃Pitsaje hin'o lechos tä t'än tä yok:

“Waklhatache Lhawuk len'äyij tä inukwe ts'anis.

Enhoplhi lhaka Dios n'äyij tä tuntey tä tsajche

tä inukwe honhat tä wichi newahi.

₄Pothomche tä pitosomche,

ayhatchehchä chenhas tä atoschephä,

lhäy'e honhat lhipey tä takotsochephä,

häpkhilek w'awulhchä.

₅Wet chik mälhyejtso,

Lhawuk hin'älthila lewujyaj

wet nilhokhiyeja wichi tä hiw'enla.”

Lhawuk lham t'at tä iwoyetso.

₆Iche n'opak tä yok, “Än.”

Wet olham oty'ätshane tä oyok,

“¿Chi owoye tä ot'än?”

Wet lham yok, “Okwe,

Nilhokej hin'ol hätet iwoye hon'al,

wet len'ohyajay hätet iwoye hal'ä lhawo.

₇Hon'al tamchäy wet lhawo natchä

tä Lhawuk laka yafwthitaj inu'pe.

Matche tä wichi hätet iwoye hon'al.

₈Tä tamchäy hon'al, wet lhawo natchä,

mat häp lhaka Dios lhämet tatäyhit'a

pajla'tha tiyäj'attsiy.”

₉Am tä lefwenho Sión häp n'osilätyaj tä is,

ho'pe chenaj tä atojphä

wet fwitsenej tä let'än.

Am tä lewo silätayej Jerusalén häp m'ak tä is,

fwitsenej achos, yej noway.

Wo siläta honhates tä ihi Judá,

is chik lhok, “¡Lhek yahinlä aka Dios!”

₁₀Nek Lhawuk Dios tä lakhajyhayaj ihi

wet tiyäjo leniyatyaj,

wet inachaj laka wichi tä pajche ifwayhat.

₁₁Hätet iwoye tson'ataswo tä t'uyehen leläy,

wet ineyhatchephä tson'atas les

wet tatsufwelej tä ichäj,

wet t'uyehen tson'atas lakolis.

₁₂¿Atsi tä hiw'awlhatho takwech'o häp lewomekitaj,

wet hiw'awlhatej lefwus häp pule lhayis?

¿Wet atsi tä iwo kaw'awlhanhatayej

holo wok chenhas?

₁₃¿Wet atsi tä itetshan m'ak tä iwoye häp Lhawuk,

wok ichufwenej m'ak tä is chik iwoye?

₁₄¿Atsi tä yämhoplhi

yämthilek letäfwnhayaj ihi?

¿Atsi tä ichufwenej

yämthilek is alhoho lakalelhthayaj?

¿Atsi tä ichufwenej lehanyaj?

₁₅Nilhok wichi tä i'pe honhat,

tä ihi tä Dios tatache

hätet iwoye inät tä nitsäyhchä tä yok käm,

hätet iwoye honhat mok tä i'pe n'okaw'awlhanthi,

wet lhiletas hätet iwoye holo sajyhi tä lhämsaj.

₁₆Itshätäy tä ihi chenhas Líbano

w'awulhiyejt'a yämthilek õ'länhen

tä õyen n'okhayajayej Lhawuk.

Häte hal'äy tä n'olhetes w'awulhiyejt'a.

₁₇Nilhok wichi tä i'pe honhat inuhit'a'pe Dios,

wet mälhyet iwoye m'ak chik newache.

₁₈¿Atsi m'ak tä letech'aynej Dios,

wok atsi n'ocheyä tä lhäme tä w'awulhi Dios?

₁₉Häpet n'ocheyä, hin'o t'at tä lhenek,

wet elh yenlhi plata tä yen cadenasa

wet y'ilenejlhi oro.

₂₀Hin'o tä yenlhi n'ocheyä

tachumat hal'ä tä t'un,

wet t'ukwe elh tä lehusek ihi

yämthilek yäm t'unhi wet tek nichät kanhi.

₂₁¿Hä amel lehanhiyejt'a wet leläthiyet'a?

¿Hä tek õ'fwel p'ante amhohen tälhe tä iwo tesa?

¿Hä lehanhiyejt'a tä Dios yenlhi p'ante honhat?

₂₂Lham t'at tä leniyatyaj

i'pe pule tä honhat ichufwi,

wet hiw'en wichi tä hätet iwoye pänä lhayis.

Wet lham t'at tä hich'enhi pule hätet iwoye wesaj,

wok hätet iwoye carpa tä õhch'enhi tä õyen wukweya.

₂₃Yen häpeya m'ak tä lajit lahaya

häp hin'ol tä n'owustas,

wet itäyhat niyatey tä i'pe honhat.

₂₄Hätet iwoye n'okäs tä õ'tihchä.

Tä kamaj tek atoschehchä

lefwettsil tä tiyäjo honhat,

wet Dios leyalh inu'pe lhamel,

wet yofwajkwet tamchäy t'at,

wet yafwthitaj tä äytaji ichäj,

mälhyej chik huphas.

₂₅Dios tä N'ot'amajchet yok:

“¿Atsi elh tä amel letech'ayen n'oyej?

¿Atsi elh tä häte iwoye olham?”

₂₆Lhek yahinay puleye,

¿Atsi elh tä lhenek nilhokej katetsel?

Häp elh tä hiw'enhatejen elhpej

m'ak tä häpe wet iwo lheyisa.

Häp elhtso wuj tä lakhajyhayaj ihi

wet niwohit elh lhamel chik tatäy.

₂₇Jacob kawichi Israel lhayis,

¿chipte tä lefwetajay

Dios aknitetshana wet lhoyaykwe:

“Lhawuk tek t'uhläk tach'ot n'amehen,

Dios tek iwatlä n'amel”?

₂₈¿Hä lehanhiyejt'a wet leläthiyet'a?

Lhawuk häpe Dios tä n'ilataj,

wet lhenek imälhewek honhat.

Ihanhiyejt'a chik yok, “Oy'el”,

wet lepes ihichet'a lehanyaj.

₂₉Lham ikhajyen hin'o tä y'el,

y'isej lhip lakhajyhayaj

häp hin'o tä nitkhajaya.

₃₀Mamses ihanej tä y'enhen,

wet hin'ol tä takhajayhen

ihanej tä nichätche katsi.

₃₁Mat häp wichi tä t'ekhaye Lhawuk,

tek tatäyhla lakhajyhayaj,

wet ihanhiyeja chik wey'ä,

hätehlat iwoye iyhäjkottaj.

Chik inukwe len'äyij wok inukwe alhoho,

mat tek y'enhen.