Isa 41

₁Lhawuk yok:

“Woyay atamsekisa wet ch'ahuyay n'oye,

nilhokej amel tä lheyaype honhat.

Akhajyenhen wet hoyay n'oye

yämthilek y'ämejwethä m'ayhay.

N'alhaihutwek häpkhilek kalelhäj

elh tä lhämet matche.

₂¿Atsi tä ikhajyen häp niyat

tä lew'et honhat tä ifwala tälhche

yämthilek ikalhipej letayhfwas?

¿Wet atsi tä ikhajyen

yämthilek ikalhi honhates

lhäy'e wichi tä ihiche,

wet niyatey lewuk t'at,

wet iwastejiche lefwajnhat lhäy'e lech'ähal,

wet ifwtsatkatpe honhat häp wichi?

₃¿Wet atsi tä tach'ote tä takähännhej lhamel,

wet newache lewit'äyhyaj,

wet iläfwel, mälhyej chik wey'ä'pe honhat?

₄¿Atsi tä iwoye täjtso?

¿Wet atsi tä t'äne wichi tälhe tä nech'enyaya?

Oyok, olham t'at, tä ohäpe Awuk Dios, ihichet'a elh.

Olham ohäpe Elh tä ichun

wet ohäpkhila Elh tä lepes.”

₅Wichi tä ihiche honhates,

wuj tä lhamel nowaye tä hiw'en,

wet imälhewek honhat tä w'ahuye,

wet wichi lhaip'ajtitwek wet nämhen.

₆Wet elh tä yenwethä n'ocheyälis,

hich'atlhayejlhi elh wet yok, “Akhajyen.”

₇Wet elh tä yen chumeta hal'äy

wet yenwethä n'ocheyälis,

hich'atlhayejlhi elh tä yenwethä m'ayhay tä oro,

wet elh tä iphutyenche'pe m'ayhay

tahuyej elh tä ikäji chinaj

tä iti'pe lakäjnhawet, wet yok:

“Matche tä is, satwek m'ak tä lhenlhi.”

Wet nech'e hit'unthi n'ocheyä

wet ikäjejo clavos yämthilek nichäta kanhi.

₈“Mat amel tä ahäpehen okawos Israel lhayis,

amel t'at tä ottshupihte amehen,

wet ahäpehen t'at leles häp okalay'i Abraham.

₉Olham tä otonphä amel

tä letälhaye lepes honhat,

wet ot'än amehen tä lheyayhi

lhip tä wuj tä atofwe

wet oyok, Ahäpe okawos,

olham tä ottshupi amehen wet oay'ulhanhit'a.

₁₀Yej nowayhen, tsi oi'amejen.

Yej lhak'alwethä, tsi ohäpe aka Dios.

Ow'en amhohen akhajyhayajay,

otch'ot amehen wet otsok amejen otkwey tä takhajay.

₁₁Nilhokej wichi tä n'äyi amhohen

len'äfwlhi ihiyeja, w'et m'ayhayla t'at.

Lhamel tä tatay ahilä nofwiyeja, nemla ichehen.

₁₂Lefwetajla let'ukwe atayhfwas,

mat lelhokhiyet'ala.

Wichi tä iwo ka'tshayaja amejen

hätehlat iwoyek newache.

₁₃Tsi olham tä ohäpe Awuk Dios

otsok t'at akwey wet oyok,

Yej nowayhen, otch'ot amehen.

₁₄“Jacob kawichi Israel

tä ahäpe wichi tä niwuja

wet akhajyhayaj ihihit'a,

yej nowayhen, olham t'at tä otch'ot amehen”,

yokwe Lhawuk, Afwayhthi,

Israel laka Dios tä T'amajchet.

₁₅“Oayen häpeya osapkanhatcha

tä nech'ayek wet äp y'uyhen,

wet lesapla'pe chenhas wet lhenla holoya,

wet letech'aynhiyeja hal'ä w'oley tä tamchäy

häp chenhas tä ni'tosachephä.

₁₆Letsäyhiphäla wet yafwthitaj ichäjla

wet ifwtsatkatla'pe honhat.

Wet chik mälhhiyejatso,

lewohla akäjyaja n'oyej tä ohäpe Awuk Dios,

wet lewujyenlan'o tä ohäpe Dios tä Israel T'amajchet.

₁₇“Wichi tä niw'ena m'ayek

wet newache m'ak chik isej,

lhamel fwetaj t'ukwe inät mat nilhokhiyet'a,

wet wuj tä tamchäy lepänhi tä ichimhen.

Mat olham tä ohäpe wichi Lewuk otch'othiyela lhamel.

Olham, Israel laka Dios, olehiyejt'ala lhamel.

₁₈Otälhthihola tewok lhayis häp chenhas tä ts'anis,

wet ts'ifwik lhayis ihihila lakawayhil.

Oyenla inätw'etesa ts'anis,

wet otihihila inät n'äyhäy

häp honhat tä tamchäy,

₁₉wet pänhichetek lhayis

lhäy'e hal'äy tä wus tä lehupelis ihi,

lhaichihelthihena tä ihi honhat tä ts'anis.

₂₀Häpkhilek wichi hiw'en wet ihanej

wet yen tichunhayaja tä olham Dios,

Israel T'amajchet, häp tä olhenek.”

₂₁Dios tä Israel laka Niyat yok:

“Lhuyay, n'ocheyälis,

fwel n'oho ämet chik matche yämthilek aisej.

Chik iche m'ak chik lhäme tä is alhoho,

lhek päyen n'oye.

₂₂Hoyay alhoho, woyay siläta n'oyejen

m'ak tä tatay alhoho,

wet íthat n'ohohen m'ayhay tä tajyäme,

häpkhilek olhamel otch'ahuye.

Fwel n'ohohen m'ayhay tä ihichela,

häpkhilek olhamel ohanej m'ak tä mälhhiyeja.

₂₃Hanhat n'oyejen m'ayhay tä tatay alhoho,

häpkhilek olhamel ow'en tä matche,

ahäpehen t'at dios lhayis.

Woye m'ak tä lekalhi,

m'ak tä is wok ni'isa,

enlhi m'ak tä istun n'ohen,

häpkhilek olhamel wuj tä onowaye.

₂₄Mat oyok, ¡niwohit m'ak chik ahäpehen,

wet niwohit m'ak chik lehanej lewoyneje chik lhenlhi!

Wet wichi tä tatshupi amehen

lhayen at häpeya n'ot'ulhnhay.

₂₅“Olham okhajyen hin'o tä ihi

honhat lhip tä ifwala tälhche.

Ot'äne, owo lheya,

wet nek tä tälhe honhat lhip tä tafwojhiye,

wet t'äsihila niyatey hätehlat iwoye iyhät.

Hätehlat iwoye hin'o

tä yenwethä m'ayhay tä iyhät

wet t'äsi iyhät.

₂₆¿Atsi tä yen silätyaja täjtso

häp ifwalas tä tajyämetso, yämthilek y'ahanej?

¿Wok atsi tä yen p'ante silätyaja yämthilek y'ok,

Matche m'ak tä yen lhämeta?

Ihichet'a elh amel tä ahäpehen

dios tä n'otkwey lhenhay chik lhen asilätyaja.

Ihichet'a elh chik wichi iläte tä yen lhämeta.

₂₇Mat olham tä owo silätayej Sión tälhe tä pajchey,

wet olham t'at tä ochenehte

oka silätwo häp Jerusalén,

yämthilek ifwenho tä wichi

tä lew'et Jerusalén nämhihena'thahya.

₂₈Mat ow'enhit'a elh chik häpe dios lhayis,

wet tä oty'ätshanej m'ayhayna,

ihichet'a elh chik nichulh n'oho

wok ifwel n'oho m'ayek.

₂₉Elh tefwajpejni lhamel niwohit m'ak chik häpe,

niwohit m'ak chik ihanej iwoyneje chik yenlhi,

tsi niwohit m'ak chik ihiche.