Õyen silätyaja Jerusalén lefwayhyaj
1¡Jerusalén, nephä, akhajyen, yej lemä!
Jerusalén, hupuy tä n'ot'amajchet,
w'uyhi haw'uy tä isilataj,
tsi wichi tä akachuhantses
tä lakokhayaj ihi nemla näm ame.
2Nephä, Jerusalén, sichätchä honhat tä i'amche
wet tayhiphä aniyatyaj.
Amel tä Jerusalén lheley tä õyen lhäytshaya,
tiyej kanhi m'ak tä choyhat tä õyäytejen haw'ol.
3Tsi Lhawuk lhämet yok:
“Täjte wichi aichäj,
niwohit m'ak chik tiskanej atapehen.
Wet mälhhiyejattso, chik oaifwayhthen
owohit'ala lahayayej lhamel.”
4Wet Lhawuk Dios lhämet yok:
“Tä ichunte oka wichi ihoye Egipto,
wet häpe t'at wichi tä w'enha lhamej tä ihi honhattso.
Wet tä äp paj Asiria äp ilhaklithen.”
5Wet Lhawuk äp yok:
“¿Athana atsi m'ak tä owoye?
Lajit lahaya tä õ'chäje Babilonia häp oka wichi,
wet wichi tä yen lakawosa
lhaichäjejwethä wet t'anhen,
wet ilehiyejt'a tä iläkwlhin'o.
6Mat nämla ifwala tä oka wichi
yachajiholak nitäfwel n'oyej,
wet lhamel ihanhiyeja tä olham
tä ohäpe Lewuk Dios tä oyämhoplhi.”
7¡Matche tä is tä õhw'enlä
hin'o tä tälhpe chenhas,
häp hin'o tä ichäj n'osilätyaj tä is
tä häpe n'otamsek!
Häpe elh tä yen silätyaja n'ofwayhyaj,
wet ifwenho Jerusalén tä yok:
“¡Aka Dios häpe Niyat tä Lhamya!”
8¡Lhek ch'ahuye akasthaynhay t'änyajay,
lhamel t'änhen tä lakäjyaj ihi
tsi hiw'enlä Lhawuk tä tapile Jerusalén!
9¡Lhokayej amel, choywethä wet wunit Dios,
häp amel tä nemhit lheyayhi Jerusalén,
tsi Lhawuk hip'altsen laka wichi
wet ifwayhat Jerusalén!
10Lhawuk hin'älit t'at lakhajyhayaj,
wet nilhokej wichi tä i'pe honhat hiw'en t'at,
wet lhamel ihanhiyeja tä lhaka Dios n'aifwayhthen.
11¡Mäyaych'oye, mäyaych'oye tä lheyayhi!
Amel tä letilhäj m'ayhay tä Lhawuk t'amajchetes,
yej tsok m'ak tä kok'aye.
Yej leyej tä let'amaj amejen,
häpkhilek newa amejen m'ak tä ni'isa.
12Mat athana nemla lekelchetshi tä lhekhen.
Nemla häte iwoye tä lenukwe alhoho tä lelethanhen.
Tsi Lhawuk, Israel laka Dios, ichunla ahilähen
wet imälhehichela han'äyij.
Lhawuk lakawo iteläytej wet äp tafwayej leteläythayaj
13Okawo ikalhihila m'ak tä is.
Lewujyaj ihiyeja wet wichi iwunthila.
14Wujpe wichi pajche inuhat lhamhohen
tä hiw'en tä nemhit häte iwoye hin'o,
nemhit kalelhäj m'ak tä häpe.
15Häte wujla'pe wichi tä ihiche honhates iselthiyejena.
Niyatey tek tahuyhihena chik lhamel hiw'en,
tsi ihanhiyeja tä häpe t'at
m'ak tä nhanayej chik iläte p'ante.
