Sant 5

₁¡Amel tä lew'en m'ayek, huwa, afwchehchä wet änwethä, tsi nichätla atapehen awit'äyhyajay! ₂Akäywet tä i'amejen najuthiche, wet lewos tuj haw'uyes. ₃Aka chinaj t'äj, lech'ohle ilän, wet lech'ohlena häpkhilek ikalelhät amejen ates wet hätehlat iwoye itäj tä aitäyhthen. Lehutaywek akäywet ifwalasna, mat lhek yahinya, häpe t'at lewhäy tä lepes. ₄Wet häp wichi tä lechumyenwethä tä ilanhi yachuyaj, lhamel lakaha tä kaw'enaho tä lekanej lhamel, häp tä t'änej atapehen ates. Wet Lhawuk tä najit letumfwaya iläte t'at t'änyajaytso. ₅Alhenay yalhk'alisayej m'ayhay tä lekän tä i'pe honhat, wet alhätajaynhen amälhyet iwoye w'asetas. ¡Lhek yahinya, näm ifwala tä n'olänyaj! ₆Lhen tesayej wet lelänhen wichi tä is alhoho, wet lhamel ihanhiyejt'a iwoyneje yämthilek iwo haya ahilähen.

₇Mat amel, ipuhfwas, yej lhak'alwethä, wo atamsekisa yäk Lhawuk näm. Lhek tetshan hin'o tä tutchey, inihich'oye ifwala tä lham ichumhiyela lhay tä isis tä tälhe, wet letamsek ihi t'at tä inihich'oye pelhay chik nichätepej lewhäy tä inawop lhäy'e tä chelhchup. ₈Häte amel yej lhak'alwethä, mat khajyenhen ahusey tsi Lhawuk tapinlat thahya.

₉Ipuhfwas, yej alet'ulhnhen, häpkhilek newache ates chik i'amejen. Tsi Dios tä häpe N'okalelhthayajwo ihi t'at lepe.

₁₀Ipuhfwas, yej p'ethatlä profetas p'ante yen lhämeta Lhawuk. Ten t'at tä iwo leteläythayaja, wet ten tä iwo letamseka. ₁₁Tsi wichi tä leteläythayaj ihi mat lhaikhajyenhen, häp tä n'amel y'en isa. Lehanayej Job p'ante, iteläytej t'at leteläythayajay wet lhaikhajyen, wet häte lehanayej tä lepese p'ante Lhawuk itiyej t'at lakäpfwayaj tä is, tsi Lhawuk ihanej tä hip'altsenhen wichi.

₁₂Wet m'ak tä inu'pe täjtso, ipuhfwas, oyok, Chik let'unhatche ämet, yej wo lheya pule wok honhat, wok m'ak at chik häpe. Lhek yahinya, chik lhopejkwe, “Ey'a”, is chik lhäm matche. Wok lhopejkwe, “Kha”, is chik lhäm matche tä lhok “Kha.” Häpkhilek Dios nena tesa amejen.

₁₃¿Hä iche elh amel tä lelhakli ihi? Is chik iwo t'alhyaja. ¿Hä iche elh tä lakäjyaj ihi? Is chik ichoylhi tä iwunit Lhawuk. ₁₄¿Hä iche elh tä t'inhayaj ihi? Is chik t'äne Dios leles tä lhamenya yämthilek iwo t'alhyaja'pe, wet y'ilenche aceite häp tä isej Lhawuk lhey. ₁₅Wet chik lhamel tä iwo t'alhyaja t'ekhahyaj ihi, ichesla t'inhayaj länek. Lhawuk ineyhthiphäla, wet chik iwoyen'aj lesukyajay, Lhawuk itäyhthiyeja.

₁₆Tä mälhyejtso, afwelej amhomche m'ak tä ni'isa chik lewoye, wet wo alhyaja atapehen yämthilek lechesen. Tsi chik elh tä is alhoho lhaimälhtejwek t'alhyaj tä iwoye, wuj tä laha ihi t'alhyajtso. ₁₇Häp profeta Elías häpe p'ante hin'o t'at, mälhyej iwoye n'amel. Matkat tä imälhetwek lehusek tä iwo t'alhyaja tä t'alheje Dios yämthilek niwomahchä, wet nemhit pelhay ihi honhat yäk tres nekchämes lhäy'e seis wel'as. ₁₈Wet tä tajyäme lewhäytso, iwo t'alhyaja tä t'alheje Dios yämthilek iwomchä, wet nech'e pelhay iche häp honhat, wet yachajo tä yachuyaj iche.

₁₉Ipuhfwas, chik elh amel wetayej Dios lhämet tä häpe m'ak tä matche, wet iche elh tä tach'ote yämthilek yäplej, ₂₀hanayej täja. Oyok, elh chik häpe chik tach'ote lepuhfwa yämthilek ileyej m'ak tä ni'isa tä iwoye, ifwayhtej t'at häp t'ilek wet tamenej tä wujpe lesukyajay tatäy.