N'ocheyälis m'ak tälhiyet'a, mat Lhawuk häpe Dios tä matche
1Amel tä ahäpe Israel, ch'ahuyaye Lhawuk lhämet tä ifwel amhohen 2tä yok:
“Yej ten iyhäj wichi lakeyis,
wet yej nowaye n'otetnhay tä n'äleye pule,
mälhyej tä iyhäj wichi nowaye.
3Häp wichitso lakeyis lajit lahaya.
Lhamel yiset hal'ä tä ihi tayhi,
wet hin'o yenejlhi lechumetcha.
4Chik wak'alh, lhamel isilatyenej oro lhäy'e plata,
wet ikäjejo clavos yämthilek nichäta kanhi.
5Häp n'ocheyätso tet iwoye
m'ak tä afwenchey nifwiyaye
tä ihi lhip tä nelom ihi.
Tahuyhit'a lhäy'e tä nit'äsache honhat,
wichi tilhäj t'at.
Yej amel lenowaye lhamel,
ihanhiyejt'ak iwoye m'ak tä is
wok m'ak tä ni'isa.”
6Iwuk, newache elh chik w'awulh amhi.
Ahäpe elh tä takhajay lhäy'e tä lewujyaj ihi.
7Ahäpe wichi laka Niyat tä Lhamya,
wet t'uhawetej chik lhamel aiwujyen.
Tej tä iche hin'ol tä ihanche m'akej tä i'pe honhat,
lhäy'e niyatey tä reyes,
mat ihichet'a elh chik w'awulh amhi.
8Lhameltso tä laj lehuseya
lhäy'e tä nhana honhatejen.
Wohit'a m'akfwaj chik lecheyälis
tä hal'äy ichufwenej lhamel.
9Tsi n'ocheyälistso häpe chinhas, tajlhama.
Häpe oro tä tälhe honhat tä Ufaz,
lhäy'e plata tä tälhe honhat tä Tarsis.
N'otkwey lhenhay t'at, wet hin'ol tä yenchelhi.
Lhamel wuj tä ihanej iwoyneja
tä itech'aynej m'ak at chik häpe.
Chik wak'alh, wet äp õyen w'uyisa
wesas tä y'ithiche lhäy'e tä ifwak'an.
10Mat Lhawuk häpe Dios tä matche, Dios tä n'ilataj,
wet äp Niyat tä nittäya, wet tet lhampej.
Wet chik lham tä lewäk ihi, honhat w'ahuhi
wet wichi tefwayhiyejt'a.
11Amel, Israel lhayis, is chik lefwenho wichi tä i'pe honhat wet lhok:
“Häp dios lhayis tä kamatachehen
lhäy'e tä nenalhi p'ante pule lhäy'e honhat,
n'ocheyälistso nemla i'pe honhat,
nofwiyeja t'at lhamel tä ichufwi pule.”
Õ'wunit Lhawuk
12Lhawuk lakhajyhayaj ihi, yenlhi honhat,
wet lehanyaj tä wuj tä iyej hit'unteji honhat.
Wet tä matche tä ihanej m'ak tä yenlhi,
yäm tsajo häp pule.
13Lepak tä äytaji hiw'ahhathi inät tä ihi pule.
Inuhatphä pules tä tälhe honhat lepesey,
wet yenlhi lep tä nekche pelhay,
wet itälhtho leyalh häp lew'et tä ihi.
14Hin'o isit'a m'ak tä iwoye, ihanhit'a honhatej.
Lham tä ikan lhamej tä yenlhi lecheyä,
tsi khit'a m'ak tä matche wet lehusek ihihit'a.
15Lajit lahaya, n'ot'ischeyek t'at,
nichäthiyela lewhäy chik Lhawuk itäyhat.
16Tsi matche tä tehit'a iwoye Jacob laka Dios
tä lham tä yenlhi nilhokej m'ayhay tä iche.
Wet lham tatshupiye Israel lhayis tä yen laka wichiya,
Lhawuk tä laj letumfwaya häp tä lhey.
Lhawuk yokwesiphäla laka wichi tä ihi laka honhat
17¡Jerusalén lheley,
nech'e nämhen atayhfwas tä inu amehen!
¡Hutwek aka m'ayhay wet mäch'oye honhat!
18Tsi Lhawuk yok:
“Athana olham otfwomhiyeja wichi tä ihi honhatna,
tehlat iwoye tunte tä tälho n'ofwomthi,
wet olhaklitlawethä lhamel.”
19Jerusalén lheley t'änhen wet yok:
“Ch'athit lhamej, athana wuj tä op'elitses,
wet olätshay newache elh chik iwo lechaya.
Täja olhamel t'at tä ot'inhayaj,
wet häp tä is tä oteläytej t'at.
20Lhawukwey wasiche wet lhaw'etes nofwej t'at,
wet oles äp yik n'ohlä, nem in'oyejen,
wet newache elh chik ineyhatchephä owukwey.”
21Wet olham oyok:
Häp niyatey tä iyej wichina
laj lechowhala, t'uhikwet'a Lhawuk.
Häp tä tamenej tä lewit'äyhyaj ihi
wet wichi ifwtsatpehen honhat, tet iwoye tson'atas.
22¡Lhek tetshan, näm n'olhämet
tä tälhe honhat elh tä tumej tafwojyhiye!
N'olhämet tä tanhoch'ache,
tsi õyenla ts'anisa häp Judá lew'etes
wet m'awolis lew'etla t'at.
Jeremías iwo t'alhyaja
23Iwuk, ohanej t'at tä tek ikatsi
chik lewuk häp lew'atshancheyaj,
wet ihanhiyejt'ak m'ak chik ihiyeja.
24Yej chuwet n'oyehen tä lefwon n'ohen,
woyej n'oyehen m'ak tä is alhoho,
häpkhilek katäyhata n'ohen.
25Chätyenpe awäk häp wichi tä ihiche honhatil
tä nitäfwela amej lhäy'e tä aknena Lewuka.
Tsi lhamel ilänhen aka wichi Israel,
yäm nofwej olhamel wet iwasthi honhat tä ow'et.
