Jer 19

₁Lhawuk yäm n'oye tä yok:

–Mäh, is chik lechäj n'olhäkwe tä iyhät. Wet änela iyhäj hin'ol tä thänhäy, lhäy'e iyhäj sacerdotes tä thänhäy, ₂wet hoyela häp honhat lhip tä lhey Ben-hinom. Wet ehila lepe tä iwhäye lhip tä iyätewos iwomhi iyätey lhipey, wet en ämeta olhämet tä ofwenla amho. ₃Olak, “Amel tä reyes tä aniyatej Judá, lhäy'e amel tä wichi tä haw'et Jerusalén, ch'ahuyaye Lhawuk lhämet. Lhawuk tä laj letumfwaya, häp Israel laka Dios, yok, Othatla'pe honhatna häp lewit'äyhyaj tä wuj, wet elh chik häpe tä iläte, ilätla m'ak tä lech'otey iläte. ₄Tsi häp tä Israel lhayis ile n'oyej wet ikänchi honhatna, yen häpeya dios lhayis tä w'enha lhamej lew'et. Lhamel hiw'enho t'awayhtes häp dios lhayistso tä lhamel lhäy'e letetsel nitäfwelayej, lhäy'e tä äp reyes tä niyatej Judá äp nitäfwelayej. Wet lhamel ilänhen wujpey wichi tä laj letesa. ₅Wet lhäy'e tä hip'ajtej tä yenlhi altares tä iti'pe leles tä iwunhomche tä yen t'awayhata tä hiw'enho Ba'al, häp dios tä kamatache. Täja tek olham olhämet, olhamhit'a tä one'tek iwoye, nits'ilakhiyat chik oyen tichunhayaja. ₆Wet häp tä olham tä Lewukn'o oyok, Nämla ifwala tä lhiptso nemla lhey Tofet, wet nemla lhey Ben-hinom laka honhat. Häp lheyla N'olänyajw'et, ₇wet häp lhipna okänchihla m'ak tä Judá lheley fwetaj iwohiyela lhäy'e m'ak tä Jerusalén lheley fwetaj iwohiyela. Otch'othiyela letayhfwas yämthilek ikalhi wet ilänhen, wet ochunnhiyejena lep'itseyhay häp afwenchey tä n'okotses lhäy'e itshätäy tä fwitses. ₈Owasthihila hupuyna häpkhilek wichi itiyej leläkwyhanyaj. Elh chik häpe chik nek lhipche inuhthila lhamho chik hiw'en lewit'äyhyaj tä wuj tä iyej, wet yafwuthichela lepästey. ₉Letayhfwas ilunhiyejlhila hupuy wet t'uhlahläk ilänhen wichi tä ihi. Wet tä lhäy'ehila lhip tä atha len'äyij, wichi lhatufwihena wet tufwihena leles.”

₁₀Wet Lhawuk äp ifwel n'oho tä yok:

–Chik leleyej tä lewoyetso, is chik lewasthi häp n'olhäkwe tä iyhät, wet w'enyenej hin'ol tä lechäj amche. ₁₁Wet fwenho lhamel, olak, “Lhawuk tä laj letumfwaya yok, Te owasthihichela häp wichina lhäy'e hupuyna, otech'aynhiyeja n'olhäkwe tä iyhät tä õ'wasthi wet tä äp õknenalhi. Wet wichi nech'ehilak tachuma n'op'itseyhay, ithathihola honhatna tä häpe Tofet tsi tek nilhoke lhip tä itihi. ₁₂Häp tä tehlattso lewit'äyhyaj tä otihiyeja hupuyna lhäy'e wichi tä ihi, otech'aynhiyeja Tofet. Olham tä Awukn'o olhämet täjtso. ₁₃Wet õ'kokyenhiyela wichi lewukwey tä ihi Jerusalén, lhäy'e Judá laka reyes lewukwey, õ'tech'aynhiyeja Tofet. Tsi häp tä wichi ihopejpe lewukwey lhipey tä tumchephä tä yen n'okhayajayej katetsel tä ipuleye häp incienso tä iwunho wet äp yen n'okhayajayej dios lhayis tä kamatachehen häp hat'es tä itsäye. Wet häp tä tamenej tä oyok, Kok'aye t'at lewukweytso, tehlat iwoye Tofet.”

₁₄Tä Jeremías ileyej tä ifwenho wichi häp Lhawuk lhämetna, wet yikch'oye Tofet wet ihoye Lhawuk Lewukwe ka'alho. Tä nichäte, wet takasthi lhip wet tahuyej wichi tä yok:

₁₅–Lhawuk tä laj letumfwaya, häp Israel laka Dios, lhämet yok, “Ottayhlahlä hupuyna lhäy'e häp wichi lew'etes tä atott'ahomche, ochätyenla'pe nilhokej häp lewit'äyhyajay tä pajche ofwenho. Tsi häp tä wichi hit'unthen lehusey wet äp ikachu n'oye.”