Jeremías ihoye iyätewo lew'et
1Lhawuk tahuy n'oyej wet yok:
2–Mäh hoye elh tä iyätewo lew'et. Chik lechäte, olham ofwenla amho olhämet.
3Wet olham oyik tä ohoye iyätewo, wet tä onchäte, ow'en tä yenlhi t'at iyhät tä iti'pe lechumetcha tä ilunhi. 4Wet tä wak'alh, mat ni'isa alhoho. Wet äp yachajo tä yenlhi, kamaj häpe t'at iyhät tä tachuma. Wet tä wak'alh, nech'e häpe t'at m'ak tä t'uhläk häpe.
5Wet Lhawuk yäm n'oye tä yok:
6–Amel tä aIsrael lhayis, ¿hä lhenayek olham n'am kalhi chik oainech'aynhiche, tet iwoye tä iyätewona äp yachajo tä inech'aynhi iyäte? Olham tä Awukn'o olhämet täjtso. 7Iche lewhäy tä owo silätayej wichi tä oyok, “Oyokwesichephäla amel tä lhehiche haw'etes, otihla amejen awit'äyhyaj wet oaitäyhthihena.” 8Tha häp tä wichitso chik ileche m'ak tä ni'isa, olham olehichela tä ochene lewit'äyhyaj tähaj pajche owaklhatej lhamel.
9“Wet iche lewhäy tä owo silätayej wichi tä oyok, Oneyhthichephäla amel wet oyämla kalelhäj haw'et. 10Tha häp tä wichitso chik iwoye m'ak tä ni'isa wet nitch'ahuyaye olhämtes, wet olehichela tä owoyeje m'ak tä is tä pajche owaklhatej lhamel.
11“Wet häp tä tetso, fwenho häp wichi tä Judá lheley lhäy'e iyhäj tä lew'et Jerusalén tä lhok, Häp täja häp Lhawuk lhämet tä t'uhläk ofwel amhohen wet yok, Olham ottay ahilähen, nech'e owaklhat amejen awit'äyhyaj. Leyayej m'ak tä ni'isa tä lewoyaye, elh tefwajpejni amel. Woyay ahusey iyhäja wet enaylhi m'ak tä is.
12“Mat lhamel yohlak, Kha, owohiyet'a. Owohiyelat m'ak tä ohuminche, wet otujlhahichela t'at tä owoye okeyis tä ni'isachehen tä tälho ohusey.”
13Wet häp tä Lhawuk yok:
“Lhek ätshane wichi tä ihiche honhatil
chik iche elh tä ilätch'oye
m'ak chik te iwoye Israel lhayis lakey
tä hich'atej tä ni'isa tä iwoye.
14Häp tachenhas tä atoschephä tä ihi Líbano
ihanhiyejt'ak newache fwiy'et tä ipelaj tä iche'pe.
Wet inät lhayis tä techäjiche
tä tälhpe tachenhastso ihanhiyejt'ak y'im.
15Mat oka wichi hip'ethat n'ohlä,
tajlhama tä lhamel hiw'enho incienso
häp dios lhayis tä kamatachehen.
Häp tä tamenej tä lhamel
yikch'oye n'äyhäy tä pajchehen,
wet nichäthen tä inukwe
n'äyhäy iyhäj tä nitäfwelachehen.
16Wet laka honhat tats'anihilatpe,
õ'tihiyeja n'oläkwyhanyaj pajla'tha tiyäj'attsiy.
Elh chik häpe chik nek lhipche
inuhthila lhamho chik hiw'en
wet ilanhilhila lhetek.
17Olham onämla, otehlat iwoye
leyalh tä yafwutpe honhat
tä tälhe lhip tä ifwala tälhche.
Ofwtsatkatla'pe honhat häp oka wichi Israel,
wet lhamel inuhikwela alhoho tä ilethanlä letayhfwas.
Wet owho ithatlahlä lhamel wet nemla oyahin
chik nichäte ifwala tä otiyej otasnhayaj lhamel.”
Wichi tatayhlä Jeremías wet t'uhläk ilän
18Wichi yok:
–¡Mäh n'attayhlä Jeremías! ¡N'awaklhat m'ak chik y'awoyeje! Kamaj ihichela sacerdotes tä n'aichufwen, lhäy'e profetas tä ifwel n'amho Lhawuk lhämtes, lhäy'e hin'ol tä ahantses tä ifwel n'amho m'ak tä is chik y'awoye. ¡N'at'ukwe m'ak at chik lechahla Jeremías, wet yej n'awo lahaya m'akpej tä ifwel n'amho!
Jeremías t'alhe Dios chik itiyej lewit'äyhyaj häp hin'oltso
19Iwuk, ch'ahu n'oye.
Tetshan otayhfwas lhämtes tä iwoye.
20Tej tä olham owoyeje lhamel häp m'ak tä is,
mat lhamel äp iwoyej n'oye m'ak tä ni'isa.
Tet iwoyek tij chowej tä pitoj tä t'uhläk onchäte.
¿Hä letichunche täjnaj olhaikhajyen
tä ot'alh ame tä oyok:
“P'altsen lhamel, yej tiyej awäk”?
21Mat athana oyok:
¡Is chik leles y'ilejen häp nehläs,
wok tsonhates tä y'uyhen tä õ'länejen!
¡Is chik lech'efwas tesalis t'at wet laj lelesa!
¡Is chik n'ot'inhayaj tä äytesiche ilänhen hin'ol,
wet mamses y'inhen tä ihi n'oka'tshayaj!
22Chene etantses häp lhamel lew'etes,
häpkhilek istunhen lhamel
wet t'änwethä tä lenowayhyaj ihi.
Tsi iti n'ohlä t'akanyaj tä t'uhläk isakan n'oyej,
tet iwoyek tij chowej tä t'uhläk onchäte.
23Mat am, Iwuk, letäfwelej
nilhokej m'ak tä lhamel iwoye
tä t'uhläk ilänn'o.
Yej p'ethatlä lech'isukyajay
wet yej täyhtejen letes.
¡Tiyej awäk lhamel wet thatchä!
