Niyat tä is tälhiyela wichi tä letes David p'ante
1Lhawuk lhämet yok:
–¡Lewit'äy ihihila häp oka wichi kaniyatey! Lhamel tet iwoye tson'ataswos tä iwahinchetshi leläy chik tatäylhi wet ifwtsat'atpe honhat.
2Wet häp tä Lhawuk tä Israel laka Dios ifwenho lhamel tä yok:
–Amel tä lelhahat'atpe honhat oläy tson'atas, wet lhäy'e tä lhämthen wet kat'uyaye. Wet häp tä oyok, Tä amel katetshana lhamel, olham otetshanhila otasnhayaj chik oti amejen, tsi häp tä isit'a m'ak tä lewoyaye. Olham tä Awukn'o olhämet täjtso. 3Wet olhamla t'at chik otonchephä iyhäjfwas tä imälhhi tä ihiche honhateste oyokwese, wet onachajihola honhat tä lew'et häpkhilek iwo lelesa, pajla'tha wujpey. 4Wet äp oyenla laka niyateya häp hin'ol tä isen, tehlat iwoye tson'ataswos tä isen, häpkhilek t'uyehen lhamel. Wet nemla iche m'ak chik nowaye, lhäy'e tä nemla tatäy elh. Olham tä Awukn'o olhämet täjtso.
5Lhawuk yok, “Tetshan,
nämla ifwala tä otälhthiyela
David leles tä lepes lheley
häp niyat tä lechowej ihi.
Tehlat iwoye hal'ä tä w'atshan lhacha,
wet iwohiyela lakalelhthayaj
tä is alhoho tä ihi honhat.
6Chik ihi leniyatyaj,
wet Judá lheley tefwayhiyeja m'ak tä ni'isa
wet Israel lhayis letamsekis ihihila.
Wet õ'wohla lheya niyattso tä õyok,
Lhawuk tä n'a'isyen.
7“Wet nämla lewhäy chik wichi yachajiholak yenn'o Lewuka. Wet lhamel nemla yok, Lhawuk tä itonphä p'ante Israel lhayis tä itälhtho honhat tä Egipto. 8Mat nech'e yohlak, Lhawuk tä itonphähte Israel lhayis tä itälhtho honhat tä tumej tafwojyhiye lhäy'e tä itälhthomche nilhokej honhatil tä lham pajche yokwese lhamel. Wet nech'e lhamel ihihila t'at laka honhat.”
Jeremías yen letichunhayaja profetas tä kamatachehen
9Olät lhame tä otichunhayaj ilänn'o,
wet nilhokej olhiley tä tachettichehen.
Otet iwoye elh tä w'oknajej hat'es,
häp Lhawuk tä tamen n'oyej,
lhäy'e häp lhämtes tä t'amajchetes.
10Profetas nilhokpe honhat
tä itäkwyen lakeyis tä iwoye.
Lhamel yenlhipej m'ak tä ni'isa,
wet yenlhi lhamhohen lakhajyhayaj tä iwit'äynej elh.
Häp tä tamenej tä Lhawuk
yäm äytaji lhämet tä itiyej honhat,
wet tamchäy wet hup tä i'pe honhat y'o.
Lhawuk lhämet tä itiyej profetas tä ni'isahen
11Lhawuk yok:
“Profetas lhäy'e sacerdotes iwoye m'ak tä ni'isa.
Tej tä häpe olham Owukwe,
mat lhamel itichufwi m'ak tä ni'isa tä iwoye.
12Tä mälhyejtso, len'äyij nemla is alhoho,
honatsi tä ihichela, wet lhamel taphuthihihena
pajla'tha nichätche katsi.
Tsi nämla lewhäy tä otasnhihena lhamel
wet ochätyenla'pe lewit'äyhyaj.
Olham tä Lewukn'o olhämet täjtso.
13“Olham ow'ente häp profetas tä ihi Samaria,
lhamel yenlhi m'ayhay tä iwäkwyhayenn'o.
Tä lhamel iwo lhämeta, fwetaj
dios tä kamatache tä lhey Ba'al tä lhämetej,
wet häp tä iwetahathen oka wichi Israel.
14Wet ow'en profetas tä ihi Jerusalén,
lhamel yenlhi m'ayhay tä lhäy'e lhip tä kok'aye,
iwoyej lhamehen lakain'oyaj
lhäy'e lhämtes tä kamatachehen.
Inityenej wichi m'akpej tä ni'isa tä iwoye,
häpkhilek nileyayej.
Lhamel tä ihi häp hupuyna
w'awulhi t'at Sodoma lhäy'e Gomorra.
15Wet häp tä olham tä ohäpe Lewuk tä laj letumfwaya,
owoye olhämet tä otayhatlä profetas.
Ow'enhihola lhamel m'ak tä tapay häpkhilek tuj,
wet op'ajthiyeja inät tä iyäyej tä n'ot'ilek ihi.
Tsi lhamel profetas tä ihi Jerusalén
tamenej tä m'ak tä ni'isa nilhokpe honhat.”
16Lhawuk tä laj letumfwaya tahuyej wichi tä Judá lheley wet yok:
“Yeja tach'ahuyaye profetas lhämtes
tä iwoye tä kamatachehen
tä lhamel t'at tä lhämtes, tek olhämet.
17Lhamel yämepej wichi tä ikachu n'oye
wet yok, Aisichelat alhoho.
Wet äp ifwenho iyhäj tä lechowhal t'unhen
lhäy'e tä iwoye m'ak tä lhamel letichunhayaj,
wet yok, Niwohit m'ak chik ihla amejen.
18“Mat olham oyok, Häp profetastso
ihichet'a tefwaji chik iho n'oye
häpkhilek iläte olhämtes wet tach'ahuye.
19Lhek tetshan,
owäk tet iwoye pelhay tä yafwuteji
tä nichätpe wichi tä ni'isahen.
20Olehichet'ala owäk,
pajla'tha wak'alh m'ak tä oyenlhi.
Nämla lewhäy tä amel
lhenla atichunhayaja m'ayhayna,
wet nech'e letäfwnhichela.
21Olham tek ochenhay profetastso,
wohit'a m'ak chik ofwenho lhamel.
Lhamel t'at tä yikhen wet iwo lhämeta.
22Chik lhamel ihohin'e n'oye
wet iläthiyen'e olhämtes,
wet häp tä ifwenhihon'e oka wichi,
wet ilehathichen'e len'äyij tä ni'isache
lhäy'e häp lakeyis tä iwoye.”
23Lhawuk äp yok:
“Olham ohäpe Dios tä ihi nilhokej lhipey,
chik atofwe wok ni'atofweya.
24Ihichet'a elh tä weskat n'ohlä
häpkhilek n'am w'en.
Pule lhäy'e honhat oihi t'at.
Olham t'at tä olhämet täjtso.
25“Oläte t'at m'ayhay tä kamatachehen tä profetastso iwoye tä iwo olheya. Lhamel yopejkwe, ¡Ofwilhek ihi! 26¿Chihlatek ileche lhämtes tä kamatachehen tä lhamel t'at tä lhämtes? 27Tä lhamel ifwel lhamhomche lefwilhey, wet t'uhläk wichi hip'ethat n'ohlä, tet iwoye lechätilis tä hip'ethat n'ohlä wet ihänlhi Ba'al. 28Chik iche profeta tä lefwilhek ihi, is chik yok, Ofwilhek t'at. Mat chik olham olhämetej, is chik yen at silätyaja. Olham olhämtes tet iwoye trigo, laha ihi, mat lhamel lefwilhey tet iwoye hup, lajit lahaya. 29Olhämtes tet iwoye itäj, wet äp tet iwoye n'okäjnhat tä iwo lhipeya tunte. Olham Dios tä owoyetso.
30“Häp tä tamenej tä ottayhlä profetas tä isoyejpej olhämtes tä iyej iyhäj. 31Te ottayhlä profetas tä ifwenhopej wichi häp lhamel lhämtes tä fwetaj olhämtes. 32Ottayhlä profetas tä yen silätyaja lefwilhey tä kamatachehen. Lhämtes länhay t'at, tajlhama tä t'uhläk iwetahathen oka wichi. Olhamhit'a tä ochenhay, wet n'am nen lewosayej olhämtes, wet häp tä wichi isiyejt'a lhamel. Olham tä wichi Lewukn'o tä owoyetso.
33“Jeremías, etp'i iche profeta wok sacerdote, wok hin'o chik häpe, chik tay'ätshan ame tä yok, ¿Hä iche Lhawuk lhämet tä t'unche tä iwoyej n'oyehen? Wet is chik lechulho tä lhok, Amel tä at'unhen wet achoyhthen, häp tä Lhawuk tach'anlhahla amehen chik lechätchehchä. 34Wet chik profeta wok sacerdote, wok hin'o chik häpe, yok, T'unche Lhawuk lhämet, olham otasnhila häp lham lhäy'e lew'et lheley. 35Mat is chik elh tay'ätshane elh wet yok, ¿Chiwoye Lhawuk lhämet? ¿Atsi m'ak tä nichulhej amho?
36“Yej amel lhachajolak lewo ämeta tä lhok, T'unche Lhawuk lhämet. Tsi chik lewoyetso, wet ämtes tehlat iwoye m'ak tä t'un wet äp choyhat. Olham ohäpe aka Dios tä n'ilataj tä laj letumfwaya, mat amel letsayhthen olhämtes.
37“Jeremías, ätshane profetas, olak, ¿Chiwoye Lhawuk lhämet? ¿Atsi m'ak tä nichulhej amhohen? 38Wet chik lhamel yok, T'unche Lhawuk lhämet, is chik lechulhihola lhamel tä lhok, Tä amel lewoye n'olhämet tä õn'äyej amhohen chik lewoye, 39Lhawuk ineyhthiphäla amel, aitech'aynhiyeja m'ak tä t'un wet aithathichela kanhi, lhäy'e hupuy tä Jerusalén tä hiw'enhomchehte achätilis lhäy'e tä äp hiw'en amhohen. 40Lhawuk ay'ayhthichelahchä wet nittäya tä han'äfwlhi ihihila, wet nipajiyahit chik õhp'ethatlä awit'äyhyaj.”
