Jer 24

₁Nabucodonosor, häp Babilonia laka rey, itsoklhihte häp Jeconías, Joaquim lhäs tä Judá laka rey tä ihi Jerusalén, wet yen kweneka, ihäne honhat tä kalew'eta tä häpe t'at Babilonia. Wet itan'istej Jeconías leniyatfwas, lhäy'e hin'ol tä ihanej tä yenlhi m'ayhay, lhay'e chinajwos, wet ilhokontshi tä ihäne Babilonia. Wet nech'e äp Lhawuk iwo ow'eneka, ipäyen n'oye täkwfwas lehis tuskalis tä õyenlhi tä higos ihiche, wet õ'tihi tä Lewukwe tatache. ₂Wet elh lehi iche iyhäj tä ichun tä y'ohen tä isis, wet elh lehi tek isis higos wet nemhit õtuj. ₃Wet Lhawuk tay'ätshan n'oye wet yok:

–Jeremías, ¿atsi m'ak tä lew'en?

Wet olham onchulho tä oyok:

–Ow'en häp higos. Iyhäj tä isis matche tä isis, wet iyhäj tä ni'isa matche tä ni'isa wet tek t'uhawetej chik õtuj.

₄Wet Lhawuk äp yäm n'oye tä yok:

₅–Olham t'at tä Awukn'o tä ohäpe Israel laka Dios oyok, “Häp wichi tä Judá lheley tä ochench'oye laka honhatna wet ohäne Babilonio lhayis kahonhat, häp tä otech'aynej higos tä isis. Op'altsenhihena lhamel ₆wet ot'uhiyehena, wet onachajihola honhatna. Oyämla kalelhäj lew'et, nemla otonchephä tä tälho laka honhat. Okhajyenhihena lhamel, nemla oyachajo chik otäyhthen. ₇Ow'enhihola lhamel lehanyaj yämthilek nech'e nitäfwel n'oyej tä ohäpe Lewuk. Nech'e oyenla oka wichiya wet yenlan'o häpeya laka Dios, tsi imälhthilawek lehusey tä tapil n'oye.

₈“Matla Sedequías tä Judá laka rey, lhäy'e leniyatfwas, lhäy'e Jerusalén lheley tä imälhhi honhatna wok iyhäj tä imälhhi häp Egipto, otech'aynhiyeja higos tä ni'isa wet äp nemhit n'olhäk. ₉Lhamel häpkhila m'ak tä lhäy'e lhip tä tanhoch'ay, wet nilhokhiyeja häp wichi tä i'pe honhat ikokyenhiyela lhamel. Wet lhip at chik häpe chik oyokwese lhamel, wet wichi iläklawethä wet yenla w'et m'ayhaya. Wet elh at chik häpe chik t'uhläk elh lewit'äyhyaj ihi, yohlak, Is chik atet iwoye Judá lheley lhäy'e laka rey Sedequías tä matche tä lewit'äyhyaj ihiche. ₁₀Wet äp ochenhiyela n'oka'tshayaj lhamel, op'ajthiyeja nehläs lhäy'e äytes, pajla'tha nofwej lhamel tä ihi honhatte ow'enhomche lechätilis lhäy'e tä äp ow'enhomche lhamel.”