Jer 38

₁Sefatías, Matán lhäs, lhäy'e Gedalías, Pasur lhäs, lhäy'e Jucal, Selemías lhäs, wet Pasur, Malquías lhäs, lhamel iläte häp Jeremías tä yämhoplhi wichi tä yok:

₂–Lhawuk lhämet yok, “Wichi elh chik häpe chik nekach'oye hupuyna, õ'länhiyeja n'ofwajnhat, wok nehläs tä ilänla, wok äytes tä ilänla. Mat elhlak häpe chik inuphä wet lhayachaje Babilonio lhayis, häp hin'otso õ'länhit'ala.” ₃Wet Lhawuk yok, “Tsi häp tä hupuyna wet õyachajiyela häp Babilonia laka rey kasip'älis, wet nech'e lhamenla t'at chik lewuhuy.”

₄Wet häp rey leniyatfwastso yämeje häp rey wet yok:

–Is chik õ'län hin'ona Jeremías, tsi häp tä lhämtes tä iwoye ikhajyenhit'a wichi tä n'oka'tshayajchal iyhäjfwas tä imälhehi tä ihi hupuyna, lhäy'e nilhokej häp wichi tä lew'et. Lham t'uhikwet'a wichi letamsek, tajlhama tä t'ukwe wichi lewit'äyhyaj.

₅Wet rey Sedequías nichulho lhamel wet yok:

–Woyejet m'ak tä amel lehuminche chik lewoyeje. Tsi olham ohanhiyejt'a owoyneja chik on'äyej amhohen m'ak chik amel lewoye.

₆Wet lhamel tachuma Jeremías wet yäytejchufwi lewilisch'ol häp niyhäy, wet ithatche häp Malquías lejäkw tä yen inät lehiya tä ihi sip'älisw'et ka'alho. Wet tä inät newahi, ts'ilak at iyhät tä ihi, wet Jeremías tiyäj'atchä tä nichätho iyhät tä ilech'oye häp chowej.

_7-8Wet iche hin'o tä Etiopía lhele tä lhey Ebed-melec tä tach'ote rey lechumet tä ihi lewukwe. Wet tä ilätch'oye tä õ'thatche chowej Jeremías, wet yikch'oye rey lewukwe wet tiyäje Jerusalén lepe tä tatayhlä Benjamín lhayis kahonhat. Tsi häp tä rey ihi tä nech'e itetshan m'akpej tä wichi ifwenho. Wet Ebed-melec ifwenho rey tä yok:

₉–Ika n'owujtaj, matche tä ni'isa häp m'ak tä wichi iwoyeje profeta Jeremías. Lhamel ithatche chowej. Y'inhiyeja nehläs tsi häp tä äp pan ihichet'a.

₁₀Tä rey iläte, wet ifwenho Ebed-melec tä yok:

–Äne tres hin'ol, tonphä Jeremías, kamaj n'ila. ₁₁Wet Ebed-melec t'äne hin'ol, wet ihoye häp rey lewukwech'o elh tä wiley lew'et, wet tachuma wesaj wumhay lhipey wet ichäj. Tä nichäte chowej, wet yäytej häp niyhäy tä ithatej Jeremías ₁₂wet yok:

–Tichechufwi awilisch'ol häp wesaj wumhay lhipey, häpkhilek niyhäy niseta äj.

Wet Jeremías iwoye, ₁₃wet nech'e wichitso itonphä pajtha nichät alhoye. Wet häp tä Jeremías nech'e õ'tihi t'at sip'älisw'et ka'alhotso pajtha wujpey ifwalas.

₁₄Rey Sedequías t'uhläk õ'häne profeta Jeremías häp Lhawuk Lewukwe lepe elh tä tres. Tä Jeremías nichäte, rey yok:

–Oty'ätshan ame. Yej leskat n'oho m'ak tä matche.

₁₅Wet Jeremías yok:

–Chik onchulh amho, wet lene'tehlak õ'länn'o. Wet chik ofwetaj owo achoweja, wet tek letach'ahuhla n'oye.

₁₆Wet rey Sedequías weskatej tä ifwenho lhämet tä matche häp Jeremías wet yok:

–Lhawuk tä n'ilataj tä lhaw'atshancheyaj tälhe, iläte olhämet tä matche tä ofwel amho, tä tek oailänla wet äpte on'äyhiyeja amho wichi chik t'uhläk ailän.

₁₇Wet häp tä nech'e Jeremías tahuyej rey Sedequías wet yok:

–Lhawuk Dios tä laj letumfwaya tä Israel laka Dios yäme tä chik alhachaje häp Babilonia laka rey kasip'älis kaniyatey, häp tä am lhäy'e nilhokej haw'et lheley let'inhihent'ala wet tek õ'wunhihomchela hupuyna. ₁₈Matlak ka'alhachajaye lhamel, wet häp tä isohla amej hupuyna wet iwunhihomchela, wet lehanhiyejt'ala alewoyneja chik lefwetaj alefwayhat.

₁₉Wet Sedequías yok:

–Onowaye Judío lhayis tä pajche lhaithate Babilonio lhayis. Chejiphäla wet Babilonio lhayis yachaj n'oye lhamel häpkhilek iwo m'aka n'oyej.

₂₀Wet Jeremías nichulho wet yok:

–Õyachajit'ala ame lhamel. Is chik lewoye häp Lhawuk lhämet tä ofwel amho, häpkhilek laj awit'äyhyaja wet kat'inhiya t'at. ₂₁Isit'a chik kawoyaye, tsi häp tä Lhawuk ipäyen n'oye m'ak tä ihla amej chik ka'alhachajaye atayhfwas Babilonio lhayis. ₂₂Nilhokej häp atsinhay iyhäjfwas tä imälhehi tä ihi awukwe tä aniyatyajw'et, õ'chäjla lhamel wet õhw'enhihola häp Babilonia laka rey kasip'älis kaniyatey. Wet atsinhaytso yohlak, “Akalay'is tä matche tä lehumnhen ikan amej, wet häp tä tamenej tä ikalh amhi. Lhamel y'uythomche iyhät apach'ol, wet yik hach'oye.”

₂₃“Wet nilhokej häp hach'efwas lhäy'e ales tä õhw'enhihola Babilonio lhayis, wet am lehanhiyejt'ala alewoyneja chik lefwetaj lelethanlä häp lhamel. Babilonia laka nifwotas aitsokhilhila wet ayenla laka niyat lhäytseka, wet iwunhihomchela hupuyna pajla'tha nofw.”

₂₄Wet Sedequías tahuyej Jeremías wet yok:

–Yej fwenho elh chik häpe häp m'ak tä y'ämena, häpkhilek õ'akniläna. ₂₅Chik oniyatfwas ihanhiyeja tä oyämlhi amho, wet lhamel tay'ätshanhiyeja ame m'ak tä y'afwel n'amhomche. Lhamel yohlak, “Yej leskat n'ohohen m'ak tä lefwel amhomche, häpkhilek oakniläna.” ₂₆Wet chik lechulho lhamel, wet fwenho tä alep'altsen n'oye tä isit'a chik oyachaj ame häp Jonatán lewukwe, häpkhilek ka'ewachufwi chik let'il.

₂₇Wet matche, nämhen häp rey leniyatfwas wet lhamel tay'ätshane Jeremías. Wet tä lham nichulho lhamel, wet itenche t'at m'ak tä rey t'uhläk nichulhejo lhamel. Wet häp tä niwohit m'ak chik lhamel iwoyeje, tsi häp tä ihichet'a elh chik iläte m'ak tä lham lhäy'e rey yämejwethä. ₂₈Wet Jeremías ihi t'at sip'älisw'et ka'alho pajtha nichäte t'at häp ifwala tä Babilonio lhayis ikalhi Jerusalén wet lhayen lewuhuya.