Jer 6

₁¡Amel tä letälhe ates p'ante Benjamín,

mäch'oye Jerusalén wet afwayhthen!

¡Afwutche n'ofwol tä tson'ataj ch'u

tä lheyayhi Tekoa!

¡Enlhi itäj tä wuj tä häpe atetnek

tä ihi Bet-hakerem!

Tsi m'ak tä matche tä ni'isa tälh tafwojyhiye

tä häpkhila wichi lewit'äyhyaj.

₂Jerusalén häpe honhat tä lesilatyaj ihi,

mat wasihila.

₃Tsi häp tä niyatey tä letayhfwas nämhiyela,

lhäy'e laka nifwotas,

wet iwohla lakasthawtesa tä ilunhiyejlhila,

elh weihalhapej isohiyeja lhip lakäywet.

₄Lhamel yohlak, “¡Awaklhatwethä

tä letatayhlahlä Jerusalén!

¡Lhuyay, mäh n'anuye

chik ifwala ihi lechowej!”

Wet äp yohlak,

“Ch'athit lhamej tä honaj

wet äp honatsihila t'at.

₅Tä mälhyejtso, ¡n'anuye honajche

wet n'awasthiche laka hupuy tä takhajayhen!”

₆Lhawuk tä laj letumfwaya yok:

“¡Isthen häp hal'äy wet enlhi n'ot'äsawet

häpkhilek lenuye Jerusalén!

Tsi häp tä hupuyna nichäte lewhäy tä õ'wit'äyen,

tsi m'ak tä ni'isa tapoyej,

₇tet iwoye n'opek tä inät tapoyej.

Tajlhama wichi tä fwitses lepak tä oläte,

wet tajlhama n'olätshäy

lhäy'e wichi tä y'inhen tä ow'en.

₈Oyäme Jerusalén, oyok, yej tekm'ahatlhi.

Chik kawoyaye, oyikhila hach'oye

wet oayenla ts'anisa, wet nemla wichi i'amhi.”

₉Lhawuk tä laj letumfwaya yok:

“Häp Israel lhayis tä imälhefwasi,

letayhfwas t'uhikwela, tehlat iwoye

wichi tä t'ukwe hal'ä lhay pajla'tha nofwej.”

₁₀Wet olham onchulho tä oyok:

“Iwuk, ¿atsihilak tach'ahu n'oye

chik oyämlhi wet ofwenho ämtesna?

Tsi ow'en tä lhamel hip'okwe'pe lech'otey,

tet iwoyek nilätachehen honhat.

Tajlhama tä lhamel iläkwichehen ämtes

wet tek akäjejlhi.

₁₁Iwuk, nech'e oläte tä tapo n'oyej awäk,

wet nemhit olhaitsokejlhi chik ofwenho wichi.”

Wet nech'e Lhawuk yäm n'oye tä yok:

“Yej n'äyejo owäk nilhokej wichi,

häp nä'tshas tä ikoyhen

lhäy'e mamses tä lhaihutpejwek.

Hin'ol lhäy'e lech'efwas õyenla kwenkaya,

lhäy'e iyhäj tä lhäy'e lhip tä thänhäy.

₁₂Wet lew'etes, lhäy'e laka honhates, lhäy'e lech'efwas,

õyachajiyela iyhäj wichi häpkhilek lhayen lewuka.

Tsi olham oneyhthiphäla otkwey

tä otasnhila wichi tä ihi honhatna.

Olham tä Awukn'o olhämet täjtso.

₁₃“Lhamel tä len'ohyajay ihiche

wet iyhäj tä laj len'ohyaja,

lhamel yen tichunhayaja m'ayhay

tä ikalheji m'ak tä ni'isa tä iwoye.

Wet profetas lhäy'e sacerdotes

iwoyet m'ak tä lhamel t'akanyaj.

₁₄Tet iwoye kachawos tä nitetshana

m'ak tä iyhäj iläthen,

lhamel hiw'en m'ak tä ni'isa tä oka wichi iwoye,

wet yok, Is t'at.

₁₅“Is t'at chik lhamel n'äfwelhpe

m'ak tä hich'atej tä ni'isa tä iwoye.

Mat len'äfwlhi ihihit'a,

ihanhiyejt'a tä iwo len'äfwlhiya.

Tä mälhyej'attso,

olham otihiyeja lewit'äyhyaj,

otan'isthiyeja iyhäj tä pajche tatäy.

Olham tä Lewukn'o olhämet täjtso.”

₁₆Lhawuk yäme laka wichi wet yok:

“Kasthen tä lhewhi n'äyhätetsel wet yahin,

wet ätshanej n'äyhäy tä pajchehen

tä häpe n'äyhäy tä isen.

Wet chik lew'en, mäh nuyaykwe,

häpkhilek atamsekis ihi.”

Mat lhamel yok:

“Tek owatläk onukwe n'äyhäytso.”

₁₇Wet häp tä Lhawuk yok:

“Ochen amehen silätwos tä yok,

Ch'ahuyaye n'ofwol tä tson'ataj ch'u lechos.”

Mat lhamel yok, “Otch'ahuhiyet'a.”

₁₈Wet häp tä Lhawuk yok:

“Amel tä lhewhiche nilhokej honhatil,

ch'ahuwethä häpkhilek lehanej

m'ak tä ihiyeja oka wichi.

₁₉Wet am, honhat, ch'ahulhi,

wet leläthichela t'at m'ak wit'äyhyaj

tä ochätyenla'pe oka wichi,

tsi häp tä lhamel ikathiyeja laha

m'ak tä ni'isa tä iwoye.

Tsi lhamel tach'ahuhiyet'a ochufwenyajay

wet iwohiyet'a olhämtes.

₂₀“¿Chipte tä amel lechäj n'oye

incienso tä tälhe Sabá

lhäy'e hal'äy tä lenij akäjche

tä tälhe honhates tä atosehen?

Nemhit ikäjyenlhi n'oyej m'ak tä lenij akäjche,

wet nemhit owatlä itshäwet.”

₂₁Wet häp tä tamenej tä Lhawuk yok:

“Olham otihlä lewit'äyhyaj wichina,

häpkhilek tanhäphänejwethä.

Wet hin'ol lhäy'e leles

tan'islawek tä y'inhen,

lhäy'ehila wichi tä lhalakalay'is,

lhäy'ehila lhamel tä lhalew'etfwas.”

₂₂Lhawuk yok, “Lhek yahinlä

wichi tä wuj tä tälh tafwojyhiye.

Nekhen nifwotas tä lhaikhajyenhen

tä tälhe lhip tä matche tä atofwey.

₂₃Lhamel wak'alh tä ichäjwethä laka'tshayajchal

tä lelutses hal'äy lhäy'e lefwajnhates.

Matche tä fwitses lhamel

wet lajit lep'altsenyaja,

wet tä nekhen tä iche'pe lew'utey yel'atas,

tet iwoye lewomekitaj tä lepak äytaji,

wet wak'alhen tä iwo laka'tshayajayej Jerusalén.”

₂₄Wichi tä ihi Jerusalén yok:

“Olhamel olätche t'at n'osilätyaj

wet itäyhat t'at okhajyhayaj.

Wet oläte olhakli tä äytajche,

mälhyej iwoye atsinha tä eyte iwohi lhäsa.

₂₅¡Yeja amel lelunhen, yeja lenukwe n'äyij!

Tsi häp tä lhatayhfwas iche t'at täja,

laka'tshayajchal iyejwethä

wet tanhoch'aytaj'atpe honhat.”

₂₆Yaiyhäj, is chik amel

letaw'uyhiche wesas tä yelajen

tä letetnekej tä wuj tä alhakli ihi.

Wet ch'olehilhi mok'otaj,

wet fwitsenej tä letafwchehchä,

tech'aynej tä äs tä achunkatsek tä ileyej honhat.

Tsi häp tä elh tä iwasthihila lhaw'etesna

pajiyejt'a chik näm.

₂₇Lhawuk yäm n'oye tä yok:

“One'tek lhelhte oka wichi,

wet tä lhelhte häpkhilek

kalelhäj m'ak tä iyejen.”

₂₈Mat oyok, Iwuk,

nilhokej lhamel t'unhen, tet iwoye chinaj.

Itetshanhit'a ämtes, nemhit is m'ak tä iwoye,

lhäy'e tä asufwkantses.

₂₉Itäj y'oho, häpkhilek nofw

m'ak tä ni'isa tä iyej chinaj.

Mat oka wichi niwohit m'ak chik isej

chik õ'lej lakokhayaj tä iyej,

tsi lhamel tä ni'isahen tatäyhit'a.

₃₀Õ'wohla lheya tä õyok,

chinaj tä lajit lahaya,

tsi häp tä Lhawuk nemhit iwo lahaya lhamel.