Jeremías yen lhämeta Lhawuk lhämet tä ihi Lhawuk Lewukwe lepe
1Lhawuk tahuyej Jeremías tä yok:
2–Kasthi häp Owukwe lepe wet wo silätayej honhat häp olhämetna. Wet olak, “Ch'ahuyaye Lhawuk lhämet, nilhokej amel tä ahäpehen Judá lheley tä letiyäjache lepelisna yämlek len'okwiyayej Lhawuk. 3Häp täja Lhawuk tä laj letumfwaya lhämet, häp Israel laka Dios, tä yok, Leyache akeyis tä ni'isahen wet woyaye m'ak tä is. Wet olham otch'anlhahiyela tä amel kamaj lhenay haw'eta honhatna. 4Yej fwetaj aisej ämtes tä akanyaj tä lhopejkwe, Lhawuk Lewukwe täja.
5“Is chik matche tä alenech'aynayhi wet leleyache akeyis tä ni'isahen, wet lewoyej amehen m'ak tä is alhoho. 6P'altsenhen chipenhas lhäy'e tesalis, lhäy'e wichi tä w'enha lhamej tä yen lew'eta aka honhat. Yej länhen wichi tä laj letesa, wet yej lhen awuhuya dios lhayis iyhäj, yej alekänchiyej lhamel. 7Chik lewoye t'at m'ak tä is, wet olham nech'e otch'anlhahiyela tä amel kamaj lhenay haw'eta honhatna tä ow'enhohte achätilis yämlek tiyäj'attsiy.
8“Amel lefwetaj aisej ämtes tä akanyaj tä m'ak nitälhaye. 9Let'etanhen wet lhäy'e tä lelänhen aiyhäj. Lewo akain'oyaja wet lewoyepej ämtes tä akalelhthayaj tä kamatache. Wet lewun incienso tä len'okwiyej dios tä kamatache tä lhey Ba'al, wet lewujyen iyhäj dios lhayis tä kamatachehen tä pajche katäfwelayej. 10Wet tä leleyejpej, wet äp lehopej n'oye tä oihi Owukwe tä Ot'amajchetna, wet lhoyaykwe, ¡Ofwayhyaj ihi! Mat letujlhache t'at tä lewoyaye m'ayhaytso tä hich'atej tä ni'isahen. 11Häp Owukwena amel lhen etantsesw'eta. Olham t'at tä ow'en täja.
12“Is chik amel lehoye owukwe tä ichunpe honhat tä ihihte Silo, wet lew'enayhla m'ak wit'äyhyaj tä otiyejte, häp oka wichi Israel lakeyis tä ni'isahen tä tamenej. 13Tä amel lewoyaye akeyistso, olham tä Awukn'o oyachajlhahopej tä one'tek leleyache, mat letach'ahuhit'a n'oye. Ot'änpej amehen, mat lechulhit'a n'oho. 14Wet häp tä oyok, m'akte owoyeje owukwe tä ihi Silo, te owohiyejela Owukwena tä ihi täja Jerusalén. Tej tä ow'enhohte achätilis häp Owukwena, lhäy'e tä äp ow'en amhohen tä aleles, tha amel w'et let'ekhayaye. 15Wet häp tä oayokwesila wet nemla oi'amejen, otech'aynhila amejen apuhfwas Israel lhayis tä oyokweste.”
Matche tä akachuhantses Dios laka wichi
16Lhawuk yäme Jeremías wet yok:
–Nemhit owatlä chik let'alhyen n'oye wichi. Yej alep'altsenej n'oye lhamel wet yej nityen n'oyej chik otch'ote, tsi nemhit onchulh amho. 17Lew'en t'at m'ak tä lhamel iwoye tä ihi Judá lhäy'e tä ihi Jerusalén laka hupuy kawayhil. 18Lhamel leles t'äkwe lelhetes, wet lajchalis ilhänhi itäj, wet atsinhay lhamel ilhethiche harina tä yenlhi pan tä yämthilek hiw'enho laka diosa tä fwetaj Pule Kaniyat Tsinha. Wet hip'ajtej tä ifwenho hat'es häp laka dios lhayis tä yen t'awayhata, häp tä iwäkwyhayenn'o. 19Mat olhamhit'ak iläkwlhin'o, lhamel t'at tä lhailäkwiyejwethä, wet häp tä lewit'äyhyaj. Olham tä Lewukn'o olhämet täjtso. 20Tä mälhyejtso, olham Dios omatthichela olhämet tä kalelhäj tä nilhokhiyeja m'ak tä otäyhat: häp Owukwena, wichi, itshätäy, hal'äy, wet lhamel lechumtes nemla iche yachuyaj. Äytajichela owäk, mälhhiyeja iwoye itäj tä n'oma.
Dios laka wichi w'et iwo t'awayhata Lewuk
21Lhawuk tä Israel lhayis laka Dios tä laj letumfwaya yäme laka wichi wet yok:
–Tä amel lewopej akeyisa, nemhit otchumlä otw'ayhtes tä lefwetaj lew'en n'oho. 22Ifwalas tä otonphähte achätilis tä otälhtho honhat tä Egipto, n'am fwenho lhamel tä oyok, “W'en n'oho itshätäy tä lhen otw'ayhata.” 23Tajlhama tä ofwenho lhamel tä is chik iwoye olhämtes, wet häp tä olham ohäpkhila laka Dios wet lhamel häpkhila oka wichi. Wet te oyohtek, “Woyaye nilhokej m'ak tä one'tek lewoyaye, häpkhilek aisen t'at.” 24Mat lhamel tach'ahuhit'a n'oye, iwohiyet'a olhämtes. Iwoye t'at letichunhayajay tä ni'isachehen, tsi lehusey t'unhen. Nemhit itetshann'o, lewhol ithat n'ohlä. 25Tälhe lewhäy tä lhamel tälhohte Egipto yäk nämena, olehiyejt'a tä ochenpej amehen okawos tä profetas. 26Mat amel tek letach'ahu n'oye, lewohiyet'a olhämtes. Tajlhama tä lewoye m'ak tä amel lewoye, letefwaype achätilis tä leleyay n'oyej.
27“Wet am, Jeremías, fwenho lhamel nilhokej m'ak tä ofwel amho, fwitsenej achos tä letahuyej lhamel. Mat lhamel tach'ahuhit'ala ame. 28Wo siläta lhamel tä häpehen wichi tä nitch'ahuya n'oye tä ohäpe Lewuk Dios wet niwatahläk isej ofwonkanyaj. Nemhit t'ifwti n'oyej wet nemhit matchehen lhämtes tä iwoye.”
Hich'atej tä ni'isa wichi len'okhayaj lhäy'e lakeyis
29¡Wichi tä Jerusalén lheley,
isetchehen haw'oley wet fwomejwethä!
¡Wet fwitsenej achoslis tä häpe afwitajayajay
tä lheyaype tachenhas tä ts'anis!
Tsi häp tä Lhawuk nichuwet amehen wet ile amejen.
30Wet Lhawuk yok:
–Wichi tä Judá lheley iwoye m'ak tä matche tä oy'ulhan. Lhamel itichufwi Owukwe tä Ot'amajchet häp n'ocheyälis tä hich'atej tä ni'isahen, wet häp tä ikokyeneje Owukwe. 31Wet äp yenlhi n'on'okhayajw'et tä lhey Tofet tä itihi honhat lhip tä lhey Ben-hinom. Wet häp tä itihi leles tä iwunhomche tä yen t'awayhata laka dios tä kamatache. Häp täja häp m'ak tä n'am ne'tek iwoye, nits'ilakhiyat chik oyen tichunhayaja. 32Wet häp tä olham tä Lewukn'o oyok, Nämla ifwala tä lhiptso nemla lhey Tofet, wet nemla lhey Ben-hinom laka honhat. Häp lheyla N'olänyajw'et, wet õtjänlahlä n'op'itseyhay tä ihi, tsi ihichet'ala lhip elh chik õ'tihiche. 33Wet n'op'itseyhaytso afwenchey tä n'okotses tufwila t'at, lhäy'e itshätäy tä fwitses, wet ihichet'ala elh chik istunchephä. 34Wichi tä ihi Judá lhäy'e tä ihi Jerusalén owohla lepesa lakäjyajay, wet nemla õ'läte lhamel tä tawhayeyhen lepak tä iwo lakäjyaja, tsi häp tä nilhokej honhat nech'e tats'anihila'pe.
