Juan 14

₁Wet Jesús tahuyej lechufwenkay wet yok:

–Yej lhak'alwethä, mat chayaye Dios wet chayay n'oye. ₂Wujpe n'ow'etes tä ihi Ojcha lew'et. Chik nimälhhiyejtso, ohanhiyejt'a chik ofwel amhohen wet oyok, oyik wet owaklhathihena amel haw'etes. ₃Wet chik oyik tä owaklhathen haw'etes, otpinlat amehen wet oaichäjla, häpkhilek lheyay at n'oyej chik oihi lhip tä oihihila. ₄Amel letäfwelayej t'at n'äyij tä tataye lhip tä ohoye.

₅Tomás yok:

–Iwuk, olhamel ohanhiyejt'a ihi lhip tä lehoye. ¿Chip iwoyek ontäfwelej n'äyij tä tataye?

₆Jesús nichulho wet yok:

–Olham ohäpe n'äyij, ohäpe m'ak tä matche, ohäpe n'ow'atshancheyaj. Ihichet'a n'äyij elh chik ichätyene wichi häp Ojcha, tajlhamat olham. ₇Wet chik amel letäfwelay n'oyej, häte letäfwenhiyeja Ojcha. Wet tälhe athana letäfwelayej t'at, tsi lew'enay t'at.

₈Tä Felipe iläte Jesús lhämettso, wet yok:

–Iwuk, päyen n'oyehen Ajcha, wet naya t'at.

₉Jesús nichulho wet yok:

–Felipe, pitaj lewhäy tä oi'amejen, ¿hä kamaj katäfwela n'oyej? Tsi elh tä hiw'enn'o hiw'en t'at Ojcha. ¿Chipte tä lhok, “Päyen n'oyehen Ajcha”? ₁₀Felipe, ¿hä lekachu tä olham oiyej t'at Ojcha wet lham in'oyej, hätet iwoye chik otefwaj'atni? Häp olhämtes tä ofwel amhohen tälhit'a n'oye, tälhe t'at Ojcha tä in'oyej. Lham iwoye m'ak tä lechumet. ₁₁Chayaye olhämet tä oyok, olham oiyej Ojcha wet lham in'oyej. Wok chik m'ayhay tä oyenlhi tä tamenej tä lechayaye olhämtesna, is t'at. ₁₂Matche, matche tä ofwel amhohen, Elh chik icha n'oye häte yenhilhila m'ayhay tä olham oyenlhi. Wet äp yenhilhila iyhäj tä inu'pe, tsi olham ohoye t'at häp Ojcha. ₁₃Wet m'ak at chik häpe chik let'alhaych'oye häp tä isej olhey, owohiyela, häpkhilek n'äl n'oyej Ojcha lewujyaj. ₁₄Oyachajo tä oyok, owohiyela m'ak at chik häpe chik let'alhayej n'oye häp tä isej olhey.

₁₅“Chik amel lehuminayn'o, lewohiyela olhämtes. ₁₆Wet olham ot'alhiyela Ojcha wet ichenla amehen elh Hach'otfwa, häpkhilek i'amejen yämthilek tiyäj'attsiy. ₁₇Lham häpe t'at Espíritu tä hin'älit m'ak tä matche. Häp honhat leles ihanhiyejt'a chik tachumlä, tsi lhamel hiw'enhit'a wet äp tek nitäfwelej. Mat amel letäfwelayej t'at, tsi lham i'amejen wet ihla amhiche.

₁₈“Owomhit'ala amel wet tek oayenla chipenhasa, mat otpinlat amehen. ₁₉Pajiyejt'a wet honhat leles nemla hiw'enn'o. Mat amel lew'enayhlatn'o, tsi tä olham oläy, häte amel leläyhihena. ₂₀Wet ifwalatso lehanhiyeja tä oiyej t'at häp Ojcha, wet amel lheyay at n'oyej, wet olham oi'amejen.

₂₁“Elh tä tachumlä olhämtes wet iwoye, häp täja elh tä ihuminn'o. Wet elh tä ihuminn'o Ojcha ihumnhila, wet häte olham ohumnhila wet olhain'älthiyeja.”

₂₂Elh tä lhey Judas (häpkhit'a Iscariote) tay'ätshane Jesús wet yok:

–Iwuk, ¿chip iwoye tä ts'ilakhila olhamel chik alen'älit n'oyejen, wet tek alen'älthiyeja honhat leles?

₂₃Jesús nichulho wet yok:

–Häp elh tä ihuminn'o iwoye t'at olhämtes. Wet Ojcha ihumnhila, wet olham lhäy'e Ojcha onämhiyela wet oyen ow'eta. ₂₄Mat häp elh tä nhuminan'o iwohiyet'a olhämtes. Wet olhämtes tä amel lelätaye tälhit'a n'oye, tälhe t'at Ojcha tä lechenekn'o.

₂₅“Tä kamaj oi'amejen, ofwel amhohen nilhokej tähestso. ₂₆Mat chik paj Ojcha ichenla amehen Hach'otfwa tä häpe Espíritu tä T'amajchet tä olham olhämetej, yämthilek ichufwen amejen nilhokej m'ayhay wet aitichunyenhichela nilhokej m'ak tä pajche ofwel amhohen.

₂₇“Atamsekis ihi. Otamsek tä in'oyej häp tä ow'en amhohen wet on'äy amejen, tek häte iwoye tä honhat leles hiw'enpej lhamhomche. Yej lhak'alwethä, wet yej nowayay. ₂₈Lelätaye olhämet tä oyok, oyik wet otpinlat amehen. Wet chik mathiche tä lehuminayn'o, a'akäsin'etwethä tä lehanej tä ohoye Ojcha, tsi lham häp tä inu o'pe. ₂₉Athana tä kamaj kahäpeya lewhäy ohanhat amejen tähestso, häpkhilek chik nichäte lewhäy lhoyayhlak, Matche t'at Jesús lhämtes.

₃₀“Wujit'alak oyämlhi amhohen, tsi nech'e nek at n'oye häp honhat laka niyat. Mat lakhajyhayaj inuhit'a o'pe, ₃₁mat otch'anlhaye t'at, häpkhilek wichi ihanej tä ohumin Ojcha wet owoye m'ak tä ne'tek owoye.

“Huwa nechephä, n'ekhen.”