Job ifwenho lakalay'is tä lham lehanyhayaj w'awulhi lhamel lehanyhayaj
1Job nichulho wet yok:
2“¡Eh, amel alhen at ahantsesa,
lefwetaj lhämwethä'pe wichipa!
¡Che let'inhen, wet äp tatäyhla n'ohanyhayaj!
3Tha in'oyej ohanyhayaj
tet iwoye tä i'amejen.
Ow'awulh at amhihen,
wet ihichet'a elh che nhanayej
m'ak tä lhämetso.
4“Ifwalasmhajtso ot'änpejch'oye Dios,
wet nichulho ot'alhyajay.
Mat ifwalasna okalay'is iti n'oyej leläkwyhanyaj.
Ohäpe hin'o tä is alhoho wet lajit lakeya,
mat lhamel t'ischey n'oyej.
5Wichi tä ni'athaya len'äyij
yen w'et m'ayeka elh tä atha len'äyij,
wet ichätyenho lewit'äyhyaj.
6Etantses tä fwitses
newache m'ak che ilän lhamel,
wet wichi tä iwäkwyhayen Dios
letamsekis ihi tä ihiche lew'etes,
wet lhamel yenet che Dios ihi takweyey.
Job itech'aynej che itshätäy ihanej ihi m'ak tä Dios iwoye
7“Y'ätshane itshätäy lhäy'e afwenchey,
lhamenlak itäfwnhat amej m'ak tä Dios iwoye.
8Ahuyej honhat wet ichufwenla amej,
wet w'ahat äp ikalelhthila amho.
9¿Atsi tä nhanayej ihi
tä Lhawuk tä yenchelhi p'ante nilhokej tähestso?
10Lham tä iti lhamej
nilhokej m'ayhay lew'atshancheyaj.
11N'ok'ajch'o ihanej m'ak tä akäj
lhäy'e m'ak tä ni'akäja.
Wet n'och'ote tet iwoye,
tä iläte n'olhämtes, ihanej iyhäj tä isen
lhäy'e iyhäj tä ni'isahen.
Dios häpe Elh tä ihan m'akej wet äp takhajay
12“Thänhäy ihan honhatejen,
letäfwnhayaj tälhe tä pitaj tä ihonhatena.
13Tha mat Dios häpe Elh
tä ihan m'akej wet äp takhajay.
Ihanej at iwoyneje m'ak tä yenlhi,
pajtha wak'alh.
14M'ak tä Dios iwasthi,
ihichet'a elh che inech'aynhi.
Che Dios hip'ohi hin'o,
ihichet'a elh che inuhatphä.
15Che nem iwahinchä pelhay,
nilhok m'ak tä tamchäy.
Che iwahinchä inät,
wet hich'a honhat.
16Lakhajyhayaj iyej lham
wet häp tä ikalheji m'ak.
Len'ohyaj i'pe wichi tä wetahen
lhäy'e iyhäj tä iwetahathen lhamel.
17Lham ilehtej lehanyhayaj häp ahantses,
wet n'okalelhthayajwos nemhit nitäfwelej
m'ak tä fwetaj ikalelhät.
18Ilehtej len'ohyajay niyatey tä lhamenya,
wet yen kwenkaya.
19Isoyej len'ohyajay sacerdotes,
wet iwit'äyen wichi tä lakhajyhayaj ihiche.
20Wichi tä õt'ekhaye nemhit lhämet ihi,
wet thänhäy nemhit laha ihi lakalelhthayaj.
21Dios yen w'et m'ayeka
wichi tä iyhäj lhethey,
wet wichi tä khajnhas
nemhit lakhajyhayaj ihi.
22Hin'älitpe m'ak tä atha,
wet ihutunpe m'ak tä lhäy'e lhip tä nin'äla.
23Lham tä y'ayhattshi wichi tä i'pe honhat
wet äp y'ayhtho lhamel.
Ilhahatpetso wet äp ihutwek.
24Isoyej letäfwnhayaj
niyatey tä i'pe honhat,
wet äp iwetahatche ts'anis
tä n'äyij newache.
25Lhamel inukwe t'at lhip tä honataj ihi,
wet tan'ajchetshi tet iwoye w'oknhas.
